¹ Yil-long gǝbǝtǝng gǝ kwǝt a kabi jeraap duan sarkaavǝl wu mǝ kok til-ngong gǝdu mǝ mwaan npe lap mis namuar. ² Paat gǝnaar muop a wusǝsoon mǝn paat wu enwon. ³ Duan wu enwon nanyi mǝ kok til-ngong gǝdu mǝn mǝ yaa muor mou. ⁴ Ɗe duan muop wusǝsoon mǝ kok tuu muor gǝ til-ngong gǝdu. ⁵ Mis namuar bes wul mou mǝn saam tǝ duan muop nanyi mǝn mǝ saam dip. ⁶ Npechagat mǝn mǝ kǝlǝng yongpe, 'Gu naa, mis namuar wul! Fat gu kaat nyi.' ⁷ Mǝn duan muop mǝ yigil dip myap til-ngong gǝdu. ⁸ Muop wu enwon mǝ ɗang wusǝsoon mǝ yen, 'Gu pǝn pak muor agu nmǝn nsa til-ngong amu gǝwar pyat.' ⁹ Wusǝsoon nanyi mǝ lap yen, 'Ya gǝ yoon mǝn gǝ gun mou, gu gapdǝr mwaan gu seet gǝlǝtuk.' ¹⁰ Mǝ mwaan dat mǝn mis namuar wul, mǝn muop wu fu kang nyi mǝ ruo gǝɗǝr gǝpe byisǝ ɓugatɗyik nanyi, mǝn mǝ ogot fulǝ. ¹¹ A ndangkong mǝn nde duan nanyi mǝ wakwul mǝn mǝ yen, 'Miskagam, miskagam, ep fulǝ nmǝn.' ¹² Mǝn lap yen, 'A laa naduk gǝgun, a man gun mou.' ¹³ A waa nnyi, gu tugat gu kang, nsa gu man ɓit gǝ shi nanyi mou. ¹⁴ Nsa dabi nanyi a kabi mǝgwuo wu nyi gǝwar mwaan nde gǝyil. Mǝn yong frang afe muop mǝn pǝn byilong afe nmuop. ¹⁵ Pǝn talen paat nde, pǝn vǝl nɗe mǝn pǝn gǝme nde. Dip mǝ lap shi ɓal gǝmuop, mǝn dagwuo ɗel mwaan afe. ¹⁶ Nyi wu lap talen paat hǝ mwaan chin lǝtuk gǝnyi mǝn kat talen paat a amkaa. ¹⁷ A kam zak nyi wu lap talen vǝl hǝ kat talen vǝl a amkaa. ¹⁸ Ɗe frang wu lap talen gǝme hǝ mwaan gǝ ok fung n-yil mǝn sok shagal wupin lǝ afe nnǝgǝn. ¹⁹ Ndangkong nungdǝm mǝn miskagam frang muop nanyi wawul npe mǝ tendang yi pǝn nyi. ²⁰ Frang wu wudok lap talen paat hǝ waaji gǝ nde paat. Laa yen, 'Miskagam, dok gǝ pǝn talen paat n-an. Gǝ naa, a kat amkaa paat.' ²¹ Miskagam afe laa gǝni yen, 'Hong gǝ, fang wuret, wuɗarɓal! Gǝ ɗarɓal gǝ bii wutil, gǝ a ɗen gǝ gǝkaa wuyoon. Ɗel gǝ yaa gǝpe tookpya miskagam age.' ²² Frang wudok lap talen vǝl hǝ waaji yen, 'Miskagam, dok gǝ pǝn a talen vǝl n-an. Gǝ naa, a kat amkaa vǝl.' ²³ Miskagam afe laa gǝnyi yen, 'Hong gǝ, frang wuret wuɗarɓal! Gǝ ɗarɓal gǝ bii wutil, gǝ a ɗen gǝ gǝkaa wuyoon. Ɗel gǝ yaa gǝpe tookpya miskagam agǝ.' ²⁴ Lat mǝn frang wudok lap talen gǝme hǝ waaji laa yen, 'Miskagam, a man gǝ a bǝɓyaal. Bii gǝ ɗyip gǝpe wu nǝ gǝ kop hǝ, mǝn bii gǝ wagar gǝpe wu nǝ gǝ fuu hǝ. ²⁵ Dok a yagal lugut mǝn a mwaan a sok talen agǝ n-yil. Lap nbigǝ.' ²⁶ Mǝn miskagam afe lap