¹ Yesu pǝt ndǝgǝn lǝwap wuyoon mǝn yaa war afe. Jepgǝdǝr muup mǝ jya dǝr npe mǝ kam pǝɗyak lǝwap wuyon yi nnyi. ² Mǝn laa gǝ muop yen, "Gu naa jepe muop nhǝ nau mo? A laa naduk gǝgun, me pang yong gǝ ɗe nlang kaa nde nǝ mǝ ntugun ntak mou." ³ Shi wu tong gǝ Pang Paat hǝ, mǝ jepgǝdǝr mǝ jya dǝr muup gǝsok mǝn mǝ yen, "Laa gǝmǝn, jepe muop nhǝ par gǝ mǝ tǝk a gǝshi me? A me yong gǝ kwǝt a byinyin nung wul agǝ gǝ nung gǝyil wu gǝ lat hǝ eh?" ⁴ Yesu lap fumuop yen, "Gu mwaan lee mǝgwuo yong npaap gun. ⁵ Nsa gurum gǝ mǝ wul gwet nɗǝgǝn sǝmnǝ. Nlat ɓǝ mǝ yen, 'A an a Kristi nanyi,' mǝn gǝ paap gǝ gurum gwet. ⁶ Par gu kǝlǝng ɗyel gǝ ɓǝlǝp gǝkaa ɗyel. Naa yong gu weel, nsa jepe nhǝ gǝ ɗǝk a lengwaar; a muop a lat gǝyil duk mou. ⁷ Nsa gǝyil par gǝ mǝ mang shak gǝ nde gǝyil, yil-long gǝ mǝ mang shak gǝ nde yil-long. Gǝzǝm gǝ yil-sugun par gǝ ɗǝk npee dǝɗyak-dǝɗyak. ⁸ Jepe muop nhǝ dip a pǝshe muutlaa tǝllaa dat. ⁹ Nlat ɓǝ mǝ pǝn gun ɗewar mǝ twang gun mǝn mǝ tuo gun yi. Gurum gǝyil dip gǝ mǝ nyang gun nsa sǝmnǝ. ¹⁰ Lat ɓǝ gurum gwet gǝ mǝ fat-pǝlǝp, gǝ mǝ sarap gǝ shak mǝn mǝ nyangyit shak. ¹¹ Mǝlaa-ɓǝlǝpnaan wurum par gǝ mǝ yigil mǝn mǝ npaap gǝ gurum gwet. ¹² Jepe wubyas par gǝ ɓǝl, mǝn ɗempe gurum muop gwet gǝ zugum. ¹³ Mǝgwuo wu mogorkung mwaan gǝ rǝ nogot ɓǝ gǝ kat angkaa. ¹⁴ Yong gǝ shakɓǝlǝp langship nung yil-long nhǝ gǝyil dip dǝr twamshik ngurum dip. A kam ɓǝ she gǝyil lat. ¹⁵ A waa nnyi, ɗǝ gu naa byidam nung manchin, wudok Danyel wulaa-ɓǝlǝpnaan laa hǝ nɗarɗok gǝpe wusaar (dagat ndagwuo wu fu bil mankang), ¹⁶ ɓǝ muop wu nYahudiya hǝ mǝ suo kaa yaa npang, ¹⁷ mǝgwuo wu langɗok gǝdap lǝ nsam dǝr mang mǝbi nlǝ gǝfe mou, ¹⁸ mǝgwuo wu nyi gǝnung mar nwaa dǝr mang byaat ǝbǝr afe mou. ¹⁹ Lat nkaa gu, gun wu gǝ gǝrǝng gǝ gun wu gǝ jep fu yugur, gǝshi nanyi! ²⁰ Gu ɗangnaan yong ɓit gǝsǝ agu nkwǝt gǝshi kogom ko par Ɓityak. ²¹ Nsa natwangang par gǝkwǝt swet, kabi wujet man taa duk ɗagat shi wu mǝ chin gǝyil mou, mǝn she ntaa shizak mou. ²² Ɗagat nǝ mǝ vak gǝ pak ɓit nanyi mou, ɓǝ me mǝgwuo gǝ pǝt mou. Ɗe gǝ mǝ vak gǝ pak ɓit nanyi a nsa muop wu mǝ tagat muop hǝ. ²³ Ɗǝ mǝgwuo nlaa gǝgun nyen, 'Gu naa, Kristi nyi hǝ!' ko yen, 'Kristi nyi gǝfuǝn!' ɓǝ gu pǝn naduk mou. ²⁴ Nsa Kristi wurum gǝ mǝlaa-ɓǝlǝpnaan wurum par gǝ mǝ wul jya mǝn chan byinyin wunan gǝ ɗyeer, ɗewar ɗyin nɗem ɓǝ mǝ paap gǝ muop wu Naan kok muop hǝ. ²⁵ A yaa war gwe a laa gǝgun. ²⁶ A waa nyi, dǝ mǝ nlaa dǝr n-yen, 'Gu naa, nyi ngǝgǝr,' ɓǝ gu mwaan ngǝgǝr nanyi mou. Ɗǝ mǝ n-yen, 'Gu naa, nyi ndǝgǝn lǝteer,' bǝ gu pǝn naduk mou. ²⁷ Nsa kabi wu namǝlǝp bii saanpe ngan-fuuska mǝn mwaan gǝ saan gan-fuusrǝ dip hǝ, wul Laa Gurum par gǝ kwǝt a kam. ²⁸ Pee wu kum lua nyi nnǝgǝn, ɓǝ nkyaa gǝ mǝ tǝl kǝ shak a nnǝgǝn. ²⁹ Bǝr dat ndangkong ɓit natwangang muop nanyi ɓǝ fuus gǝ kwoo, tar gǝ saanpe muop, ɗagar gǝ gǝtǝng gǝ mǝ wakɗǝk, mǝn maa wu gǝbǝtǝng hǝ sugun. ³⁰ Nlat ɓǝ byinyin nung Laa Gurum gǝ pǝt nlang gǝtǝng, mǝn seen gurum gǝyil dip gǝ mǝ tugatchiin. Gǝ mǝ naa Laa Gurum nwul gǝkaa lǝgǝn gǝtǝng nɗǝgǝn maa gǝ yoon. ³¹ Gǝ lep mǝwong gǝfe gǝ ɗǝgǝl feer, man ɓǝ mǝ tǝlkaa muop wu Naan kok muop hǝ ngan gwangpe wufeer hǝ, she shi fukyep gǝtǝng mwaan gǝ rǝ shi gan nde. ³² Gu naa gu ɗying shi tǝng wut. Ɗǝ gu kat nɓǝm lǝ sar wuvat mǝn nlǝ kom ɓǝ gu man pas wulduk. ³³ A kam shi, ɗǝ gu jepe nhǝ ɓǝ man em nwul, nyi fukǝrang. ³⁴ A laa naduk yi gǝgun, yii yigil nhǝ gǝ ɗel nǝ jepe nhǝ mǝ nɗǝk mou. ³⁵ Gǝbǝtǝng gǝ gǝyil gǝ mǝ lat, ɗe a ɓǝlǝp anǝ gǝ lat mou. ³⁶ Ɗe a ɓit gǝ shii nanyi mǝgwuo man mou, wa mǝwong gǝbǝtǝng gǝ Laa, man mou, ɗe a Ndaa dat. ³⁷ Kabi wudok gǝshi Nuhu hǝ, wul Laa Gurum gǝ kwǝt a kam. ³⁸ Nsa shi wudok she am pǝt hǝ, gurum dok muop fu sǝ muop fu sua, lab surǝp, muop fu mwaan ɗyak, ɗe par ɓit wu Nuhu rǝ chii am. ³⁹ Mǝ man mǝbi gǝkaa am wu gǝ pǝt hǝ mou mǝn am yagal sǝk muop waa gǝnyi. Wul Laa Gurum par gǝkwǝt a kam. ⁴⁰ Gurum vǝl gǝ mǝ kot gǝnaar mar, ɓǝ mǝ mang gǝme, mǝn mǝ nook nde. ⁴¹ Surǝp vǝl gǝ kot fu ees fiin, ɓǝ mǝ mang gǝme, mǝn mǝ nook gǝme. ⁴² A waa nyi gu, tugat gǝ engu nsa gǝ gu man ɓit wu Miskagam agu gǝ wul mou. ⁴³ Gu man nkwǝt ɗyin wupin lǝ nman gǝtap wat gǝ wul lǝpar ɓǝ tong gǝ en ya mǝn mǝ nruo nlǝ gǝfe. ⁴⁴ Gun zak gu tugat gