¹ Yesu laa ɓǝlǝp nhǝ lat mǝn laa ɗǝr jepgǝɗǝr muup yen, ² "Gu man Gapɗel ɓit ɗe a vǝl dat, man ɓǝ mǝ pǝn Laa Gurum ɗewar mǝ kwak nyi gǝ shepɓeel yi." ³ Lat mǝn ndaawang wunan gǝ mǝnan mǝ tǝl kǝshak lǝ ndaawang wukakǝgǝt wudung sǝm muup a Kefas hǝ. ⁴ Mǝ tugat lapkang war wu mǝ yaa Yesu yi nnawat ɗewar mǝ tǝ yi. ⁵ Mǝ laa yen, "Gǝ kwǝt gǝshi byisǝ mou, kwal ya nyagal gǝnaar gurum muop." ⁶ Gǝshi wu Yesu nyi nBetanya lǝ Simon wu a tǝlogom hǝ, ⁷ nyi fu sǝ dat mǝn me namat ji gǝ dǝlang alabasta gǝ muor wu gǝ shagal gwet, mǝn mang ɗǝk nkaa Yesu. ⁸ Jepgǝɗǝr Yesu mǝ naa kam mǝn took muop dam, mǝ yong, "Mǝ dam muor nhǝ kam a npe me? ⁹ Ɗyin gǝ mǝ seet gǝnyi gǝ shagalgwet mǝn mǝ shen wupya muop." ¹⁰ Yesu wu man bii nanyi mǝn laa gǝmuop yen, "Gun fu weel namat nhǝ a nsa me? Chin a bii wuret n-an. ¹¹ Gu kat wupya muop veet gǝnaar gu, she gu kat an veet gǝnaar gu mou. ¹² Ɗǝk muor kaanǝ a npe wum gǝnǝ. ¹³ A laa naduk gǝgu, dip pee wu mǝ shakɓǝlǝp langship nhǝ ɓǝ gǝ mǝ laa bii wu namat nhǝ chin ɗewar mǝ ɗye muup yi." ¹⁴ Lat mǝn gǝme nɗǝgǝn muop wu sarkaavǝl, wu gǝ mǝ yong nyi shi Judas Iskariyoti hǝ mwaan dǝr ndaawang wunan muop, ¹⁵ mǝn laa yen, 'A pǝn nyi ngu ɓǝ gu pǝn a ɗang n-an yi?" Mǝ kun ǝk shagal yagurum gǝfu-sar pǝn nyi. ¹⁶ A shi nanyi mǝn tang war dǝr pǝn Yesu yi nmuop. ¹⁷ Par ɓit wupel nɗǝgǝn ɓit wu bii mǝ sǝ nawe gǝ yisti mou hǝ, mǝn jepgǝdǝr Yesu jya mǝ nang fumuup mǝ yen, "Gǝ kat mǝ myap pee a ne ngǝ npe sǝ Gapɗel yi?" ¹⁸ Yen, "Gu mwaan gǝfǝr lǝ me dagwuo, gu laa gǝnyi gu yen, 'Wusheepee laa yen, "Ɓit gǝnyi wulduk get. Gǝ a sǝsǝ Gapɗel a lǝgǝ dau gǝ jepgǝdǝrnǝ."' ¹⁹ Jepgǝdǝr nanyi mwaan mǝ chin kabi wu Yesu laa gǝmuop hǝ, mǝn mǝ myap sǝ Gapɗel nanyi. ²⁰ Nkansǝgǝn mǝn ji tong npe sǝsǝ gǝpe gǝme gǝ jepgǝdǝr muup sarkaavǝl. ²¹ Muop fu sǝ mǝn yen, "A laa naduk gǝgu, me gu ya gǝ seet gǝ an." ²² Ɓǝlǝp nanyi weel muop mǝn mǝ nang fu muup gǝmek-gǝmek mǝ yen, "A an a, Miskagam?" ²³ Lap yen, "Gwuo wu fu sǝsǝ nɗǝgǝn ɗaa gǝme gǝ an hǝ a nyi gǝ seet gǝ an. ²⁴ Laa gurum gǝ waa, kabi wudok mǝ yil ɗen gwe gǝkaa muup hǝ. Lat nkaa dagwuo wu gǝ seet gǝ Laa Gurum hǝ! Ɗyin dok mǝ laa nyi mou ɓǝ ɗyin gǝ zheel." ²⁵ Yahuza, wu ya gǝ seet gǝnyi hǝ yen, "A an a, Miskagam?" Yesu yen, "A gǝ gǝ laa gǝ fu sak." ²⁶ Muop fu sǝ mǝn Yesu mang nawe, lang wuret gǝkaa mǝn tǝrap pǝn jepgǝɗǝr muup mǝn yen, "Gu lap, gu sǝ, ndung shishik nǝ." ²⁷ Mang foon mǝn ɗǝkyil mǝn pǝn muop yong, "Gu sua, gun dau. ²⁸ Ndung a tǝgǝm gǝnǝ nung byilaaden, wu gǝ mǝ kon npe gurum gwet dǝr vang wubyas. ²⁹ A laa yi gǝgun, she a sua am-laatǝng nhǝ shizak mou, ɗe a par ɓit wu gǝ mǝ sua wufuo gǝgun nɗǝgǝn yil-long Ndaanǝ hǝ dat." ³⁰ Dok mǝ lǝ see lat, mǝn mǝ fat mwaan nPang Paat. ³¹ Yesu laa gǝ muop yen, "Gun dip ya gu nyit an nlǝpar nhǝ, nsa dok mǝ ran ɗen nkwǝt, 'Gǝ chit wutap ɓǝ tung tǝm nanyi mǝ pap.' ³² Ndangkong wu mǝ n-ep an ɓǝ gǝ a yaa war ngun a mwaan nGalili." ³³ Mǝn Bitrus laa gǝnyi yong "Ɗyin gogot mǝ nnyit gǝ dip ɓǝ an gǝ a nyit gǝ mou." ³⁴ Yesu laa gǝnyi yong, "A laa naduk yi gǝgǝ, nlǝpar nhǝ, deelkoo ya ntokshik ɓǝ gǝ chii man an gwe waarǝ kùn." ³⁵ Bitrus lap yen, "Ɗyin gǝ a muut wa muut gǝpe gǝme gǝgǝ ɓǝ gǝ a chii man gǝ mou." Gogot jepgǝɗǝr mǝ laa a kam. ³⁶ Lat mǝn Yesu mwaan gǝ muop npee wu gǝ mǝ yong shi Gǝtsameni mǝn laa gǝ jepgǝdǝr muup yen, "Gu tugat npeen ɗe an a mwaan yi gǝfuǝn mwaan a ɗangnaan." ³⁷ Mang Bitrus gǝ jep Zabadi wu vǝl hǝ, mǝn ɓǝm tookdam gǝ weel. ³⁸ Mǝn laa gǝ muop yen, "Tooknǝ dam dogol gǝ yee gǝ a muut a muut. Gu tugat npeen gu kang yi gǝpe gǝme gǝ an." ³⁹ Chin kyem hǝ lee, mǝn pal gǝfanyit mǝn ɗangnaan yen, "Ndaanǝ, ɗyin nɗem ɓǝ foon nhǝ ɗel fu nǝ. Nau gǝ kam hǝ, gǝ chin a bii wu a ɗemkop mou, a nǝmak" ⁴⁰ Waaji kat jepgǝdǝr fu saam mǝn laa gǝ Bitrus yen, "Gu ɓoot npe tugat nmeen gǝ an wa nung shii gǝme mo? ⁴¹ Gu tugat nmeen mǝn gu ɗangnaan yong gu dǝk nsar wukatshi. Mǝrip mang ɗe a dǝng