¹ Elimweya no mañeloi no mutanu na meeli elyo no likwata o tuula no mutanu na twiili keo li wiya ku ni ambela ngao, ''Owiye nikumonithe oku nyasiwa oku no mukulu no liule elyo lina tomana pa meyu a mangi. ² Oyo okwaye a malena no pakaye a natwese ku tenda ou ule mane na waine nou ule waye oungi no pano pa kaye ana twese kunwa.'' ³ Keo e liñeloi li ni twala na Mepo Ethikenu mu liyungu,keo nikamona o mukathi yona tomana pa Sianthama e sikiu eso sikwite aa mathina no kanyaso. E sianthama mono sikwata mitwi mutanu na thiili na manala likumi. ⁴ O mukathi oyo no kumanga e yapalo no shombo na ikiu na ku kwata e mikabo na gaunda,na mawe no utokwa,na yoyi no matonolo. Mwana kwata mu makaa aye e sinwiso no gauda no kumba einu e inyangunyu mane na mathilo no uule waye. ⁵ Palupala lwaye ku na ñoliwa e lithina no tahiso no ka kuwoleka; ''Babilona no maata, Oinawa no maule oshe mane na inu yoshe no ku nyasala no pano pa kaye.'' ⁶ Keo nimona ngao o mukathi ona pende ka bakala o unyinga no ana Mulimu no a paki a Jesu. Apo no ni mu mona,mono ni komoka yonene. ⁷ Kono e liñeloi keo liniambela ngao, 'Ike apo o komoka ngeyo? Moni ku tonweela e taluso no mukathi oyu no ku kuoleka mane na sianthama eso sina shimbi o mukathi e sianthama eso sikwite e mitwi tho mutanu na thiili na manaka likumi. ⁸ E sianthama no mona no kuyoya ko siyoya ngeno kao,mane sitamba ku bumbuka mu likwina e linoñi yonene. Keo mo sitwaliwa ku kepaiwa. Keo oshe awo ayoya pano pa kaye,na oshe awo a mathina oo kaiñoliwa mu buka no upilo kao ku tateka ku matatekelo no kano kaye-mba ku komokela ku mona ngao e sianthama,kakuli no sikalako, mane pano ko siliko kao, kame mane mbo siya. ⁹ Monyiko ku saeliwa o munano no unanganu. E mitwi tho mutanu na thiili e maena malundu mutanu na meeli apo oyo mukathi ana tomana. ¹⁰ Kame onyiko a malena mutanu na meeli. Malena mutanu anangu,Omweya ayoya, O mukwaye njekale eye,mane apa eya,a swanela ku tatela kanyonyo. ¹¹ E sianthama eso no sikala,mane pano njeko kono yo mulena no mutanu na twiili mane atha ku ku ipaiwa. ¹² Omanaka likumi no mona malena likumi awo anakana kale kupia o mubuso,kono mba piwa maata ngao malena muola thimweya na sianthama. ¹³ A malena a munano umweya,mane apisa kame a maata oo na kwendisa ko kwesi sianthama. ¹⁴ O mba leta ndwa mukachi koo na ngunyana. Kono o ngunyana mbo akoma kakuli oye yo Mulena no malena-mane ali naye o nyiko a nesaniwa,ku ketiwa,mane na no ku luka.'' ¹⁵ E liñeloi keo liniambela ngao, ''Omeyu no mona,awo o liule apo ana tomana, oshe anu,litunga na mulonga,matunga,na mishobo. ¹⁶ A manaka likumi no mona-oshe na sianthama mo ikuthimba na liule. Mwa mutubula na ku musiya sheshe,mbo miniwa wishu,mane mba mu tumbekela na mulilo. ¹⁷ Kakuli Mulimu ona paka mu michima thoo ngao a shimbe o mulelo waye kwitana ku tubula a maata oku busa no sianthama kupitela o mai a Mulimu mba ku taleletha. ¹⁸ O mukathi nomona neli muleneñi ou ukwite a maata no kubusa peulu no malena no kano kaye.''