¹ Munyima tha mayuwa mutaanu na limweya Jesu keo shimba Pitolosi, Jakobo na Joani minaye, keo atwala ku lilundu lile-lile no lika ku mbali tho. ² Keo piluka sipolo thaye yoli no. O lupala lwaye lwetha wendi liiwa, na ya apalo yaye kwetha wendi litwa. ³ Mumone, keo kuwiya Mushe na Eliya ambaula naye. ⁴ Pitolosi keo alaba na kwambela Jesu ngao, "Mulena, ku na wapa po tuli pano, endi wa thaela, mo ni umba itungu yaatu - thimweya thoye, thikwatho tha Mushe, thikwatho tha Eliya." ⁵ Apo bene oshambanga ngeyo, mumone, libuyi likenu liwiya ku a thiteketha, mumone kame, keo ku yubala lii noli pana mu libuyi, lya mba nagao, 'Oyu yo Mwanange na wapela, oyu wani wapelisa enene. Mu mu yubele." ⁶ Apo alutiwa na yuba eyo, keo oshe angwela pashi na kwiyapa enene. ⁷ Keo Jesu owiya okwoo kwa kwata na kwa ambela ngao, "Mu yoyoke kame ko mu ne yapa." ⁸ Keo a topela na ku mona Jesu yo foti ambu. ⁹ Apo na shelumuka e lilundu, Jesu keo wa mamelisa, ngao, "Ko mu na thinga ku kambela munu yoshe ei mu na mono kendi mu manyima a Mwana Munu apa mba inguka kwa afu. ¹⁰ A alutiwa aye keo a mwipula, ngao, "Kandi ike a man'oli apa ambanga ngao Eliya yo mbo kutangetha kuwiya weli?" ¹¹ Jesu keo o alaba, ngao, "Ya thikuma Eliya mbo wiya ku lukitha e inu yoshe. ¹² Kono na mi ambela ngao, Eliya weya kale, na shemwa ambu ku mu limuka. Yo nyiyo, no iletela ngao amu tende ei na thaela yoshe. Ya feka wendi, omu Mwana Munu mba nyandela mu makaa oo." ¹³ Keo alutiwa aye a kengela ngao ambela yambo ya Joani Mukolobezi. ¹⁴ Apa na wiya kwa angi, mulume keo owiya okwaye, na kufungwama, na kwa amba ngao, ¹⁵ "Mulena, oyubele mwanange wa mulume n'eke, kakuli wa thitunya kame mwa kola enene. Pa mweya a ngwelanga mu mulilo kapa mu meyu. ¹⁶ No ni muleta kwa alutiwa oye, kono na kwanga ku muyoyiisa." ¹⁷ Jesu keo wa alaba na kwa amba ngao, "Luthika no mbula yuba na uyi, mwa thaela kwikala nenu nako thile tha ku kuma papi? Mwa thaela nako tha ku kuma papi ngao ni mi topeele? Mulete o yo mwana ku no kwange." ¹⁸ Jesu keo olwaena e mepo lidemona, keo li mutunda, o mwanikana no mulume keo oyoya bene mwe tho nako. ¹⁹ A alutiwa aye keo awiya kwa Jesu ku mukunda na ku mwipula ngao, "Otwe mono tu kwanga ngepi oku tunditha thiya mepo thi nyangunyu?" ²⁰ Jesu keo wa ambela ngao, "Baken'itha e tumelo thenu thinyonyo. Na mi ambela uniti ngao, nga mu kwite tumelo shiwango thinyonyo tha ku ku yelela na kanona ka masitete, mwa twetha kwa ambela lilundu, 'O tunde apa othe paya,' lya twetha ku shenya, kame njeko ei ka kalupa okwenu." ²¹ Kono ou wo mufuta wo lidemona njena ku tunda ngeya kendi tapelo na ku kuyumena ya kulya. ²² Ashili mu Galileya, Jesu keo o ambela alutiwa aye, Mwana munu otamba ku piwa mu makaa anu, ²³ kame mwa mwipaa, muliiwa lyo waatu mwa enguka kwa aafu." Alutiwa keo alwana enene. ²⁴ Apa na wiya ku kuma ku Kaperenauma, alume a na kwato musebethi wo ku telitha anu keo awiya kwa Pitolosi na kwamba ngao, "Oyu muluti wenu nje kutela mutelo?" ²⁵ Keo wa amba ngao, "Eni." Pitolosi uya ingena munthuwo, Jesu keo o amba naye ngao, "Wakengela ike Saimoni? Anu angepi awo malena no litunga shimbela n'amba kapa mitelo? Kana kwa anoo kapa kwanu ambu?" ²⁶ "Kutunda kwa anu anu, "Pitolosi o alaba. "Keo ana analukuluwa, "Jesu wa amba. ²⁷ Ngao ko tuna letela a kwo ku telisa mitelo kutenda thibi, othe ku liwate, oka yumbele kalobo mu meyu, oka koke othi no ma tangetha. Apo mu apula mu kanwa, mo wanamo shekelu. O shimbe oyo shekelu ope akwo ku telitha upiluke mutelo wange nou woye.