¹ Uli kero, tepeite lei erai tanda iye solai tei langit: erai konge bawe be pama mate olo nyang bulan tei mat poo da nyang mahkota ke due belas sentomoi tei utek da. ² Bawe iro desung ntung nyang suang kenyaya da di belolos, da ngeraring kenare. ³ Uli kero, tepeite lei erai tanda bali tei langit: erai antu naga solai bewarna mea iye naan turu utek nyang sepuluh tanuk nyang turu mahkota tei utek da. ⁴ Ikui naga iro nyujut sepertolu sentomoi tei langit pelos mepai iye ntong tana. Naga iro jakat tei one wae bawe iye di mekus iro dian kede bawe iro apu belolos, da tau nolen Anak da. ⁵ Bawe iro mekus erai konge Tia upo, iye sagar memerentah bangsa-bangsa ali tungket besi; tapi Tia iro na jampas nyang na oit ntong Allah pelos ntong hadapan takhta-Da. ⁶ Bawe iro mensit nuju juet jamen, ntong runa iye na sade Allah di na dian tei biduh, da na pelihara kengola seribu due jatus onum pulu olo. ⁷ Ali, naan kejadian lei bulo bawong tei surga, Mikhael nyang kawan malaikat da bulo ngelawen naga iro. Naga iro bulo sendro kawan malaikat da, ⁸ tapi dali sa kate mpe beloh eso runa di nali tei surga. ⁹ Naga solai iro na timai ntong wa, da nipe tuha iro na otus Iblis atawa Setan, iye pe taang kawus denia, da na timai ntong tana, nyang kawan malaikat da na timai ntong wa sendro da. ¹⁰ Ali, aap keringa engan iye wale ke surga bepaner, "Nehe, apu sulet keselamatan, kuasa, nyang kerajaan Allah taka, ali kekuasaan Kristus*-Da leka da iye nuduh kawan uyang taka, iye nuduh dali tei one wae Allah jolo nyang malem apu na timai ntong wa. ¹¹ Dali pekaleh iye ali daya Anak Domba, nyang ali engan kesaksian dali; leka dali sa kenayang sengat dali, belantak kede nengkawe pengedate. ¹² Leka iro, be ego aseng lei, ooi surga nyang kawus iye nono tei suang iye! Tapi selaka lei tana nyang laut leka Iblis apu dolui ntong kam suang pemereket iye solai leka da ketoan bahwa waktu iye naan di na udok." ¹³ Kede naga iro kite bahwa da apu na timai ntong tana, da penyaya bawe iye apu mekus Tia upo mei. ¹⁴ Tapi sagar, bawe iro na okoi due ilar tempulu benia iye solai dian da tau mensiling ntong juet jamen, ntong runa da, tei kame da na pelihara kengola erai masa, due masa, nyang oro ke one wae nipe. ¹⁵ Nipe iro nyamur danum iye nget sunge nengkawe bawe iro, dian petaping da bawe tei suang iye. ¹⁶ Tapi, tana ngawat bawe iro; tana nengau bowa iye nyang nolen danum iye na samur naga iro. ¹⁷ Maka, naga jaji tamam bereket nengkawe bawe iro nyang tulak dian nemulo kawan tia iye bali ke bawe iro, iye iro ulun-ulun iye ngeringa perentah-perentah Allah nyang be ege tei kesaksian Yesus. ¹⁸ Naga iro jakat tei diding laut.