1 Aap kite tanda bali tei langit, iye solai nyang moko wauh, turu malaikat iye ngoit turu bencana, iye iro bencana iye pengawus, leka suang keturu bencana iro lei pemereket Allah na pekua. 2 Belalu aap kite se aran iye nget lautan kaca besampur apui nyang dali iye apu pekaleh setua iro, sempatung iye, nyang angka aran iye, jakat tei diding lautan kaca iro nelang mege kecapi Allah. 3 Dali menyanyi nyanyian Musa,* hamba Allah, nyang nyanyian Anak Domba: "Solai nyang moko wauh kawus pengkoe-Ko, oi Tuhan Allah iye Mahakuasa. Adil nyang bene kawus alan-Ko oi Raja sempeliar bangsa. 4 Dase ye iye sa takut nengkawe-Ko, oi Tuhan nyang sa memuliakan aran-Ko? Leka, je Ko lei iye berasih. Kawus bangsa sagar sulet nyang nyemah tei one wae-Ko leka keadilan-Ko apu na petendre." 5 Uli kawus hal ihe, aap kite Runa Allah, kemah kesaksian Allah tei surga betengau. 6 Turu malaikat iye ngoit turu bencana iro losek ke Runa Allah, be pama kain iye bura nyang mileu, nyang nunang selempang amas tei dada dali. 7 Erai ke keopat makhluk ngokoi ntong keturu malaikat iro turu mansi amas, ponu pemereket Allah, iye bolum mpe kengola iye. 8 Runa Allah ponu ali otut nyang kemuliaan Allah ali ke kuasa-Da; nyang sa sunah erai konge tau letep Runa Allah kaye male turu bencana ke turu malaikat iro sunek.