1 Ɓit ɓang mǝn ndaawang wunan dip gǝ pangkop mǝnan gurum mǝ mang fu muop gǝkaa Yesu ɗewar mǝ tǝ nyi yi. 2 Mǝ ɓugat nyi mǝn mǝ mang nyi mwaan mǝ pǝn gwopna Bilatus. 3 Yahuza wudok seet gǝnyi hǝ, naa kat mǝ pǝn Yesu npe tǝ mǝn bat enɗye mǝn mwaan gǝ ǝk shagal wudok yagurum gǝfu-sar hǝ mwaan gǝ pǝn ndaawang wunan muop gǝ mǝnan 4 mǝ yong, "A chin wubis shi wu a seet gǝ wu fufii hǝ." Mǝn mǝ yong, "A me ɓyak mǝn yi? Man bii chin gǝkaa nbigǝ." 5 Mǝn kon ǝk shagal nanyi nɗǝgǝn lǝwap wuyoon, nyit muop mǝn mwaan gǝ langshik. 6 Ndaawang wunan nanyi mǝ kok ǝk shagal nanyi mǝn mǝ yong, "Ndung ɗong ɗǝk nbang shagal mou, nsa a shagal tǝ gurum." 7 Mǝ ɓagalka gǝshak mǝn mǝ seet gǝlaap wupin ɗyak tugul npe wam mǝtugat-wul. 8 A waa nnyi, bii gǝ mǝ yong gǝlaap nanyi shi "Gǝlaap Tǝgǝm" nɓit wu chinyi. 9 A nnǝgǝn mǝn ɓǝlǝp wudok Irimya, wulaa-ɓǝlǝpnaan laa hǝ waarǝ. Dok yong, "Mǝ kok ǝk shagal wu yagurum gǝfu-sar nanyi wudung a shagal seet gǝfe wu gurum Izraila mǝ ɗen kaa muup hǝ 10 mǝn mǝ seet gǝlaap wupin ɗyak tugul gǝnyi kabi wu Miskagam dok laa hǝ." 11 Lat mǝn Yesu ɗar ntagam gwopna, mǝn gwopna nang fu muup yong, "A gǝ a long Yahudawa a?" Yesu lap yong, "Kat wu gǝ laa hǝ." 12 Ndaawang wunan gǝ mǝnan mǝ pam nyi mǝn lap mǝbi mou. 13 Lat mǝn Bilatus laa gǝ nyi yong, "Gǝ kǝlǝng pampe wu kaa gǝ mou a?" 14 Mǝn lap lǝfu wa gǝme mou, mǝn bii nanyi rǝng gwopna badǝn. 15 Dok ɗǝ gǝshi byisǝ ɓǝ gwopna tak mǝgwuo gǝme gǝnaar muop wu nlǝɓal wu gurum wukǝrgǝi mǝ mang hǝ. 16 Shide dok muop gǝ me kogorong sǝm muup a Barabas. 17 Mǝ tǝl gǝ shak lat mǝn Bilatus nang fu muop yong, "Gu ɗemkop a tak a wuɗa ngun yi? A Barabas a, a Yesu wu gu yong nyi shi Kristi yi?" 18 Man nkwǝt mǝ wul gǝ Yesu nnyi a nsa naalaa dat. 19 Shi wu tongɗok gǝ pǝtong sheep hǝ mǝn mat muup tak lep dǝr muup yong, "Gǝ chin mǝbi gǝ dagwuo wu fufii nhǝ mou. Nsa a nee wagap chinyi nsa sugun wu a naa kaa muup hǝ." 20 Ndaawang wunan gǝ mǝnan mǝ gwaan gurum wukǝrgǝi ɗewar mǝ laa yi nkwǝt gǝ du tang a Barabas ɗe mǝ ntǝ Yesu yi. 21 Gwopna nang fu muop yong, "Gu tangkop a tak a wuɗa gǝnaar muop yi?" Mǝ yong, "Barabas." 22 Bilatus yong, "Ɗe gǝ a chin a me Yesu wu gu yong shi Kristi hǝ yi?" Mǝn muop dau mǝ lap yong, "Lang nyi gǝ shepɓeel." 