¹ Uli kero, aap kite langit iye kado nyang tana iye kado. Leka, langit iye pengeone nyang tana iye pengeone apu jaweh; nyang laut ade apu beloh eso. ² Belalu, aap kite jaa iye berasih, Yerusalem Kado, dolui ke langit, ke Allah, nyang apu na sade nget penganten bawe bedandan dian bane da. ³ Aap keringa engan iye wale ke takhta bepaner, "Teneng lei, kemah Allah naan tei botuk-botuk meresia. Da sagar nono tei ekang dali nyang dali sagar jaji umat-Da. Allah gales sagar naan tei ekang dali nyang jaji Allah dali. ⁴ Da sagar ngenser setiap elu ke mate dali nyang maut sa sagar naan eso, sa sagar naan eso nare aseng, ngerodoi, atawa kesa nare leka iye ola apu lalo." ⁵ Da iye tuet tei takhta iro bepaner, "Teneng lei, Aap pejaji kawus iye kado!" Ulek-Da eso. "Tulis lei ihe leka kawan engan ihe ahan na percaya nyang bene." ⁶ Uli kero, Da bepaner ntong aap, "Apu sunek! Aap iyee lei Alfa nyang Omega, Iye Tela nyang iye Pengawus. Aap sagar ngokoi isep ntong setiap ulun iye sengo ke sumber pemolum ali cuma-cuma. ⁷ Da iye manang sagar ngewaris kawus iye ihe; Aap sagar jaji Allah da nyang da sagar jaji anak-Ap. ⁸ Tapi sagar iye, dali iye takut, sa percaya, nyang purun; tau munu, ulun-ulun lahung, tukang sihir,* kawan iye nyemah ba ke Tuhan, nyang kawus pereopau, sagar mahan bagian dali suang lautan iye dolan ene apui nyang welirang. Ihe lei pengedate kedue." Yerusalem Kado ⁹ Uli kero, erai ke turu malaikat iye mege turu mansi iye ponu ali turu bencana pengawus iro sulet nyang bepaner ntong aap, "Ntong he lei, aap sagar nundru ntong ko penganten bawe, sao Anak Domba iro." ¹⁰ Belalu, da ngoit aap suang Roh nuju ntong erai bua gunung iye solai bene nyang moo, pelos nundru jaa suci iro, Yerusalem, iye dolui ke langit, ke Allah, ¹¹ ponu ali kemuliaan Allah nyang ama iye nget permata iye rarang bene, nget permata yaspis, lio nget kristal. ¹² Jaa iro naan dining iye solai nyang moo ali due belas jaweng solai. Tei jaweng-jaweng solai iro naan due belas malaikat nyang aran-aran tetulis tei munan iye, iye iro kedue belas suku Israel.* ¹³ Naan tolu jaweng solai tei sila timur, tolu jaweng solai tei sila utara, tolu jaweng solai tei sila selatan, nyang tolu jaweng solai tei sila barat. ¹⁴ Dining Jaa iro naan due belas batu dasei nyang tei munan batu-batu dasei iro tetulis aran kedue belas rasul* Anak Domba. ¹⁵ Malaikat iye bepaner ntong aap iro mege erai ti tungket pengukur iye na ene ke amas dian ngukur jaa iro, jaweng-jaweng iye solai, nyang dining iye. ¹⁶ Jaa iro na ene segi opat, panyang iye sameh ali lebar iye. Da ngukur jaa iro ali tungket da, due belas ribu runa; panyang, lebar nyang moo iye sameh. ¹⁷ Belalu, da ngukur dining jaa iro jatus opat pulu opat siku, ngunau ukuran meresia, iye ade nget ukuran malaikat. ¹⁸ Dining jaa iro na ene ke permata yaspis nyang jaa iro na ene ke amas murni, nget beneng kaca. ¹⁹ Dasei jaa irona ene ali kawus leen se aran permata iye rarang. Batu dasei iye pengeone iye lei batu yaspis,iye kedue batu safir, iye ketolu batu mea, iye keopat batu zamrud, ²⁰ iye kelime batu unam, iye keonum batu sardis, iye keturu batu ratna cempaka, iye kewalo batu beril, iye kesie batu krisolit, iye kesepuluh batu krisopras, iye kesebelas batu lazuardi nyang iye kedue belas batu kecubung. ²¹ Kedue belas jaweng iye solai iro, iye lei due belas mutiara, denu jaweng solai iro na ene ke erai mutiara. Alan jaa iro na ene ke amas murni, nget beneng kaca. ²² Aap beloh kite Runa Allah* tei suang jaa iro leka Tuhan, Allah iye maha kuasa, nyang Anak Domba gales lei Runa Allah jaa iro. ²³ Jaa iro sa perlu mate olo atawa bulan dian pe maa iye leka kemuliaan Allah pe maa jaa iro nyang Anak Domba iye lei lampu iye. ²⁴ Bangsa-bangsa sagar malan suang ama jaa iro nyang raja-raja tei tana sagar ngoit kemuliaan dali ntong suang iye. ²⁵ Kawan jaweng iye solai sa sagar pini na tangkep tei olo jolo, nyang sa sagar naan malem olo tei biduh. ²⁶ Dali sagar ngoit kemuliaan nyang hormat bangsa-bangsa ntong suang jaa iro. ²⁷ Tapi, sa mpe sunah se aran iye sompoi sagar letep ntong suang jaa iro, ade ulun iye purun sa taru leen atawa ngene pereopau, beloh bali je iye aran da tetulis suang Buku Pemolum Anak Domba.