¹ Uli kero, erai ke turu malaikat iye mege turu mansi iro nyerini nyang bepaner ntong aap, lek da, "Ntonghe lei, aap sagar nundru ntong ko hukuman dian pelacur solai iro, iye tuet tei munan deo danum, ² iye ali da raja-raja tei tana melanyi nyang dali iye nono tei tana apu mabuk ene anggur kelanyi da." ³ Malaikat iro ngoit aap suang Juus ntong juet-jamen, ali aap kite erai konge bawe tuet tei munan erai antu setua iye bewarna mea nyang deo ali aran-aran daat, iye naan turu utek nyang sepuluh tanuk. ⁴ Bawe iro nuang pama bewarna lenoyung nyang mea iye behias ali amas, batu-batu permata, nyang mutiara. Da mege erai ti mansi iye ponu ali kejahatan nyang kesompoi daat kelanyi da. ⁵ Tei konat da, naan tulisan aran, be resia: ⁶ Aap kite bawe iro mabuk ene daya ulun-lun berasih nyang ene daya saksi-saksi Yesus. ⁷ Belalu, malaikat bepaner ntong aap, "Se ngene ko wauh? Aap sagar ngulek ntong ko resia bawe iro nyang resia setua iye na sungket da, iye naan utek turu nyang naan tanuk sepuluh iro. ⁸ Setua iye na teneng ko iro pini naan, tapi nehe apu beloh, ali sagar lekah losek ke jurang nyelaka ntong kebenasaan. Ali, dali iye nono tei tana, iye sa tecatat suang buku pemolum ke tela denia na ene, sagar wauh kede kite setua iro, iye pini naan, tapi nehe apu beloh, nyang sagar losek eso. ⁹ Hal ihe memerlukan akal nyang pengentaru. Turu utek iro iye lei turu gunung iye tei munan iye bawe iro tuet. ¹⁰ Turu utek iro ade naan lei turu raja, lime ke dali bali apu lotu, erai raja sengke naan, nyang erai raja eso male sulet, tapi kede da sulet ia sa ahan sa nono erai-erep aa. ¹¹ Setua iye one pini naan, nehe beloh eso iro, naan lei raja kewalo tetapi da temasuk suang turu raja mei, nyang da nuju kebenasaan. ¹² Kesepuluh tanuk iye ite ko iye lei sepuluh raja iye male mahan pemerentahan, tapi dali mahan kuasa nget raja kengola erai jam sendro setua iro. ¹³ Dali naan tujuan iye sameh ali dali ngokoi kuasa nyang se ga dali ntong setua iro. ¹⁴ Dali sagar bulo ngelawen Anak Domba, tapi Anak Domba sagar pekaleh dali leka Da iye lei Tuhan munan segala tuhan nyang Raja munan segala raja ali dali iye sendro-Da iye lei iye na took, na peli, nyang iye setia." ¹⁵ Uli kero, malaikat iro bepaner ntong aap, "Danum iye ite ko, iye tei munan iye pelacur iro tuet, iye lei masyarakat, ulun deo, bangsa, nyang bahasa. ¹⁶ Kesepuluh tanuk iye ite ko nyang setua iro sagar muar da pelacur. Dali sagar ngene da seranta nyang belawoi, belalu ngokan daging da nyang nyuru da ali apui. ¹⁷ Leka, Allah apu ngonok hal iro dian mpe tujuan-Da ali ketuju dian ngokoi kekuasaan dali ntong setua iro mpe firman Allah na sensukup.