23 Mǝn yong, "A nsa me; a me a wubis gǝfe yi?" Mǝn mǝ ap ɗǝgǝl muop bǝɓal mǝ yong, "Lang nyi gǝ shepɓeel." 24 Bilatus naa kat ya gǝ ji ɓoot chin mǝbi mou nsa jagar npe yagal mǝn yak am, mǝn vang sar ntagam gurum dip mǝn yong "Sarnǝ paat gǝ muut dagwuo wu fufii nhǝ. Gu naa gǝkang nbigu dat." 25 Mǝn gurum dip mǝ lap yong, "Nyit zhirii tǝgǝm gǝfe a kaa mu gǝ jep mu." 26 Lat mǝn tak Barabas nmuop, mǝn nas Yesu mǝn pǝn muop npe mwaan mǝ tǝ yi. 27 Sojya gwopna mǝ mang Yesu mwaan gǝtal lǝ gwopna gǝnyi mǝn mǝ tǝl kaa sojya muop dip. 28 Mǝ tagat byaat gǝfe mǝn mǝ ɓyang nung long nnyi. 29 Mǝ chin vugum long shi nǝlek mǝn mǝ ɓyang nkaa muup, mǝn mǝ shen kamlong nnyi yaa nsar dasǝ. Lat mǝn mǝ dugam ntagam muup men mǝ zhal nyi mǝ yong, "Mǝ tal gǝ, Long Yahudawa!" 30 Mǝ tuo zeel lǝ shi muup, mǝn mǝ lap kamlong nanyi mǝ nas kaa muup gǝnyi. 31 Mǝ zhal nyi lat mǝn mǝ tagat byaat-long nanyi mǝn mǝ ɓyang nǝmuop nnyi. Lat mǝn mǝ fat gǝnyi npe mwaan gǝ tǝ gǝ shepɓeel. 32 Muop nfat dat mǝn mǝ kat me dagwuo Kurane sǝm muup a Simon, mǝn mǝ yaa nyi gǝɓal mwaan gǝdǝr muop ɗewar mang shepɓeel Yesu yi. 33 Jya mǝ ruo nme mǝpe sem muup a Golgota, wawu a "Pee Ǝgǝs-kaa." 34 Mǝ pǝn am-laatǝng wu mǝ room gǝ ɓaan hǝ nnyi. Yesu cham, mǝn ɗem sua gǝnyi mou. 35 Mǝ kwak nyi lang gǝ shepɓeel lat mǝn mǝ lǝ zek gǝkaa byaat gǝfe, 36 mǝn mǝ tugat mǝ kang kaa muup yi. 37 Mǝ yil wubis gǝfe lang ndapkaa muup kam hǝ, "Wudung a Yesu, long Yahudawa." 38 Mǝ lǝng kulǝp vǝl gǝpe gǝme gǝnyi gǝkaa shepɓeel, nde ngan dasǝ, nde ngan dakul. 39 Gurum wu mǝ ɗyilǝng war hǝ mǝ agas nyi mǝn mǝ taat kaa du, 40 mǝ yong, "Dok gǝ yong gǝ ship lǝwap wuyoon mǝn gǝ ɗyik nɗǝgǝn ɓit kún, ɓǝ gǝ angkaa sak shi ko! Ɗyin gǝ kwǝt a Laa Naan ɓǝ gǝ sam gǝkaa shepɓeel nanyi!" 41 Ndaawang wunan mǝ zhal nyi a kam shi, nau gǝ mǝbyiyil gǝ mǝnan mǝ yong, 42 "Angkaa gurum muop mǝn ɓoot npe angkaa shik muup mou. Nyi a long Izraila. Ɗagat nyi sam yi taa gǝkaa shepɓeel ɓǝ mǝ pǝn naduk nnyi. 43 Nyi a ɗem ɓǝlǝp Naan, ɗagat Naan pǝt gǝnyi yi gǝɗes hǝ, kan Naan ɗem dǝr shang nyi tak. Nsa yong, 'An a Laa Naan.'" 44 Kulǝp wu mǝ lǝng muop gǝkaa shepɓeel gǝpe gǝme hǝ, mǝ agas nyi a kam. 45 Nfuus gǝnaar mǝn gǝyil kwoo dip mwaan gǝ rǝ nfuus kansǝgǝn. 46 Nkang fuus kansǝgǝn mǝn Yesu tak ɗǝgǝl bǝɓal mǝn yong, "Eli, Eli, lama sabaktani?" wawu "Naan gǝnǝ, Naan gǝnǝ, gǝ nyang an gǝtak a waa nme?" 47 Pak muop wu mǝ ɗyamɗok nnǝgǝn mǝ kǝlǝng mǝn mǝ yong, "Nyi fu yong a Iliya." 48 Gǝ laa mou mǝn nde gǝnaar muup yak gǝsǝ mwaan gǝ ɓyang sarɗaa nɗǝgǝn am-laatǝng wu dǝɗwang mǝn lang shi kam ɓuu mǝn pǝn nyi dǝ sua yi. 49 Gogot muop mǝ yong, "Nyit nyi nmeshik. Ɗagat mǝ naa yi mak ɓǝ Iliya ji angkaa muup." 50 Lat mǝn Yesu tak ɗǝgǝl shizak bǝɓal mǝn nook muup pǝt. 51 Lat mǝn byaat fulǝwap wuyoon gapɗǝgǝn shik vǝl, mang shi gǝdeel waa sam rǝ gǝ bǝdǝr, mǝn yil sugun, mǝn pang pyaram. 52 Gǝcher mǝ ap, mǝn gurum wuret gwet wudok mǝ ɗǝm hǝ mǝ yigil nɗǝgǝn tugun. 53 Shii wu nyi yagal gǝnaar mǝdiɗǝm hǝ mǝn muop zak mǝ fat gǝtal, mǝ ruo gǝfǝr wusǝsaar, mǝ nyin kaa sut ngurum gwet. 54 Long sojya nau gǝ muop wudok mǝ ɗyamɗok fu kangkaa Yesu hǝ mǝ naa yil wu sugun gǝ gogot jepe wu ɗak hǝ, mǝn yigil lugut mǝ yong, "Nyi dok a a Laa Naan wagap." 55 Surǝp wudok mǝ lǝngǝdǝr Yesu mǝn mǝ shen jepe nnyi hǝ, mǝ ɗyam njong gǝ mǝ naa bii wu nyi fu ɗak yi. 56 Gǝnaar muop dok Mariya Makdalin nyi nnǝgǝn, gǝ Mariya nǝgǝn Yakubu muop gǝ Yusufu, gǝ nǝgǝn jep Zabadi. 57 Pee mang kansǝgǝn mǝn me dagwuo wu lǝlong wul, nyi a gurum Arimatiya, sǝm muup a Yusufu, wudok nyi zak a lagǝdǝr Yesu. 58 Mwaan dǝr Bilatus mǝn ɗang nyi npe lap kum Yesu yi. Bilatus takfu nnyi. 59 Yusufu mang kum nanyi mǝn mwaar shi byaat wuret, 60 mǝn wum nyi ntugun wufuo wudok gap dǝr nǝmiin ngulung pang hǝ. Mǝn ɓiring bangsang laar sǝp fu tugun nanyi mǝn waa nbi fe. 61 Mariya Makdalin gǝ nde Mariya mǝ tugatɗok ngan wu gap gǝcher nanyi ɗeltaa. 62 Ɗaar mǝ fat ɓǝ den a ɓit Chinshik, ndaawang wunan gǝ Farisiyawa mǝ tǝl gǝshak dǝr Bilatus. 63 Mǝn mǝ laa gǝnyi mǝ yong "Miskagam, mǝ ɗyedǝr nkwǝt long wurum nhǝ dok, shi wu nyi nkagam hǝ, laa yong, 'Ndangkong ɓit wukún ɓǝ gǝ a yagal shizak.' 64 Waa nnyi mǝ tangkop gǝ ɗǝk gurum mǝ kang kaa gǝcher nanyi dǝr ɓit kún. Mǝ chin kam mou ɓǝ jepgǝdǝr muup jya gǝ mǝ mang kum muup mǝn mǝ nyong, 'Yagal gwe gǝnaar mǝdiɗǝm,' man ɓǝ fuǝnpe gǝdǝr gǝ bis nma wupel." 65 Bilatus laa gǝ muop yong, "Gu mang wukangpe. Mwaan gu kang kaa pee nanyi gǝret." 66 Lat mǝn mwaan mǝ kang kaa gǝcher nanyi, mǝ vaar fu pang nanyi mǝn mǝ laa gǝ wukangpe tong nnǝgǝn.