¹ Mumanyima noeyi monimona mañeloi mane anemana mu ma mbango mane nokaye, ana kwateele likuya line lya kaye. Keongao kokuna kuya-likuya pa kaye,kapa Muliwate,kapa ku sitondo. ² Keo nonimona liñeloi likwalyo,litunda ku musila liiwa, linakwa teele liswayo lyo Mulimu no kuyoya. Mono likuwela onene,ku mañeloi mane ao na piwa omaata no kusinya okaye,na liwate; ³ Noliamba ngao komuna sinya okaye,kapa liwate,kapa sitondo kutwala apa mbotu saya abeleki a Mulimu wetu pa lupala lwoo. ⁴ Keo noni yuba opalo thaao na kwata omaswayo a Mulimu palupala lwoo 144,000, Naswaiwa mumishobo thoshe tha aanu a Isilaele. ⁵ Mumushobo wa Juda mono ku swaiwa 12,000, mu mushobo wa Rubeni 12,000, mumushobo wa Gadi 12,000, ⁶ mu mushobo wa Asere, 12,000, mu mushobo wa Nafetali 12,000, mumushobo wa Manase 12 000, ⁷ Mumushobo wa Simoni 12 000, mu mushobo wa Levi 12 000; mumushobo wa Isakare 12 000, ⁸ Mumushobo wa Zebuloni 12 000, mumushobo wa Josefa 12 000, mumushobo wa Benjamine neli 12 000 na swaiwa mo liswayo. ⁹ Mumanyima weyi inu mono ni topeela, Keo nimona aa angi ambula kutwesa munu kuatala akutunda muma tunga oshe,mi mushobo,thoshe tho aanu na mumasika ane mana poso no lubona na poso tho ngunyana. Mwano kumanga ito ikenu kame mwana kwateele mitai thamashako mumakaa oo, ¹⁰ kame mwana kuweela na mai akutambekela ngao, ''Kuyoisiwa kwa tunda kwa Mulimu wetu,oyu natoomana pa libona na ku ngunyana!'' ¹¹ O mañeloi oshe mwanemana ku thengeleka olubona na akulu naibupiwa ine yo kuyoya, keo angwitha omapala oo poso tha lubona kulapela Mulimu, ¹² mukuamba ''Amen! Tumbo na Kanya nautali na uitumelo,likute na ulena, maata yoshe ya kwongothitha Mulimu wetu o ola thoshe ''Amen''! ¹³ Keo omweya kwa akulu mona pilula ngao, ''aa ana kumanga oito ikenu akaani kame atunda kupi?'' ¹⁴ Keo nimwaalaba ngao; ''Mulena wange, ''walimuka,'' keo no amba okwange ngao, aa onyiko ana tundu mukunyandithiwa kunene, anakushu oyapalo yoo na kuikenisa mu unyinga wo ngunyana. ¹⁵ Mwelyo libaka,lyonyiko anemanene poso tho lubona lwa Mulimu,na kumulapela mushinonga nausiku mu tempele thaye. Oyu na toomana mulubona mbo bapula otende thaye peulu thoo. ¹⁶ Mba shemwa kufanthala,kapa liwila kame. Oliiwa mbolishemwa kutwela peulu thoo, kame njeko mwenyanena mbo wa tumbeka. ¹⁷ Kakuli ongunyana oli mukachi kolubona mboikala mulisani woo. Mbo kaatwala ku mawelu welu no meyu no kuyoisa. Mulimu mbo asikumuna omiothi kumeo oo.