¹ Uli kero, aap kite Anak Domba jakat tei Bukit Sion, nyang sendro-Da naan 144 ribu konge, iye naan aran Ma-Da tei konat dali. ² Aap keringa engan ke surga nget gemuruh danum iye deo nyang nget engan guntur iye wale, tapi engan iye dinga aap iro nget engan kawan pemain kecapi iye pekengan kecapi dali. ³ Dali menyanyi naan nyanyian kado tei hadapan takhta nyang tei hadapan keopat makhluk, ali tei hadapan kawan tuha*. Beloh sunah erai konge iye ketaru nyanyian iro beloh bali je ke jatus opat pulu opat ribu konge iye apu na towus tei tana. ⁴ Dali iye lei ulun-ulun iye sa pedaat unuk ali kawan bawe leka dali bujang. Dali iye lei kawan ulun iye siut Anak Domba bele ntong me Da tulak. Dali apu na towus ke ekang meresia dian nget kawan bua one di no Allah nyang Anak Domba. ⁵ Beloh opau ke suang bowa dali; dali beloh kenyala. Paket ke Tolu Malaikat ⁶ Aap kite malaikat bali mensiling tei botuk-botuk langit, ngoit Injil* mpe kengola iye dian na pekempe ntong dali iye nono tei tana ali ntong kawus bangsa, suku, bahasa, nyang ulun deo ⁷ nyang da bepaner ali engan wale, "Takut lei ali Allah nyang okoi lei kehormatan ntong-Da leka kede penghakiman iye apu sulet; semah lei Da iye ngene langit, tana, laut, nyang kawus sumber danum." ⁸ Belalu, malaikat iye bali, iye kedue demasu nyang bepaner, "Runtuh, apu runtuh Babel iye solai iro leka da apu ngene kawus bangsa isep anggur nafsu seksual da iye daat bene." ⁹ Uli kero, malaikat iye bali, iye ketolu, demasu kedue malaikat iye one, nyang bepaner ali engan wale, "Kede dase aa nyemah setua iro nyang sempatung iye, ali naan tanda tei konat atawa kami da, ¹⁰ ulun iro sagar isep anggur pemereket Allah, iye na nsek ali kekuatan tamam ntong suang mansi pemereket-Da, ali da sagar na siksa ali apui nyang welirang tei hadapan malaikat-malaikat berasih nyang tei hadapan Anak Domba. ¹¹ Ali, otut siksaan dali mengket mpe kengola iye. dali beloh kede iye dian tehur, me jolo atawa malem, iye iro dali iye nyemah setua iro nyang sempatung iye, atawa dase iye naan tanda aran da." ¹² Ihe lei kesangkal ulun-ulun berasih iye mege perentah Allah nyang iman dali tei suang Yesus. ¹³ Belalu, aap keringa engan ke surga bepaner, "Tulis lei ihe: Ke nehe, na berkati lei ulun mate, iye mate tei suang Tuhan." Roh* bepaner, "Bene, dian dali tau tehur ke keuyuh-aya dali leka deo pengkoe dali siut dali." Tana Na oteu ¹⁴ Belalu, Aap kite se aran awan bura nyang tei munan awan iro tuet erai konge nget Anak Meresia*, betunang mahkota amas tei utek-Da nyang arit* iye tarem tei kami-Da. ¹⁵ Belalu, malaikat bali losek ke Runa Allah, nyang nyempo ali engan wale nengkawe Da iye tuet tei munan awan, "Ewai aa arit-Ko nyang ngoteu lei leka wayah iye dian ngoteu apu mpe nyang moko oteu tei tana apu nsak." ¹⁶ Maka, Da iye tuet tei munan awan ngewewai arit-Da ntong munan tana, nyang tana ade na oteu. ¹⁷ Uli kero, malaikat bali losek ke Runa Allah iye tei surga, nyang Da ade naan arit iye tarem. ¹⁸ Ali, malaikat bali, iye naan kuasa munan apui, losek ke altar*. Da nyempo ali engan wale nengkawe malaikat iye desung mege arit tarem iro, " Ewai ade arit ko iye tarem iro nyang kumpul lei tunun bua anggur ke tonga anggur tei tana." ¹⁹ Maka, malaikat iro ngewewai arit da ntong tana nyang ngumpul tunun anggur tei tana ali nimai iye ntong suang batu gilingan solai pemereket Allah. ²⁰ Napis bua anggur iro na ene tei ongon jaa, nyang daya salir ke runa penapis anggur iro kira-kira kengemo pengenali kuda nyang sepanyang seribu onum jatus tingkat.