¹ Uli kero, aap kite erai antu setua ganas losek ke suang laut, naan sepuluh tanuk nyang turu utek. Tei tiap tanuk iye naan erai ti mahkota nyang tei tiap utek iye be tulis aran-aran hinaan. ² Setua ganas iye ite aap iro mirip nget kuli, poo iye nget poo biang, nyang bowa iye nget bowa singa. Naga iro ngokoi setua ganas iro pengegalak, runa, nyang kuasa iye solai. ³ Aap kite erai ke utek-utek iye nget naan awa iye tau ngene pengedate, tapi awa iro apu beme. Kawus denia mawah nyang siut setua ganas iro. ⁴ Ali, dali nyemah naga iro leka apu ngokoi pengegalak iye ntong setua ganas iro; nyang dali nyemah setua ganas iro nelang bepaner, "Dasekah iye nget setua ganas ihe ali dasekah iye kate bulo ngelawen da?" ⁵ Ali, ntong da na okoi erai bowa iye deo paner sakah nyang pedaat, nyang kuasa dian ngene leen iye kengola 42 bulan. ⁶ Da nengau bowa da suang pedaat ngelawen Allah, dian pedaat aran-Da, nyang runa-Da, nyang dali iye nono tei surga. ⁷ Da ade na lewa dian nemulo ulun-ulun berasih nyang pekaleh dali; ali ntong da na okoi kuasa munan kawus suku, ulun deo, bahasa, nyang bangsa. ⁸ Kawus iye nono tei tana sagar nyemah da, iye iro denu ulun iye aran da sa tetulis ke tela denia na pejaji suang buku pemolum no Anak Domba, iye apu na semalis. ⁹ Denu ulun iye be kelinge oboh lei da ngeringa ihe: ¹⁰ "Apabila dase iye na tantu nget tawanan, da sagar jaji tawanan; apabila dase iye munu ali pedang, ali pedang da sa ahan sa na bunu." ¹¹ Belalu, aap kite erai antu setua rusi bali losek ke suang tana; nyang setua iro naan due tanuk nget anak domba, tapi da bepaner nget erai antu naga. ¹² Da ngene leen ngunau kawus kuasa setua rusi iye ke tela iro tei hadapan da, ali ngene tana nyang dali iye nono tei suang iye nyemah setua rusi ke tela, iye tamam awa apu neme. ¹³ Da ngene tanda-tanda mestahil iye solai, belantak pedolui apui ke langit ntong tana, tei hadapan ulun deo. ¹⁴ Ali, da pe taang ulun-ulun iye nono tei tana ali tanda-tanda mestahil iye na lewa dina dian na ene tei hadapan setua rusi iye ke tela. Da ngulek ntong dali iye nono tei tana dian ngene sempatung setua rusi iye ke tela, iye awa koe pedang, tapi tatap bolum iro. ¹⁵ Da na lewa dian ngokoi sengat ntong sempatung setua rusi iro mpe sempatung setua rusi iro tau bepaner nyang ngene ulun-ulun iye sa nyemah sempatung iro na bunu. ¹⁶ Ali, da ngene kawus ulun, idis atawa solai, tatau atawa susah, budak atawa ulun iye bebas, na ene tanda tei kami sanan atawa tei konat da, ¹⁷ dian beloh erai konge aa iye tau moli atawa ngejual kecuali da iye naan tanda iro, iye iro aran setua rusi iro atawa bilangan aran da. ¹⁸ Hal ihe perlu hikmat. Dion lei ulun iye bijaksana ngereken angka setua rusi iro leka angka iro iye lei angka erai konge meresia; nyang angka iye onum jatus onum pulu onum.