Pelayan-Pelayan Perjanjian Kado Allah ¹ Se ihe kain tela ketamam unuk kain gegales? Se, nget sasenu ulun, se ihe kain memerlu surat pujian dia ko ali neke ko. ² Ko ye surat kain, ye na tulis suang aseng kain, ye na katawani, ali na baca ene kawus ulun. ³ Ko nundru nget ko ye surat Kristus ye na layani ene kain, ne surat sa ali tintah, et, ali Roh Allah ye bolum, sa te moloh-loh batu, beloh bali te loh- loh ate meresia. ⁴ Keyakinan nget ihe ye naan suang kain tong Allah lalo Kristus. ⁵ Sa berarti kain, ali unuk kain gegales, sanggup nampelor nget hal be asal ke unuk kain gegales, et kemampuan kain be asal ke Allah, ⁶ ye apu ngene kain kate jaji pelayan-pelayan perjanjian kado, sa nget urutan hurup, et ke Roh, leka urutan iro nampate, et Roh namolum. ⁷ Leka, aka pelayanan ye ngoit tong mate, ye ali hurup-hurup ye na surat te loh batu iro sulet ali kemuliana, empe bangsa Israel eloh kate neneng wae Musa leka kemuliaan iro, naan hal kede iro kemuliaan ye apu kubas, ⁸ sa sih pelayanan Roh naan kemuliaan ye lewi solai eso? ⁹ Leka, aka pelayanan ye ngoit hukuman naan kemuliaan, ye pengesolai pelayanan ye bene iro melimpah suang kemuliaan. ¹⁰ Se bene ye se ye tamam mulia, suang hal ihe sa eso na mulia, leka naan kemuliaan ye tamam eso. ¹¹ Leka iro, aka ye kubas iro sulet ali kemuliaan, ye tamam eso ye kekal iro suang kemuliaan. ¹² Leka naan pengharapan ye nget ihe, kain makai ke ronu solai, ¹³ ali sa nget Musa, ye ngonok selubung te wae da dian tia-tia Israel sa tau kite pengawus neke se ye kubas iro. ¹⁴ Leka, pikiran dali apu tetutup. empe alo ihe, suang pembacaan perjanjian ye ane, selubung ye tatap na engkat leka je te suang Kristus selubung iro ahan na engkat. ¹⁵ Balantak empe olo ho, kede kitab Musa na baca, selubung iro nutup pikir akal dali. ¹⁶ Leka, kede erai ulun mulik tong Tuhan, selubung iro sagar ne engkat. ¹⁷ Tuhan ye Roh ali runa Roh Tuhan hadir, te biduh naan kemerdekaan. ¹⁸ Ali, taka kawus, ye ali wae sa beselubung mencerminkan kemuliaan Tuhan, desung na ubah tong gambar ye sameh kemuliaan tong kemuliaan sameh nget Tuhan, ye iro Roh.