¹ iye sareh ke Yesus Kristus, iye na okoi Allah ntong-Da dian na petendre ntong kawan uyang-Da munan se aran ye lekah sa ahan sa bepengejaji. Yesus Kristus ngokoi engan ye sareh ihe lalo malaikat-Da dian na pekempe ntong Yohanes, uyang-Da. ² Yohanes apu jaji saksi engan Allah ali ade Yesus Kristus, munan deo se aran ye iye apu na ite da. ³ na berkati lei ulun iye membaca ali engan wale firman moko wauh ihe ali na berkati leiade dali iye ngeringa ye ali ngene se ye tetulis tei suang ye, leka kede ye apu dini. Salam Yohanes ntong Keturu Jemaat tei Asia ⁴ Ke Yohanes, ntong keturu jemaat iye naan tei Asia. ⁵ ali ke Kristus Yesus Saksi iye bebujur, iye pengeone buet ke ekang ulun mate ali Penguasa munan raja-raja tei tana. Di Na, iye ngerereu taka ali ngelapas taka ke dosa-dosa taka ali daya-Da, ⁶ nyang apu pejaji taka dian jaji erai kerajaan, imam-imamdi no Allah nyang Ma-Da, di Na lei kebuen badi ali kekuasaan mpe kengola iye! Amin.* ⁷ Teneng lei, Yesus sulet ali awan-awan, ali sesenu sagar kite Da, belantak dali iye apu nowek-Da ; ali kawus bangsa tei tana sagar ngerodoi leka Da. Iye, ihe sagar pengejaji! Amin. ⁸ "Aap iye lei Pengeone nyang Pengawus, firman Tuhan Allah, Iye apu Naan, ali Iye sagar Sulet, Iye Mahakuasa." Pengite Yohanes munan Anak Meresia ⁹ Aap, Yohanes, uyang ali sesama kam iye siut suang kenyaya, suang Kerajaan, ali suang kesangkal tei suang Yesus, naan tei pulau iye na otus Patmos leka firman Allah ali kesaksian Yesus. ¹⁰ Aap na kuasai Roh* tei Olo Tuhan, ali aap keringa engan wale ke odi lutuk aap nget engan trompet, ¹¹ iye bepaner, "Tulis lei kawus iye ite ko ntong suang erai kebua buku ali kirim iro ntong turu jemaat: Efesus, Smirna, Pergamus, Tiatira, Sardis, Filadelfia, ali Laodikia." ¹² Belalu, aap sekelap dian neneng engan iye bepaner nengkawe aap. Kede aap sekelap, aap kite turu poo dian amas, ¹³ ali tei botuk-botuk poo dian iro, aap kite erai keulun nget Anak Meresia,* nunang jubah mpe ntong poo ali erai selempang amas tei dada-Da. ¹⁴ Utek ali balo-Da bura nget bulu domba, sebura salju; ali mate-Da nget dolan apui. ¹⁵ Poo-Da mileu nget tembaga iye ngebaye suang dolan apui nyang engan-Da nget gemuruh danum solai beduru. ¹⁶ Tei kami sanan-Da, Da mege turu sentomoi ali ke bowa-Da losek erai bila pedang tarem be mate due, ali wae-Da maa nget mate olo iye desung langet. ¹⁷ Kede aap kite Da, aap tempong tei poo-Da nget ulun mate. Tapi, Da ngonok kami sanan-Da tong munan aap ali bepaner, "Iya takut; Aap lei Iye Nyentela ali Iye Pengawus, ¹⁸ ali Iye Bolum. Aap apu mate, tapi teneng lei Aap bolum mpe kengola ye, ali Aap mege kunsi maut ali kunsi Hades. ¹⁹ Leka iro, tulis lei se aran iye apu na ite ko, ali se aran iye sagar be pengejaji uli iro. ²⁰ Ihe lei resia munan turu sentomoi iye na ite ko tei kami sanan-Aap ali turu poo dian amas iro. Turu sentomoi iro iye lei dali malaikat ke turu jemaat; ali turu poo dian iro iye lei turu jemaat."