¹ Metho nako no kuwiya ''Joani omukolobethi,kuno yo kutatha'' Mu lialaupa lya Judea, ² Na kwambaula ngao, ''Mubake kakuli o mubuso noku wilu we kala pepi.'' ³ Kakuli oyu yonyiko na tonolanga Mupolofita Isaya ngao; ''Yonyiko no lii elyo lilungwala mu lialaupa; ''Mulukise e mikwakwa tha Mulimu;mu pake a Mapitelo ae ngao a shungame.'' ⁴ Joani mwa na ku manganga mu yapalo no woya no kamele,na mukanda no sipapa mu mbunda;mane eilya yae neli mbimba na uki. ⁵ Keo Jerusalema,Judea yoshe mane na sibaka soshe ku thunguluka Jodani keo siya okwae. ⁶ Keo oshe mwa na kolobethiwa okwaye mu lyambai lya Jodani,ku o aku tonola e ibi yoo. ⁷ Kono apa na mona Oungi no Mafalisi na Masanduki eya ku kolobetho thae keo oambela ngao, ''Omwe mwana no a mili! oyu na mi limukisa ngao mwituke ku wali na kwiya anii? ⁸ ''Kona kuli mu twese mukwate yuyanu iwa-iwa mu upilo wenu ku kwenekela na kubaka kwenu. ⁹ ''Kame ko muna nana na kwamba ngao, 'Tukwite Abrahama o Iwetu. 'Kakuli na mi ambela ngao, Mulimu atwesa ku kulisa lusika lwa Abrahama ku lu tundisa pa mawe. ¹⁰ ''Keo na thino nako,akamo kana shendekiwa ku mithithi no itondo. Ngao esitondo soshe sikana kushema yuyana sitemiwe na ku yumbeliwa mu mulilo. ¹¹ ''Mo ni mi kolobetha na meyu mu kachi no kubaka,kono oyu wiya mu nyima thange okwite mata manene ku nipita,e sikatulo sae konitwese ku siendisa kao. Mweya kumi kolobetha na Mepo Ethikenu na mulilo. ¹² ''Omusila wae wekala mu likaa lyae,mane mwa fiyela naku kenisa pashi no situngu sae,a waneke o lukonga mu siete sae; outumbu nga utumbeke mu mulilo no mbulo kuthima.'' ¹³ Mwetho nako Jesu mwa na tunda ku Galilea ku wiya ku Jordani kwa Joani ngao awiye a mukolobethe. ¹⁴ Kono Joani keo okana na kwaamba ngao, ''Owe oswanela kuni kolobetha,ike apa owiya kuno kwange?'' ¹⁵ Kono Jesu keo o mwalaba ngao, ''Oitane ngao ku tendale ngeyo kakuli kwa lukela ngao tumanene omwikaelo no ku luka.'' popo keo Joani oitana. ¹⁶ Apo na kolobethiwa,Jesu keo o omboka mu meyu no ku monala ngao e liwilu lya shokoloka,keo omona Emepo tha Mulimu ku shelumukela pa mutwi wae na litwa weti kangwilimba. ¹⁷ Mu wangu wangu keo e lii liyubala kutundela ku wilu kwamba ngao, ''Oyu yonyiko omwanange na wapela yonene.''