¹ Uli iro, aap ketinep kede Anak Domba nengau erai ke turu segel iro, ali aap keringa erai ke opat makhluk iro bepaner ali engan iye nget guntur, "Ntong he!" ² Belalu, aap kite erai kuda bura ali da iye tue munan iye mege erai ti panah; ali erai ti mahkota na okoi ntong da, ali da maju dian pekaleh nyang pekuret. ³ Ali, kede Anak Domba iro nengau segel iye kedue, aap keringa makhluk iye kedue bepaner , "Ntong he!" ⁴ Belalu, maju lei erai keikui kuda bali bewarna mea nget dolan apui, nyang da iye tuet tei munan iye na okoi kuasa dian ngepe kedamaian ke munan tana mpe meresia sagar mengkebunu, nyang erai bila pedang iye solai na okoi ntong da. ⁵ Ali, kede Anak Domba iro nengau segel iye ketolu, aap keringa makhluk iye ketolu bepaner, "Ntong he" Belalu, ap kite erai keikui kuda metem nyang da iye tuet tei munan iye desung mege erai ti timbangan tei kami da. ⁶ Belalu, aap keringa nget naan engan ke botuk-botuk keopat makhluk iro bepaner, "Erai supak gandum dian 1 dinar, nyang 3 supak salai dian 1 dinar, tapi iya ngerusak minyak nyang anggur iye!" ⁷ Ali, kede Anak Domba iro nengau segel iye keopat, aap keringa engan makhluk iye keopat bepaner, "Ntong he" ⁸ belalu, aap kite erai keikui kuda bewarna jereu burei nyang da iye tuet tei munan iye be aran Maut nyang Hades demasu da. Ali, kuasa na okoi ntong dalimunan 1/4 tana, dian munu ali pedang, lau, penyakit, nyang setua iye rusi tei tana. ⁹ Kede Anak Domba nengau segel iye kelime, aap kite tei mat altar* jiwa-jiwa dali iye apu na bunu leka engan Allah nyang leka kesaksian iye apu na penahap dali. ¹⁰ Dali ngulek ali engan wale, "Seno kengola iye eso, Tuhan iye berasih nyang bene, Ko sagar nahan unuk ke ngehakimi nyang ngebales daya kemali ntong dali iye nono tei tana?" ¹¹ Ali, ntong asing-asing jiwa iro na okoi erai ti jubah bura nyang dali ketoan mpe dali sa ahan sa beranai erep-erep eso, mpe kedeo kawan pelayan nyang kawan uyang dali iye sagar na bunu nget dali jaji ganap. ¹² Ali, kede Anak Domba iro nengau segel iye keonum, naan gempa tana iye tamam, mate olo jaji metem nget kain karung iye na ene ke balo nyang kawus bulan nget daya. ¹³ Ali, deo sentomoi tei langit lotu ntong tana nget tonga ara pelotu kawan bua iye nta kede na kukui ene enus iye daras bene. ¹⁴ Ali, teboka lei* langit nget buku iye na gulung, ali sesenu gunung nyang pulau na ensor ke runa iye. ¹⁵ Maka, raja-raja tei tana, ali kawan ulun tamam, ali ulun-ulun tatau nyang naan kuasa, ali kawus budak, ali ulun bebas mensiok tei liang-liang ali tei ekang batu-batu tei pegunungan. ¹⁶ Dali bepaner nengkawe gunung-gunung nyang batu karang iro, "Runtuh lei nipan kemali ali siok aa kemali ke hadapan Da iye tuet tei munan takhta, nyang ke pemereket Anak Domba! ¹⁷ Leka, olo solai di nali kune reket apu sulet ali dase iye tau betahan?"