¹ Ali , begawi sendro Da kain ade ngeharap ko dian sa nerima anugerah Allah ali sia-sia. ² Leka, Da berfirman: " Suan Ab berkenan, Ab ngeringga ko, ali suang keselamatan, Ab ngawat ko." Na perhati nehe ye alo ye bekenan iro. Perhati, nehe ye alo keselamatan iro. ³ Kain sa ngakoi sandungan tong dase lei dian pelayanan kain sa na cela, ⁴ je suang segala macam kain nundru unuk kain nget pelayan-pelayan Allah, diamponu ketabahan suang kawus deo masam kesusahan, kesesakan, kesukaran, ⁵ pupuk, na ueng penjara, kerusuhan, mengkoe bahimat, sa turui, keketlau, senur, ⁶ ali ponu kemurnian pengetoan, kesabaran, kemurahan, Roh Kudus kasih ye tulus, ⁷ pander ye bene, kuasa Allah, senjata kebenean te kami sanan ali sei, ⁸ kemuliaan ali kehinaan, sumpah serapah ali pujianna ulek nget nipu-nipu padahal kain bene. ⁹ Kain nget sa napentaru, et terkenal; nget ye kakan mate, et na teneng, kain bolum; nget ulun ye na siksa, et sa na bunu; ¹⁰ Nget nare aseng, et seleur ego, kain susah, et ngene ulut bali tatau, eloh naan se se, et naan segala ye. ¹¹ Kain apu nengau bowa kain tong ko, hei ulun Korintus, ate kain tebuka solai. ¹² Ko sa na batasi ene kain et ko na batasi ene ate ko gegales. ¹³ Nehe, dian balasan ye sama --ab bepander nget tong tia-tia ab- tengau ade ate ko solai-solai. ¹⁴ Ya jaji pasangan ye sa beimbang ali ulun-ulun ye sa percaya. Leka, sesameh ye naan ye bene ali kejahatan? ali, sesameh se ye suang maa ali dendem? ¹⁵ Kesepakatan se ye na tempuun ene Kristus ali Belial? bagian se ye naan te ulun percaya ali ulun ye sa percaya? ¹⁶ Ali, kesepakatan se ye naan te belai sembayang ali berhala-berhala? taka ye belai Allah ye bolum, nget Firman Allah , " Ab sagar nondo te suang dali ali malan sendro dali, ali ab sagar jaji Allah dali, ali dali sagar jaji umat -Ab ¹⁷ "Leka iro, keluar ko ke butuk dali, ali bepisah," ulek Tuhan. "Ali ya mege se ye najis, dian Ab sagar nerima ko." ¹⁸ "Ali, Ab sagar jaji Ma ko, ali ko sagar jaji tia-tia Ab upo ali tia Ab bawe," ngendro Firman Tuhan, ye Maha Kuasa.