¹ Uli ke ro, aap kite erai jaweng betengau tei surga, ali engan deh, iye aap keringa nget engan trompet bepaner ali aap, ngulek, "Mengket lei tong he ali Aap sagar petendre ntong ko se iye sa ahan sa be pengejaji uli ihe." ² Kede iro ade, aap na kuasai Juus* ali ite lei, erai runa naan tei surga nyang Erai konge tuet tei munan runa iro. ³ Ali, Da iye tuet tei munan runa iro, tereite nget batu permata yaspis nyang sardis; ali naan erai pelangi tei geliling runa iro iye tereite nget zamrud. ⁴ Tei geliling runa iro naan due pulu opat runa ali tei munan runa-runa iro aap kite due pulu opat tuha-tuha* tuet, nelang makai jubah bura nyang mahkota-mahkota amas betunang tei utek dali. ⁵ Ali, ke runa iro losek kilat wewereu nyang gerugum engan guntur. Ali, naan turu dian iye dolan tei muka runa iro, iye naan lei turu Juus Allah. ⁶ Ali, tei muka runa iro ade naan se aran nget lautan kaca, nget kristal. ⁷ Makhluk iye pengeone nget leen singa, ali makhluk iye kedue nget leen lemu upo, ali makhluk iye ketolu be wae nget wae meresia, ali makhluk iye keopat nget tempulu benia iye desung mensiling. ⁸ keopat makhluk iro asing-asing naan onum ilar iye ponu ali mate, me tei lepes ongon mpe ade suang iye; jolo nyang malem, keopat makhluk iro sa pini ua ngotus, "Berasih, berasih, bersih lei Tuhan Allah Iye Mahakuasa, iye apu naan, iye naan, ali iye sagar sulet." ⁹ Ali, denu makhluk-makhluk iro ngokoi kebuen badi, hormat, ali ngotus syukur nengkawe Da iye tuet tei munan runa, iye bolum mpe kengola iye, ¹⁰ kedue pulu opat tuha-tuha iro sujud te one wae Da iye tuet tei munan runa iro, ali nyemah Da iye bolum mpe kengola iye iro, ali nimai mahkota dali tei muka runa iro nelang bepaner, ¹¹ "Oi Tuhan nyang Allah kemali, Ko layak mahan kebuen badi, hormat, ali kuasa leka ko apu ngene se aran iye ali leka aga-Ko kawus iro naan nyang na ene."