¹ Belalu, ap keringa erai engan iye wale ke suang Runa Allah iye bepaner nengkawe keturu malaikat, "Tulak lei nyang duru lei keturu mansi pemereket Allah iro ntong tana." ² Malaikat pengeone tulak nyang ngeduru mansi da ntong tana, maka losek lei semolot iye sompoi bene nyang mpe penare-nereu tei ulun-ulun iye naan siri setua iro nyang iye nyemah patung iye. ³ Malaikat kedue ngeduru mansi da ntong laut, maka laut beubah jaji daya, nget daya ulun mate; nyang kawus iye bolum tei suang iye ade mate. ⁴ Malaikat ketolu ngeduru mansi da ntong sunge-sunge nyang sumber-sumber danum, nyang kawus iye jaji daya. ⁵ Belalu, aap keringa malaikat iye naan kuasa munan danum bepaner, "Ko adil, oi Iye Suci, iye naan ali apu naan leka Ko menghakimi kawus ihe. ⁶ Leka, dali apu ngeduru daya umat-Ko iye berasih nyang daya nabi-nabi-Ko*, tapi Ko ngokoi dali daya dian na isep. Dali pantas dian nerima iye." ⁷ Ali aap keringa altar* bepaner, "Oi Tuhan, Allah Iye Mahakuasa, bene nyang adil lei penghakiman-Ko." ⁸ Malaikat keopat ngeduru mansi da ntong munan mate olo, maka mate olo na okoi kuasa dian pesoya meresia ali apui. ⁹ Meresia na pesoya ene layeng iye luar biasa, tapi dali pedaat aran Allah iye naan kuasa munan kawus bencana ihe. Dali sa moyo betobat nyang nyang ngemulia Allah. ¹⁰ Malakat kelime ngeduru mansi da ntong munan runa setua iro, maka kerajaan da jaji denem; nyang dali ngeket lola dali leka kenare, ¹¹ nyang pedaat Allah iye tei surga leka kesa nare ali semolot-semolot dali; tapi dali sa betobat ke pengkoe-pengkoe dali. ¹² Malaikat keonum ngeduru mansi da ntong sunge solai, iye iro Efrat, maka danum iye belalu meang dian nyade alan di no raja ke Timur. ¹³ Belalu, aap kite ke bowa naga, ke bowa setua iro, nyang ke bowa nabi palsu losek tolu roh iye ngeraru nget bekok, ¹⁴ leka dali iye lei roh-roh jahat, iye ngene tanda-tanda moko wauh, iye tulak ntong raja-raja tei tana dian ngumpul dali dian nengkawe bulo-bawong tei olo solai, iye iro olo Allah, Iye Mahakuasa. ¹⁵ ("Teneng! Aap sulet nget maling. Naberkati lei ulun iye sengke ngedurung nyang melihara pama da mpe da sa sagar malan nelang belawoi nyang deo ulun sa sagar kite pekakas da.") ¹⁶ Uli kero, roh-roh jahat iro ngumpul dali tei runa, iye suang basa Ibrani na otus Harmagedon. ¹⁷ Malaikat keturu ngeduru mansi da ntong ntong mo, maka tepedinga engan iye wale ke suang Runa Allah, ke runa iro, ngulek, "Apu sunek." ¹⁸ Ali, ite lei kilat iye cir-car, iye mengan nyang gemuruh guntur, nyang gempa tana iye tamam, nget iye beloh pini naan ke tela meresia naan tei munan tana, tamam bene gempa iro. ¹⁹ Kota solai iro teboka jaji tolu bagian, nyang deo kota bangsa-bangsa iro runtuh; nyang Babel iye solai iro sa tepekelot Allah dian na okoi ntong da mansi anggur pemereket-Da iye tamam bene. ²⁰ Sesenu pulau beloh, nyang gunung-gunung jaweh. ²¹ Uran es iye solai, kira-kira kedoyat 1 talenta, lotu ke langit nipan meresia; tapi meresia pedaat Allah leka bencana uran es iro. Leka, bencana iro ngetro moko akut.