fumuup yen, 'Gǝ a frang wuɓǝtbis mǝn gǝ a wulǝlogom, gǝ man kan bii a ɗyip gǝpe wu nǝ a kop mǝn a wagar gǝpe wu nǝ fuu. ²⁷ Ɗyin a kam ɓǝ dǝgǝn gǝ ɗǝn shagal anǝ nbanki, ɗyin a waa a wul ɓǝ a lap nbinǝ gǝ amkaa. ²⁸ A waa nnyi, gu lap talen wu gǝme nanyi fumuup gu pǝn dagwuo wu nyi gǝ talen sar hǝ. ²⁹ Nsa mǝgwuo wu gǝ mǝbi ɓǝ gǝ pǝn nde nnyi gwet nmaa wudok hǝ. Ɗe mǝgwuo wu nyi gǝ mǝbi mou, mǝn nkwǝt gǝnyi wa til ɓǝ gǝ mǝ lap fumuup. ³⁰ Gu mang frang wubaan nanyi gu tak nɗǝgǝn kwoo wu rip, a nnǝgǝn ɓǝ gǝ wal ba n-arap fu.' ³¹ Laa Gurum par nwul nɗǝgǝn yoon afe, gǝpe gǝme gǝ mǝwog afe, ɓǝ tong gǝ pǝtong-long afe wuyoon. ³² Gurum gǝyil dip gǝ mǝ tǝl kaa shak ntagam muup, ɓǝ gap gǝnaar muup dǝɗyak-dǝɗyak kabi wu wutap bii gap gǝnaar tǝm muop gǝ ǝk hǝ. ³³ Yong gǝ ɗǝk tǝm gǝsar dasǝ, ɗe ǝk gǝsar dakul afe. ³⁴ Lat ɓǝ long laa dǝr muop wu gǝsar dasǝ afe hǝ, yen, 'Gu wak gu jya, gun wu Ndaanǝ lang wuret kaagu hǝ, wakjya gu ruo nɗǝgǝn yil-long wudok mǝ myap gwe ngun shi wu mǝ chin gǝyil hǝ. ³⁵ Nsa dok ɓǝlak tǝ an mǝ gu pǝn sǝ n-an; amtǝ tǝ an mǝn gu pǝn am n-an; dok an a mǝzep mǝn gu pǝn lǝ n-an; ³⁶ dok an ngum mǝn gu lǝ byaat nsan; dok a gok mǝn gu naa kaanǝ; an dok nlǝɓal mǝn jya dǝrnǝ.' ³⁷ Lat ɓǝ gurum wukǝr muop nanyi mǝ lap yen, 'Miskagam, dok mǝ kat gǝ a ne gǝ ɓǝlak mǝn mǝ pǝn sǝ ngǝ eh? Mǝ kat gǝ a ne gǝ amtǝ mǝn mǝ pǝn am ngǝ eh? ³⁸ Dok mǝ kat gǝ a ne a mǝzep mǝn mǝ pǝn lǝ ngǝ eh? Mǝ kat gǝ a ne ngum, mǝn mǝ lǝ byaat nsak eh? ³⁹ Mǝ kat gǝ a ne gǝ gok ko nlǝ ɓal mǝn mǝ jya dǝr gǝ eh?' ⁴⁰ Lat ɓǝ long lap yen, 'A laa naduk gǝgun, bii wudok gu chin gu pǝn mǝjepnaa wuɗyen nhǝ, gu chin n-an.' ⁴¹ Lat ɓǝ laa dǝr muop wu gǝsar dakul afe yen, 'Gu yigil dǝrnǝ, gu wu gǝ zhirii nkaa gu, gu ruo nlǝwus gǝgwoo wudok mǝ myap npe Shetan gǝ mǝwong afe muop hǝ, ⁴² nsa dok ɓǝlak tǝ an mǝn gu pǝn sǝ n-an mou; amtǝ an mǝn gu pǝn am sua n-an mou; ⁴³ an dok a mǝzep mǝn gu pǝn lǝ n-an mou; an dok ngum gu pǝn byaat n-an mou; dok a gok, mǝn an nlǝɓal mǝn gu naa an mou.' ⁴⁴ Muop zak gǝ mǝ lap n-yen, 'Miskagam, dok mǝ naa gǝ a nǝ gǝ ɓǝlak, gǝ amtǝ, gǝ a mǝzep, gǝ ngum, gǝ a wugok, gǝ nlǝɓal, mǝn mǝ chin ɓǝlang ngǝ mou yi? ⁴⁵ Ɓǝ nyi gǝ lap n-yen, 'A laa naduk gǝgun, bii wudok gu nyang chin pǝn mǝjepnaa wuɗyen nhǝ, gu nyang chin a n-an.' ⁴⁶ A muop gǝ mǝ ruo nɗǝgǝn nogolpe gǝgwoo, ɗe gurum wukǝr gǝ mǝ kat tenglang gǝgwoo."