¹ Mu manyima nei yoshe keo ni yuba mulumo wa lii linene lya kupana kwanu angi-angi a kuwilu ethana ngao, "Alleluya. Kuyoya, ukenu na maata yoshe ya Mulimu. ² E mi atulelo thae tha thikuma kame tha mulao, kakuli ona atula o liule o mukulu oyu naulu kweta e litunga lyoshena uule waye. Kame ona pesula o unyinga no apikaye kutunditha mu likaa lyaye." ³ Kame aamba ko wili: "Aleluya! O munthe wa fwitana kutunda okwaye e nako thoshe ku twala ku maulu numbo." ⁴ Akulu makumi meeli na ane na ibupiwa ine ya ngwela pashi na ku lapela Mulimu, oyu no ikala pa thipula thae, keo amba ngao, "Ameni. Aleluya!" ⁵ Keo e lii lipana ku thipula thae, na kwamba ngao, "Tukutumele kwa Mulimu wetu omwe mwoshe mwa pikaye, omwe mwoshe no ku mwiyapa, mwoshe nombulo utokwa na no maata." ⁶ Keo ni yuba wendi mulumo wa mai wa anu angi, no kufeka na mulumo wa meyu akuwelauka, kame wa ku kufeka na mishisha tha mvula, thiamba ngao, "Aleluya! Kakuli Mulena a busa, Mulimu wetu, o busa yoshe. ⁷ Tu wapele enene na ku tabela kame tu mupe na kanya thae kakuli e liwetha lyo Ngunyana lina kumu, kame no yu lamiwa ona ku tukisa. ⁸ Mone tanithiwa ku ku manga mu ito ya kwetha kame ikenu."(eline likenu tho mikwa thikenu tho anu no kukena a Mulimu). ⁹ E lin'eloi mono lini ambela ngao, "On'ole eyi: Akufuyawethiwa oshe ane thaniwa ku liwetha lyo Ngunyana." Kame keo amba ngao, "Aa mai a thikuma a Mulimu," ¹⁰ Keo ni ngwela pashi pa maulu aye na ku ju lapela, keo ni ambela ngao, "Oteneke eyutenda! NA me no mubeleki wendi owe na apoye a mamela e niti tha Jesu. Mu lapele Mulimu, kakuli o upaki wa Jesu wonyio moya wo thipolofita ¹¹ Keo ni mone liwilu li shokoloka, keo ni topela na ku mona o mbii o mukenu. No yu no muthina ethaniwa wa ku sepaala kame wa niti. Kakuli oye wa ku kon'ela o mulao mu ma katulo na mu ita yaye. ¹² A meo aye akufeka litumbutumbu lya mulilo, kame pa mutwi waye pekala mishukwe thingi. Akwata lithina lina n'oliwa okwaye elyo no mbulo ku limukiwa ku munu yoshe kendi oye. ¹³ Mwa ku manga mukanjo no lombiwa muunyinga, kame lithina lyae ethaniwa lii lya Mulimu. ¹⁴ E iita no kuwilu mo no inu kon'ela ina thini pa ambii akenu, ana kumanga maina makenu kame ana kushiwa thiwana. ¹⁵ Mukanwa kaye mwa pana mukwale wa kutwa owa na temitha pashi a matunga, kame mwawiya ku busa na mulamu wa thikuwo. A lyatangela mu sitabelo tho veine tho ulume wa Mulimu o munene. ¹⁶ O kwite lithina lina n'oliwa pa thiapalo thaye na pa mutumbu waye: "Mulena wa malena." ¹⁷ Na mona lin'eloi linemana mu kamwe. Lyethana mu lii linene na kukuwa ku iyunyi ei no ituka-tuka muwilu, "Muwiye, mukuwane ku mukiti o unene wa Mulimu." ¹⁸ Muwiye mulye e nyama no malena, e nyama no ambii na ya no kwitukisa ambi na nyama tho anu oshe, anu ngeya na apika, ano mbula kubaliwa naya no maata. ¹⁹ Na mona thianthama na malena no litunga na ita thayo. A ku wanatheka a thaela ku lwitha oyu no pana pa mbii na ita yaye. ²⁰ E thianthama mono thi kwatiwa pamweya na mapolofita no wata natenda a mapipimo pa lupala lwaye. Aya mapipmo onyiyo na ongitha aya na amwela e thisupo thianthama na ku lapela e siswaniso thae. Oshe aili keo a yumbeliwa mu lithiya no mulilo wo silufula. ²¹ O ungi wo woshe mono wipaiwa na mukwae no upana mu mulomo woya no thina pa mbii. keo e iyunyi yoshe ilye nyama tho.