¹ Jesu mwana ingena sisepe, na kuupuka kuza shambwaliya, ke owiya mu munzi waye. ² Mumone, ke a muletela mununo kukutela lutu wa mulume nashindama pa musheme apa na mona o tumelo zowo, Jesu ke waamba ku mukwa kukutela lutu, "Mwanange no mulume, o ku ongoze, o uyi woye una swalelwe." ³ Mumone, a mweya no An'oli a kwa ambaulisa mukaci kowo, "Oyu mulume a shwaula." ⁴ Jesu no limuka a makengezi a mu mucima wo ke waamba ngao, "Ike apa mukengela uyi mu micima zenu? ⁵ Kanti o soto sipi, kwamba ngao, 'O wuyi woye u na swaleliwa, 'kamba kwa amba ngao, 'O yinguke o ende'? ⁶ Kono pa kwamba ngao mulimuke Mwana Munu a kwata maata pano pa kaye a ku swalela uyi, ..." ke waambela mukwa kukutela lutu, "O inguke, oshimbe o musheme woye, ke oze ku nzuwo zoye." ⁷ Keo o mulume o inguka na kuza ku nzuwo zaye. ⁸ Keo sicaba apa no simona eyi, mwa na iyapa na kulumba Mulimu, oyu napu a maata nongeyo kwa anu. ⁹ Jesu apa naenda kutunda kuya, mwa na mona mulume o i saniwa Mateu o natomana pa tende no musebezi wa utelisi. Ke waamba o kwaye, "O ni kon'eele." O imana na ku mu kon'eela. ¹⁰ Jesu apa natongomana kulya munzuwo, ka mumone, ako kutelisa angi natendi no uyi a ingena kulya na Jesu pa mweya na alutiwa aye. ¹¹ Apa Afalisi namona ngeyo, na amba kwa alutiwa aye, "Ike apa muluti wenu alyanga na atelisi pamweya na ayi?" ¹² Keo Jesu apa nayuba ngeyo, ke waamba, "Anu a na kuingula siwana mulutu ka saa nganga kao, keti aya a kuli. ¹³ Muze mu ka kutute ei talusa: 'Na saela sishemo isin'i sitabelo? 'Kakuli inashimwa kuwiya kuisana awa kuku baka, kono ayi." ¹⁴ Ke alutiwa a Joani awiya okwaye na kuamba, "Ike otwe na Afalisi apa tuku yumenanga ilya tungi-tungi, kono alutiwa woye ka kuyumenanga kao?" ¹⁵ Jesu ke waambela, "Kana ana no mulami nga lile oko mukwa kulama oshili nowo? Kono maiwa awiya apo mulami mwatunda okowo ke kame mwa kuyumena ilya. ¹⁶ Njeko munu wa paka sikamba sipya pa sito no kale, kakuli siya sikamba mo siyatuka paya pa sito ke o limbwatu lyateni mo linenepa na kupita. ¹⁷ Kame anu kapakanga veine zipya mu sishimbelo no sipapa sakale. Endi mwatenda ngeyo, o sishimbelo no sipapa mosiyatuka, ke o waine mo u mwahala, siya sishimbelo no sipapa mo sisinyeya. Kono, mwa pakanga ziya waine zipya mu sishimbelo no sipapa si shikuyuba, muwili wayo moi zwelapili kuikala siwana." ¹⁸ Jesu apa na mbaula eyi inu o kowo, ke mumone, neo kuwiya musole mukulu ku kubama okwaye. Ke waamba ngao, "Mwanange wa mukazi pano bene pendi a tokwahale, kono o wiye opake o likaha lyoye o paye, ke mwa yoya." ¹⁹ Keo Jesu o nanuka na ku mukon'eela, monyiko na tendela na alutiwa aye. ²⁰ Mumone, mukazi no kataziwa sikolo no kuwoyanga unyinga pa myaka likumi na mbil ke okwata ku mungundo wa sito saye. ²¹ Kakuli mwa na ku ambela mu mucima waye, Ni shi kwata ambu ku sito saye kunapu mo ni pala." ²² Kono Jesu o kutemuna na ku mumona, na kuamba, "Mwanange wa mukazi , o ku ongoze; o tumelo zoye zina kupalisa." O mukazi no pala kutunda bene pezo nako. ²³ Apo jesu na wiya munziwo za musole mukulu, mwa namona, mukwa kushika o sin'wan'wa na sicaba oko atenda muyoyo ungi. ²⁴ Ke waamba, "Mupanene panze, kakuli oyu mwaikana ona imwa kufa kono ona lala ambu." Ke a musheununa na ku musheka. ²⁵ E sicaba apa nesimana kutundela panzi, ke o ingena mu musiyo na ku kwata sizimbi ku kwooko, ke mukazana o i nguka. ²⁶ O siyambo nesi nositendahala ke si ya nduluka ku yubaala muibaka yoshe. ²⁷ Jesu apa na pita kutunda oko, anu a yili no kufa mewo ke a mukon'eela. Mwa na kuwanga ngao, "O tuyubele n'eke, mwana Davida!" ²⁸ Jesu yona ingene munziwo, ako kufa mewo ke awiya okwaye, Jesu ke waamba okowo, "Kana mwaitana ngao na twesa ku miyoyisa?" Ke a mutambula, "Ndaa, molyetu." ²⁹ Ke Jesu okwata mewo na kuamba ngao, "Kutendahale ngeyo okwenu kuza mu tumelo zenu," ³⁰ ke o mewo oo atona. Ke Jesu wa laela katata na ku ambela, "Mumone ngao njeko munu otamba kulimuka." ³¹ Kono ao alume ayili ke aza na kutonola esi syambo koshe koshe. ³² Apa alume aili ali mu mwendo wa kuza, mumone, simumu nosi ikala na mepo zyinyangunyu ke siletiwa kwa Jesu. ³³ O mudimona apa una tundisiwa, simumu no mulume ke sitwesa ku amba. O sicaba mo sina komoka na kuamba ngao, "Shamba kwatanga ku moniwa o u mwikaelo mu Isilaele!" ³⁴ Kono Afalisi mwaamba, "Oyu mwendisi wa madimona, onyiko maata a tundisa madimona." ³⁵ Jesu ke wenda mu minzi na matolopo oshe. Mwa na zwelzpili kuluta mu ma sinagoge owo, ku kutaza yambo no mubuso na kupalisa mifuta zoshe no ikola. ³⁶ Apa na mona o nyangela, ke wa yubela n'eke, kakuli mwa na kunyenga na ku oyoka. Mwa naikala shinani angu no kutaama mulisani. ³⁷ Ke waambela alutiwa aye, "Kutulo zingi, kono akutuli anyonyo. ³⁸ Ke ngeyo mulapele wangu ku minya kutulo, ili nga atwese kutumela a beleki angi mowu musebezi wa ku kutula."