¹ "Kepada malaikat jemaat tei Efesus tulis lei: Ihe lei ulek Da iye mege turu sentomoi tei kami sanan-Da ali iye malan tei ekang turu poo dian amas iro: ² Aap ketoan kawus pengkoe ko ali keuyuh-aya nyang kesangkal ko, ngetme ko sa kate nengkawe iye daat, ali ko apu nguji ulun-ulun iye mengaku unuk ye rasul,* tapi sebujur iye dali ba lei rasul, ali ruku lei dali ro palsu. ³ Ko naan kesangkal ali betahan di no aran-Aap ali sa ketaru mole. ⁴ Tapi sagar iye, Aap nyempo ko leka ko apu sa kingat ke kelinga ko iye tela. ⁵ Leka iro, ingat lei ke me ko lotu ali betobat pelos ngene se iye apu na ene ko tela. Kaye sa, Aap sagar sulet ntong ko ali ngepe poo dian ko ke runa iye, kecuali ko betobat. ⁶ Tapi sagar ye, ihe iye tau naan tei ko: ko muar deo pengkoe dali iye siut Nikolaus, iye ade Aap muar. ⁷ Da iye naan kelinge dion lei ngeringa se iye na ulek Juus* nengkawe jemaat-jemaat. Ntong da iye kuret, Aap sagar ngokoi okan ke Tonga Pemolum iye naan tei Taman Allah." Surat ntong Jemaat tei Smirna ⁸ "Ali, ntong malaikat jemaat tei Smirna tulis lei: ⁹ Aap ketoan kenyusah nyang pengurang kam, tapi sepuna ye kam tatau! Aap ketoan tuduhan daat iye na ontuk nengkawe ko ene dali iye ngotus unuk dali ulun Yahudi, sebujur ye ba, je runa Iblis nono. ¹⁰ Iya gaer nengkawe se iye sagar penyaya kam. Teneng lei, setan sagar nimai sesenu ke kam ntong penjara dian kam na uji, ali kam sagar kesa kenyaya kengola 10 olo. Bebuen lei mpe mate, ali Aap sagar ngokoi ntong kam pengebuen pemolum. ¹¹ Da iye naan kelinge oboh lei ngeringa se iye na ulek Juus nengkawe jemaat-jemaat. Ulun iye kuret sa sagar nyaya ene mate iye kedue." Surat ntong Jemaat tei Pergamus ¹² "Ali, ntong malaikat jemaat tei Pergamus tulis lei: Ihe lei engan Da iye naan pedang tarem bemate due: ¹³ Aap ketoan tei kame kam nono, tei runa Iblis naan nono; tapi kam be ege tei aran-Aap ali sa menyangkal iman-Aap belantak kede zaman Antipas, saksi-Aap iye bebujur iye na bunu ke dase kam, runa Iblis nono. ¹⁴ Tapi, Aap nagur kam leka naan sesenu ke kam iye siut ajaran Bileam, iye ngajar Balak dian ngonok ngawer tei hadapan kawan tia Israel*, dian man pengokan iye na payak belantak ntong berhala* ali ngene dosa-dosa hubungan upo bawe. ¹⁵ Ngetro ade, naa sesenu ke kam iye be ege tei ajaran Nikolaus. ¹⁶ Leka iro, betobat lei! Kaye sa, Aap sagar lekah sulet ntong kam ali ngelawen dali makai pedang ke bowa-Aap. ¹⁷ Da iye naan kelinge oboh lei ngeringa se iye na ulek Juus ntong jemaat-jemaat. ¹⁸ "Ali, ntong malaikat jemaat tei Tiatira tulis lei: ¹⁹ Aap ketoan deo pengkoe kam, kebuen ali iman kam, awat -amet kam ali kesabaran kam, ali mpe iye penyunek be pengelewi ke iye pengeone. ²⁰ Tapi, Aap nyempo kam leka kam meladar bawe Izebel iro, iye mengaku nget erai keulun nabiah, nyelatuk ali pe taang kawan uyang-Aap dian mengkoe upo bawe iye sa benunuh ali man pengokan iye apu na payak pansui ntong iye ba ke Tuhan. ²¹ Aap apu ngokoi iye waktu dian betobat, tapi da sa moyo betobat ke pengkoe upo bawe iye sa benunuh. ²² lei, Aap sagar nimai da ntong munan runa turui kenyaya ali dali iye mengkoe upo bawe sa benunuh* ali da sagar timai-Aap ntong suang kenyusah solai, je iye sa dali iye betobat ke deo pengkoe bawe iro. v 23 Ali, Aap sagar munu kawan tia iye ali pengedate; ali kawus jemaat sagar ketoan mpe Aap lei iye nguji pikiran nyang aseng ulun, ali Aap sagar ngokoi ntong kam asing-asing nget pengkoe kam. ²⁴ Tapi, ntong kam bali iye tei Tiatira, iye sa ngunau selatuk ihe, iye male ketoan deo resia Iblis, Aap ngulek: Aap sa sagar ngonok kedoyat bali ntong munan kam. ²⁵ Tapi sagar iye, be ege lei seleur tei se iye apu naan mpe Aap sulet. ²⁶ Ali, ntong ulun iye kuret nyang ngene koe gawi-Aap mpe sunek, Aap sagar ngokoi kuasa munan deo bangsa, ²⁷ ali dali sagar memerentah deo bangsa iro ali tungket besi, na perapai poleng poneng nget keramik tukang ene runa setonok, leka Aap apu ade mahan kuasa ke Ma-Aap. ²⁸ Ali, Aap sagar ngokoi ntong da sentomoi timur. ²⁹ Da iye naan kelinge oboh lei ngeringa se iye na ulek Juus ntong jemaat-jemaat."