¹ Belalu, ntong aap na okoi erai bila paring, leen iye nget tungket pengukur, ali naan engan, "Tulak nyang ukur lei Runa Allah nyang altar iye namput dali iye sembahyang tei suang iye. ² Tapi sagar iye, dion aa lei sentala Runa Allah iye tei sila ongon, iya ngukur iye leka iro apu na okoi ntong bangsa-bangsa; nyang dali sagar ngelelijak Kota Berasih iro kengola 42 bulan. ³ Ali, Aap sagar ngokoi kuasa ntong due saksi aap nyang dali sagar ngene moko wauh* kengola 1260 olo nyang nunang kain nget nare aseng." ⁴ Dali ihe iye lei 2 tonga zaitun nyang 2 poo dian iye jakat tei hadapan Tuhan iye nempuun tana. ⁵ Ali, kaye naan ulun iye ngaga penare dali, losek apui ke bowa dali nyang pesoya kawan musuh dali. Kaye dase aa naan aga penare dali, da sagar na bunu ali leen nget iro. ⁶ Kedue iye ihe naan kuasa di nangkep langit dian uran sa dolui kede olo-olo dali ngene moko wauh; nyang naan kuasa munan danum di ngubah iye jaji daya ali di mepai tana ali sesenu malapetaka, mpe ringket ngetme ga dali. ⁷ Ali, kede dali apu nyensunek kesaksian dali, setua iye losek ke suang kowang maut sagar bulo ngelawen dali nyang pekaleh dali, pelos munu dali. ⁸ Ali, antu kedue iye sagar ngerebaleng tei nalan kota solai, iye secara simbolis na otus Sodom* nyang Mesir, runa Tuhan taka ade na salib. ⁹ Ali, ke kawus bangsa nyang suku nyang bahasa ali ulun deo sagar kite antu kedue iye kengola 3,5 olo nyang dali sa sagar kelewa antu kedue iye na peloku tei lebeng. ¹⁰ Ali, iye nono tei tana sagar bepengego munan dali nyang ego; ali mengkekirim hadiah erai ali iye bali leka kedue nabi ihe penyaya dali iye nono tei tana. ¹¹ Tapi sagar iye, uli 3,5 olo juus pemolum ke Allah letep tong suang kedue antu iro, ali dali jakat tei munan poo dali mpe iye ngentoan leen dali jaji naan na akut. ¹² Belalu, dali keringa engan iye wale ke surga bepaner nengkawe dali, "Sungket lei ntong he!" Ali, dali ade sungket ntong surga suang awan, na saksikan ene musuh-musuh dali. ¹³ Ali, tei kede iro, naan gempa tana iye tamam bene mpe sepersepuluh kota iro runtuh; nyang turu ribu ulun mate leka gempa tana iro, ali iye sa mate jaji takut bene, belalu nyentamam Allah iye tei surga. ¹⁴ Petaka iye kedue apu lalo; teneng lei petaka iye ketolu sagar lekah sulet. Trompet iye Keturu Mengan ¹⁵ Belalu, malaikat iye keturu nyiup trompet da, nyang tepedinga lei engan wale ke surga iye bepaner, "Pemerentahan denia apu jaji pemerintahan Tuhan taka nyang Da Iye Naan kuasa ke-Da*, nyang Da sagar memerentah mpe kengola iye." ¹⁶ Uli kero, due pulu opat tuha-tuha* iye tuet tei runa dali, tei hadapan Allah, suhujud nyang nyemah Allah, ¹⁷ nelang bepaner, "Kemali besyukur ntong-Ko, oi Tuhan Allah Iye Mahakuasa, Iye naan nyang Iye Apu Naan, leka Ko apu ngepe kuasa-Ko iye solai nyang mulai memerentah. ¹⁸ Ali, bangsa-bangsa apu bereket, tapi pemereket-Ko apu losek, nyang kede iye apu sulet di no ulun-ulun mate dian na hakimi ali ngokoi upa hamba-hamba-Ko, nabi-nabi* nyang ulun berasih nyang iye sa ronu ali aran-Ko, iye idis nyang iye solai, ali dian ngene hancur kawan dase pehancur tana!" ¹⁹ Uli kero, betengau lei Runa Allah tei surga nyang tau ite lei Tabut Perjanjian Allah suang Runa-Da, nyang losek lei kilat ali engan guntur nyang gempa tana ali uran es iye lebet.