¹ Uli kero, malaikat iro nundru ntong aap sunge danum pemolum, iye beneng nget kristal, salir ke runa Allah nyang Anak Domba ² tei botuk-botuk alan jaa iro. Tei kedue lepes sunge, tumu tonga pemolum nyang naan bua iye tei tiap bulan. Daon-daon tonga iro na pakai dian pebeme bangsa-bangsa. ³ Sa sagar naan eso kutuk, tapi runa Allah nyang Anak Domba sagar naan tei suang jaa iro. Hamba-hamba-Da sagar nyemah Da. ⁴ Dali sagar kite wae-Da nyang aran-Da sagar tetulis tei konat dali. ⁵ Malem sa sagar naan eso mpe dali sa perlu ama lampu atawa mate olo leka Tuhan Allah sagar pe maa dali, nyang dali sagar memerentah mpe kengola iye. Penyulet Yesus Kristus ⁶ Malaikat iro bepaner ntong aap, "Kawus pepaneran ihe ahan na percaya nyang bene. Tuhan, Allah ke roh kawan nabi,* nyiu malaikat-Da dian nundru ntong hamba-hamba-Da se ye harus lekah be pengejaji. ⁷ Dinga lei, Aap lekah sulet! Na berkatilah ulun iye ngeringa pepaneran-pepaneran moko wauh* buku ihe." ⁸ Aap, Yohanes, iye apu keringa nyang kite kawus iye ihe. Kede aap keringa nyang kite kawus iye, aap besujud dian nyemah tei poo malaikat iye apu petundru kawus iro ntong aap. ⁹ Tapi, da bepaner ntong aap, "Iya ngetro! Aap ade lei hamba sama nget ko nyang kawan uyang, kawan nabi, namput nget dali iye ngeringa pepaneran-pepaneran suang buku ihe. Semah lei Allah!" ¹⁰ Uli kero, malaikat iro bepaner ntong aap, "Iya mpe nyegel pepaneran-pepaneran iye moko wauh suang buku ihe leka kede iye apu dini." ¹¹ Dion aa ulun iye ngene daat tatap ngene daat, ulun iye sa suci tatap sa suci, ulun iye ngene bene tatap ngene iye bene, nyang ulun iye berasih tatap ngeberasih unuk da." ¹² Dinga lei, Aap lekah sulet! Ali, Aap ngoit upa-Aap, dian ngebales denu ulun nget pengkoe da. ¹³ Aap iye lei Alfa nyang Omega, Iye Pengeone nyang Iye Pengawus, Iye Tela nyang Iye Sunek. ¹⁴ Na berkati lei dali iye mahuk jubah dali mpe dali naan tonga pemolum iro nyang letep ntong jaa iro lalo jaweng-jaweng iye solai. ¹⁵ Iye tei ongon jaa iro iye lei kawan koko, ulun iye ngene sihir, ulun-ulun cabul, kawan iye tau munu, kawan iye nyemah ba ke Tuhan, nyang ulun-ulun iye ketuju pereopau. ¹⁶ Aap, Yesus, apu nyiu malaikat-Aap dian besaksi ntong kam ali leen kawus ihe tei jemaat-jemaat. Aap lei suli nyang keturunan Daud*, Sang Sentomoi Timur iye maa-meek." ¹⁷ Roh* nyang pengantin bawe iro bepaner, "Ntong he lei!" Dion aa ulun iye ngeringa ihe bepaner, "Ntong he lei!" Dion lei ulun iye sengo sulet; dion lei ulun iye moyo ngepe danum pemolum ali cuma-cuma." Penutup ¹⁸ Aap besaksi ntong kawus ulun iye ngeringa pepaneran petunjuk buku ihe: "Kaye naan iye nameh se aran tei engan pepaneran-pepaneran ihe, Allah sagar nameh ntong Da kawus bencana iye tetulis suang buku ihe. ¹⁹ Ali, kaye naan iye nengkurang se aran ke pepaneran-pepaneran suang buku petunjuk ihe, Allah sagar ngepe bagian da ke tonga pemolum, ke jaa berasih, nyang ke hal-hal iye tetulis suang buku ihe." ²⁰ Da iye besaksi sengkune hal-hal ihe bepaner, "Ooi, Aap lekah sulet." Amin*! Sulet lei, Tuhan Yesus! ²¹ Anugrah Tuhan Yesus nyendro kam kawus. Amin.