¹ Belalu, aap kite erai malaikat galak bali iye dolui ke surga, be pakaian awan ali pelangi naan tei moon utek da, nyang wae da nget mate olo, nyang poo da nget ori apui. ² Malaikat iro mege erai ti buku idis iye besilak. Ali, Da setajek poo sanan tei laut nyang poo sei tei moo bawo, ³ belalu ngeraring ali engan wale, nget singa iye mengaum; ali uli iye ngeraring, turu gemuruh guntur pekinga engan dali. ⁴ Kede keturu guntur iro apu mengan, aap be aga menulis iye, tapi aap keringa engan ke surga bepaner, "Segel lei se iye apu na ulek keturu guntur iro! Iya menulis iye!" ⁵ Uli kero malaikat iye ite aap jakat tei laut ali tei mo bawo iro ngengkat kami sanan da nengkawe langit, ⁶ ali besumpah di Na iye bolum mpe kengola iye, iye ngene langit nyang se aran atek iye, ali laut nyang se aran atek iye, mpe sa sagar naan na ema eso, ⁷ tapi tei kede engan malaikat keturu, kede da ngaga nyiup trompet da, maka tepeganap lei resia Allah, nget iye na pekempe Da ntong kawan uyang-Da: kawan nabi*." ⁸ Uli kero, engan iye mei dinga aap ke surga bepaner eso ntong aap, lek da, "Tulak nyang epe lei gulungan buku betengau ke kami malaikat iye jakat tei munan laut nyang mo bawo iro." ⁹ Maka, aap tulak ntong malaikat iro ali kaweng dian da ngokoi gulungan buku idis iro ntong aap. Ali, malaikat iro bepaner nengkawe aap, "Epe lei buku ihe nyang okan lei, iro sagar ngene butung ko pait, tapi tei bowa ko sagar benanam mamis nget lio wani." ¹⁰ Belalu, aap ngepe buku idis tei kami malaikat iro nyang ngokan iye, ali tei bowa aap benanam mamis nget lio wani; ali kede aap apu ngokan iye, butung aap jaji pait. ¹¹ Belalu, da bepaner nengkawe aap," Ko sa ahan sa ngene moko wauh* eso tei hadapan deo bangsa nyang ulun deo nyang bahasa ali raja-raja."