¹ Okah kawus ihe, aap kite malaikat bali dolui ke surga, iye naan kuasa nyang solai, nyang tana na pe maa ene keoboh leen da. ² Da nyempo ali engan iye wale, ulek da, "Runtuh! apu runtuh Babel iye solai iro! Da apu jaji runa nono setan-setan nyang penjara di sesenu juus sompoi, salai di sesenu leen tempulu iye sompoi nyang na moko reket. ³ Leka kawus bangsa apu mabuk anggur nafsu zina da, raja-raja tei tana bezina ali da, nyang pedagang-pedagang tei tana jaji tatau ene hawa nafsu da iye solai." ⁴ Belalu, aap keringa engan bali ke surga bepaner, "Hai umat-Aap, buyo lei ke da dian kam sa mpe siut suang dosa da nyang sa kune bencana iye sagar nipan da. ⁵ Leka, dosa-dosa da apu betuyuk mpe tei langit nyang Allah apu kingat kenyala-kenyala da. Ene leen kota iro sameh nget da apu ngene leen, bales ⁶ aa nengkawe da due kali lepet munan pengkoe-pengkoe da, nyang suang mansi iye na pakai da dian nyampur, sampur lei due kali lepet. ⁷ Kedeo da apu ngene oboh nyang ngene kemewahan tei unuk da gales, ene lei siksaan nyang nare aseng ntong da kedeo iro. Leka, da bepaner suang aseng da, 'Aap tuet nget erai konge ratu, aap ba lei balu nyang aap sa sagar pini kenyuang nare aseng.' ⁸ Ene leka iro, suang erai olo aa bencana-bencana da sagar sulet nengkawe da, iye iro pengedate, nare aseng, nyang keket lau. Da sagar na suru ali apui leka Allah iye menghakimi da iro naan kuasa." ⁹ Raja-raja tei tana, iye apu bezina nyang bolum suang kemewahan sendro da, sagar ngerodoi nyang ngentai da kede dali kite otut apui nyuru da, ¹⁰ jakat oro-oto leka takut nengkawe siksaan da, nyang ngerodoi, " Selaka! Selaka lei, jaa iye solai, Babel, jaa iye nahap iro! Leka, suang erai jam aa penghakiman kam apu sulet!" ¹¹ Pedagang-pedagang tei tana sagar ngerodoi nyang nare aseng dian jaa iro, leka dali sa mpe erai konge sagar moli eso dagangan dali, ¹² iye iro amas, perak, permata, mutiara, kain linen buen, kain sutra, kain kirmizi, deo masam barang ke kayu iye buen ewo iye, barang-barang iye na ene ke gading, ke kayu iye rarang, ke tembaga, besi, marmer, ¹³ kayu manis, rerampah, heharuman, mur, garu, anggur, olau, gelapung buen, gandum, lemu-sapi, domba, kuda, kereta, budak, belantak sengat meresia. ¹⁴ Dali sagar bepaner, "Bua iye na sengkana jiwa kam apu jaweh ke kam, nyang sa sagar ruku eso." ¹⁵ Kawan pedagang barang-barang ihe, iye jaji tatau leka jaa iro, sagar jakat oro-oro leka takut nengkawe siksaan iye na kenyuang jaa iro, nelang ngerodoi nyang nare aseng. ¹⁶ Dali bepaner, "Selaka! Selaka lei jaa solai iro, iye bepama linen buen; iye makai kain lenoyung nyang kain kirmizi, nyang behias ali amas, batu-batu permata, nyang mutiara! ¹⁷ Leka, suang erai jam aa, kawus penatau iro apu na pesinap!" ¹⁸ nyang nyempo kede dali kite otut nyuru jaa iro, "Jaa kame aa nget jaa solaI ihe?" ¹⁹ Dali ngehamur habu tei utek dali nhyang nyempo nelang ngerodoi nyang nare aseng, ulek da, "Selaka! Selaka lei jaa solai iro, iye ke da kawus iye naan kapal tei laut apu jaji tatau ene pengelewi da! Leka, suang erai jam aa, jaa iro apu na ene jaji sunyi!" ²⁰ Be ego aseng lei munan da, hai surga, hai ulun-ulun berasih, rasul-rasulk,* nyang nabi-nabi!* leka Allah apu pelotu hukuman munan jaa iro di ngkam. ²¹ Belalu, erai malaikat iye galak ngengkat erai kotu batu iye solai iye nget batu gilingan pelos nimai iye ntong laut nelang bepaner, "Nget iro lei Babel, jaa solai iro, sagar beloh di nyang sa sagar pini naan eso li. ²² Engan dali pekengan kecapi, penyiup suling, penyiup trompet, nyang alat musik bali iye sa sagar tepedinga eso tei suang kam. Beloh iye hakun, iye tau ngene se aran kenentuju, iye sagar naan tei suang kam. Engan penggilingan sa sagar tepedinga li suang kam. ²³ Ama lampu sa sagar nyeraat eso tei suang kam. Engan penganten upo nyang penganten bawe sa sagar tepedinga li tei suang kam, leka pedagang-pedagang kam iye lei ulun tamam tei tana. Leka, kawus bangsa apu na petaang ene sihir kam.* v 24 Ali, tei suang jaa iro naan daya nabi-nabi, ulun-ulun berasih, nyang daya kawus meresia iye apu na bunu tei tana."