shishik leen." ⁴² Bǝn mwaan wuvǝl mwaan gǝ ɗangnaan, yen, "Ndaanǝ, ɗyin ndung gǝ nɗeel nǝ a sua mou, ɓǝ mang ɗyin kwǝt kabi wu gǝ ɗemkop hǝ." ⁴³ Bǝn waaji kat muop nsaam, nsa dok saam tǝ muop dogol. ⁴⁴ Bǝn yagal nyit muop mwaan gǝ ɗangnaan kaa wukùn, nyi fu chin tǝkyit ɓǝlǝp nanyi. ⁴⁵ Lat mǝn Yesu waaji dǝr jepgǝdǝr mǝn laa gǝmuop yen, "Gu kutnyi a fu saam, gun fu nyaksuk a? Gu naa, shii waarǝ, gǝ mǝ seet gǝ Laa Gurum gǝsar mǝ chan wubyas muop. ⁴⁶ Gu yigil mǝ mwaan. Gu naa, gwuo wu gǝ seet gǝ an hǝ nyi dukduk." ⁴⁷ Nyi fu ɓǝlǝp nanyi dat mǝn Yahuza wawul, nyi wu gǝnaar muop wu sarkaavǝl hǝ. Gurum kǝrgǝi gǝdǝr muup. Mǝ tugat a dǝr ndaawang wunan gǝ mǝnan gurum moup. Mǝ jya gǝ nggoo gǝ kur. ⁴⁸ Dagwuo wu gǝ seet gǝ Yesu dok laa gwe gǝ muop yen, "Gwuo wu a ogom hǝ ɓǝ a nyi nanyi. Gu yaa nyi." ⁴⁹ Bǝr dat mǝn waaji dǝr Yesu mǝn yong "A kaat gǝ Miskagam!" Mǝn ogom nyi. ⁵⁰ Yesu laa gǝnyi yong, "Shaarnǝ chin bii wu wul gǝgǝ." Mǝn wakjya ɗak shi Yesu, mǝn mǝ yaa nyi. ⁵¹ Me mǝgwuo wudok nyi gǝpe gǝme gǝ Yesu hǝ, shang chuk lang shi frang ndaawang wukakǝgǝt mǝn gap kom tak hǝ. ⁵² Mǝn Yesu laa gǝnyi yong, "Ɓyang chuk gǝgǝ npat gǝfe, nsa gurum wu gǝ mǝ tagat chuk, gǝ mǝ ɗuam a nfu chuk. ⁵³ Gu naa gu kat a ɓoot npe yong Ndaanǝ nlep gǝ gǝwur sarkaavǝl nung mǝwong n-an mo? ⁵⁴ Ɗǝ a kam ɓǝ bii wu nɗǝgǝn bang-byiran gǝ kǝgǝt a ɗagat a nah, nkwǝt jepe nhǝ ɗak a lengwaar yi?" ⁵⁵ A shi nanyi mǝn Yesu laa dǝr gurum wukǝrgǝi yong, "Gu fat gǝ nggo gǝ kur npe yaa an, kabi wu an a kulǝp ha? Bii a tugat shiɓit-shiɓit nɗǝgǝn lǝwap wuyoon a sheepee yi, mǝn gu yaa an mou. ⁵⁶ Jepe nhǝ ɗǝk a dǝr ɗǝ byiyil mǝlaa-ɓǝlǝpnaan waarǝ yi." Lat mǝn jepgǝdǝr muup mǝ suo dip nyit nyi. ⁵⁷ Muop wu mǝ yaa Yesu hǝ mǝ mwaan gǝnyi dǝr Kayafas ndaawang wukakǝgǝt, mǝbyiyil gǝ mǝnan dok mǝ tǝl kaa shak gwe nnǝgǝn. ⁵⁸ Mǝn Bitrus langǝdǝr muup njong mwaan gǝpe gǝtǝlǝng gǝpang ndaawang wukakǝgǝt nanyi. Mwaan yaa nɗǝgǝn mwaan gǝ tong gǝpe