¹ Ali, kede Anak Domba nengau segel iye keturu, naan beloh engan-engon tei surga kira-kira setengah jam ola iye. ² Ali, aap kite keturu malaikat iye jakat tei hadapan Allah, nyang turu trompet na okoi ntong dali. ³ Belalu, malaikat bali sulet ali jakat tei altar*, mege erai ti runa dupa ke amas; ali ntong da na okoi deo dupa dian na sole sendro doa-doa ulun-ulun berasih tei munan altar amas iye tei hadapan takhta iro. ⁴ Ali, otut dupa iro, sendro ali doa-doa ulun-ulun berasih, mpe tei hadapan Allah ke kami malaikat iro. ⁵ Belalu, malaikat iro ngepe runa dupa nyang ngatek iye ali apui iye na epe ke altar ali nimai iye ntong tana; maka tepedinga lei engan guntur iye namput kilat nyang gempa tana. Trompet Pertama mpe Trompet Keopat Nasiup ⁶ Uli kero, malaikat iye mege turu trompet iro besiap-siap dian nyiup trompet dali. ⁷ Malaikat pertama nyiup trompet da, maka bepengejaji lei uran es nyang apui besampur daya; ali na duru ntong munan tana, maka soya lei sepertolu kawan tonga kayu nyang soya kawus ikut jereu. ⁸ Malaikat kedue nyiup trompet da, maka naan leen nget gunung iye kune suru na timai ntong suang laut; ali sepertolu ke laut jaji daya, ⁹ maka sepertolu ke makhluk iye naan tei laut desung bolum jaji mate, nyang sepertolu ke kapal na senrapai. ¹⁰ Malaikat ketolu nyiup trompet da, maka lotu lei ke langit erai ti sentomoi solai, dolan nget suluh, ali sentomoi iro nipan sepertolu ke sunge nyang penyulet danum. ¹¹ Aran sentomoi iro iye lei Apsintus, Maka, sepertolu ke penyulet danum jaji apsintus ali deo ulun mate leka danum iro apu jaji pait. ¹² Malaikat keopat nyiup trompet da, maka tepupuk lei sepertolu mate olo, sepertolu bulan, nyang sepertolu sentomoi mpe sepertolu dali jaji denem, nyang sepertolu jolo jaji denem ali ngetro ade kede malam. ¹³ Belalu, aap kite ali keringa erai tempulu benia mensiling tei botuk-botuk langit, bepaner ali engan wale,"Selaka, selaka, selaka lei dali iye nono tei tana leka engan trompet ketolu malaikat bali sengke sagar na siup."