¹ Uli kero, aap kite tei kami sanan Da iye tuet tei munan runa iro erai gulungan* buku, iye naan tulisan tei lepes suang nyang ongon ye, iye na segel ali turu segel. ² Ali, aap kite erai malaikat iye tegeh nyempo ali engan wale, "Dase kah iye layak nengau gulungan buku iro nyang nengau segel-segel ye?" ³ Tapi sagar, beloh sunah erai konge, me iro iye tei surga, tei munan tana mpe ade iye tei mat tana tau nengau atawa neneng iye naan suang gulungan iro. ⁴ Maka aap nela ngerodoi begamat leka beloh manang muni sunah erai konge ahan dian nengau gulungan buku iro atawa neneng iye naan tei suang ye. ⁵ Tapi sagar, erai ke tuha-tuha* iro ngemaner ntong aap, "Ua lei ngerodoi! Teneng, Singa ke suku Yehuda, keturunan Daud*, apu kuret mpe Da tau nengau gulungan buku iro nyang turu segel iye." ⁶ Ali, aap kite tei botuk-botuk runa ali opat makhluk iro mei, ali tei botuk-botuk kawan tuha-tuha iro erai Anak Domba jakat, nget apu na semalis, iye naan turu tanuk nyang turu mate, iye iro turu Juus Allah iye na utus ntong denia. ⁷ Anak Domba iro sulet pelos ngepe gulungan buku iro ke kami sanan Da iye tuet tei munan runa. ⁸ Ali, kede Anak Domba apu ngepe gulungan buku iro, keopat makhluk nyang kedue pulu opat tuha-tuha sujud tei one wae Anak Domba iro, asing-asing mege erai ti kecapi nyang erai ti mansi amas iye ponu ali garu, iye naan lei doa ulun-ulun berasih. ⁹ Belalu, dali menyanyi iye iro nyanyian kado, ulek iye: "Ko ahan ngepe gulungan buku iro nyang nengau segel-segel iye leka Ko apu na semalis, nyang ali daya-Ko, Ko apu nowus ulun-ulun ke setiap suku, bahasa, kelompok nyang bangsa dian no Allah. ¹⁰ Ali ko apu pejaji dali jaji nget leen kerajaan nyang imam-imam dian no Allah taka, ali dali sagar memerentah munan tana." ¹¹ Uli iro, aap kite, ali aap keringa engan ke kawan malaikat iye ngeliling runa, 4 makhluk, ali kawan tuha-tuha iro. Ali keeh deo dali beribu-ribu, belantak puluhan ribu, ¹² bepaner ali engan iye wale, "Ahan lei Anak Domba, iye apu na semalis iro, naan kuasa, ali penatau, ali pengentaru, ali pengegalak, ali hormat, ali kebuen badi, ali na peragah. ¹³ Uli iro, aap keringa ke tiap makhluk iye naan tei surga, ali iye tei munan tana, ali tei mat tana, ali tei laut, ali tei suang, kawus iro ngemaner, "Di Na iye tuet tei munan runa, ali di Anak Domba, kawus peragah, hormat, kebuen badi, ali kuasa mpe kengola iye!" ¹⁴ Ali, 4 makhluk iro ngotus, "Amin"* ali kawan tuha-tuha sujud nyang nyemah.