gǝme gǝ mǝkangpe ɗewar naa kot yi waa a nang oh. ⁵⁹ Ndaawang wunan gǝ gǝwur daskagam mǝ tangpe twamshik wurum kaa Yesu ɗepin mǝ kat war tǝ nyi yi. ⁶⁰ Mǝ twamshik wurum gwet mǝ yigil ɗyam, nau kam mǝn mǝ kat me mou. Lee mǝn gurum vǝl yigil ɗyam ⁶¹ mǝn mǝ yen, "Dagwuo nhǝ yen, 'Gǝ a ɓoot npe ship lǝwap wuyoon nung Naan mǝn a bǝn a ɗyik nɗǝgǝn ɓit kún.'" ⁶² Ndaawang wukakǝgǝt yagal ɗar mǝn laa dǝr muup yen, "Gǝ lap lap ɓǝlǝp mo? A me shi wu muop fu laa kaa gǝ nhǝ?" ⁶³ Mǝn Yesu ɗook kid. Ndaawang wukakǝgǝt laa gǝ nyi yen, "A kang gǝ gǝ Naan wukagam, laa gǝ mǝn, kwǝt a gǝ a Kristi, Laa Naan oh." ⁶⁴ Yesu lap fumuup yen, "Gǝ laa gwe gǝfu sak. A laa gǝgun, she shi ɓit wu chinyi nhǝ, guu naa Laa Gurum ntongɗok gǝsar dasǝ nung Wukamgǝɓǝlǝp, mǝn nyi nwul nɗǝgǝn ligin gǝɓǝtǝng." ⁶⁵ A nyi mǝn ndaawang wukakǝgǝt tee byaat gǝnyi, mǝn yen, "Laa lǝfu wu damsǝm Naan! Mǝ chin mǝ tang a twamshik me shizak yi? Gu kǝlǝng damsǝm nanyi. ⁶⁶ Gu naa gu kat a nah?" Mǝn mǝ lap yen, "Mak tǝ." ⁶⁷ Lat mǝn mǝ tuak zeel lǝ n-yit muup, mǝn mǝ nas nyi, mǝn mǝ ɓuap nyi shi laap sar muop, ⁶⁸ mǝn mǝ yen, "Gǝ laa gǝmǝn, gǝ wu a Kristi hǝ. A wuɗang dap gǝ eh?" ⁶⁹ Bitrus zak dok tongɗok gǝtǝlǝng kom, mǝn me frang wu a lareep hǝ ji laa dǝr muup yong, "Dok gǝ gǝpe gǝme gǝ Yesu, dagwuo Galili." ⁷⁰ Mǝn chii ntagam muop dip, laa yong, "A man bii wu yi fu laa ɓǝlǝp gǝkaa hǝ mou." ⁷¹ Yagal pǝt gǝ rǝ fukǝrang, mǝn nde frang wu a lareep hǝ naa nyi mǝn laa dǝr muop wu nnǝgǝn yong, "Dagwuo nhǝ dok muop gǝpe gǝme gǝ Yesu, gurum Nazarat." ⁷² Bǝn chii ba sǝgǝrfu yong, "A man dagwuo nanyi mou!" ⁷³ Lee dat mǝn muop wuɗyin mǝ ɗyamɗok hǝ wakjya mǝ laa gǝ Bitrus mǝ yong, "Gǝ wagap a nde muop, nsa liis gǝ wuo gǝ." ⁷⁴ Lat mǝn tuarshik ba sǝgǝrfu yong, "A man dagwuo nanyi mou." Gǝ laa mou mǝn deelkoo tokshik. ⁷⁵ Mǝn Bitrus ɗyedǝr lǝfu wudok Yesu laa yong, "Deelkoo ya ntokshik ɓǝ gǝ chii man an gwe waarǝ kún." Mǝn pǝt gǝɓang pǝt wal ba chigir.