¹ Mo no kuwiya ngeya ngao Jesu apa na manisa eyo naamba,keo otunda mu Galilea na ku tha mu Judea mushambwaliya no liambai lya Jordan. ² Aanu angi-angi keo a mukoñeela,keo o ka yoisa oko. ³ A Falisi mo na wiya okwae,na ku muambela ngao, ''Kana mu mulao ngao o mulume alukulule ombiyama wae mu ku fosa soshe esi afosa? ⁴ Jesu keo o alaba ngao, ''Muna shemwa kubala ngao oyu na umbu ku kala kumakalelo mo na tenda mulume na mukathi? ⁵ Oyu no aumba kame mo na amba ngao, Mwee libaka elyo o mulume mwa siya yaye na nyina na kwikala na mbiyama waye ambu,ngao apiluke lutu lumweya. ⁶ Keo kame kaa anu aili kao, kono lutu lumweya.Keo ngao esi Mulimu ana kopanya,ko kuna ekela wa ku sitapa.'' ⁷ Keo a muambela ngao, ''Mushe natuitanisetha kupa o liñolo no kulukulula na ku mucitha ngaa athee eniisike?'' ⁸ Mo na aalaba ngao, ''Kakuli o micima thenu kotha yuba kao, Mushe ponyipo apa na miitanisa ku lukulula ambiyama enu, kono ku makalelo no ku shemwa kwikala ngeyo. ⁹ Na miambela ngao, Oyu yoshe o lukulula mbiyama waye,kendi ku mulukwela uule,na ku lama wao, ona buku, kame o mulume oyu lama o mukathi oyu na lukululiwa naye kame lihule. ¹⁰ Alutiwa mo naambela Jesu ngss,''Ndi monyimo kulyele ngeyo ku mulume na mbiyama waye,Keo njeko uwa wa kulama. ¹¹ Keo Jesu waambela ngaa, ''Kaa anu oshe etana ou mwambelo kao,kendi aa napiwa ngeyo. ¹² Kwaali a no mbula kutwesa o kulama ku tundeela mu libumo lya anyina woo ngeyo,kwali anombula kutwesa kulama kakuli aanu mo naatenda ngeyo,kutundapo kwaali aa no mbula kutwesa kulama kakuli ao onyiko ana kutende ngeyo mu kusebeletha o mubuso no kuwilu.Oyu twesa ou mulutelo ou,mu teneke au itane. ¹³ Keo anikana a nyonyo mo na letiwa kwa Jesu ngao aakwate na ku alapelela,kono alutiwa aye keo aayutha. ¹⁴ Kono Jesu keo oambela ngaa, ''Mwitanise otwanikana o tunyonyo,ko mu naakanisa ku wiya okwange kakuli omubuso no kuwilu wa anu no kufeka ao. ¹⁵ Mo na apaka o makaa anikana,keo otha o asiya. ¹⁶ Keo mulume o wiya kwa Jesu ku wiya kwaamba ngao, ''Muluti, inu mwike oiiwa ei ni lukela kutenda ngao ni wane moyo wa kuyoyeela?'' ¹⁷ Jesu keo o muambela ngao, ''Sike esi oni pulela tha uwa?'' Omweya ambu yo muwa,kono ndi wa wapela kwingena mu upilo o mamele o milao. ¹⁸ Oyo mulume keo o mwambela ngaa, ''Milao thipi?'' Jesu keo o amba ngaa ''Ko neepa,kona tenda uule,ko neetha,ko napaka ya ngaya-ngaya. ¹⁹ Okuteke iyo na nyoko,na ku wapela anu wendini o mu kuwapelela ofoti. ²⁰ Keo omulume omuambela ngaa,''eyoo yoshe ninaimamele,ike kame yeniswanela kutenda?''. ²¹ Jesu mo na mwambela ngao, ''Ndi wa wapela ku luka,othe,okaulise o ufumu woye,okaupe a utwi,keo mo kwata ufumu kuwilu,keo owiye,o ni koñeele. ²² Oyo ndumbaana apa na yuba Jesu ei na amba keo otha kwako yona swaba,kakuli mona kwata ufumu ungi. ²³ Jesu mo nambela alutiwa aye ngaa ''Na mi ambela ya sikuma ngao, kwa kalupa o munu nokufuma onene ngao a engene mu mubuso wa kuwilu. ²⁴ Na miambela kame ngaa,kwooto o kamele ku ingena mu lithiyo no nguya kupita oyu no kufuma ngaa engene mu mubuso wa Mulimu.'' ²⁵ Alutiwa aye apa na yuba ngeyo,mo na ku komokela na kwaamba ngaa, ''Oyu mbo yoisiwa ani?'' ²⁶ Jesu mo na topeela na ku amba ngao, ''Kwaanu ei ikalu,ku Mulimu einu yoshe yoto. ²⁷ Keo Peter o mwalaba na ku muambela ngao, ''Omone tu na sii o inu yoshe na ku kukoñela.Keo esi mbo tuwana sike?'' ²⁸ Jesu mo na ambela ngaa, ''Mu uniti na miambela ngao, mu litunga olipya o mwana munu apa mba tomana pa sipula saye no ulena,omwe mu na ni koñeele namwe mbo mutomana pa likumi lya ipula na iili no ulena,ku atula o mishobo likumi na thiili no mishobo no lusika lwa Isilaele. ²⁹ Munu na munu oyu na sii o mathuwo,apaye,a manthae,yaye,nyinawaye,aa naye,kapa olitunga mu lithina lyange mwa wana mwaanda keo mwa wana upilo wa ku yoyela. ³⁰ Angi ali poso mwekala ku manyima ali mumanyima mwe kala poso.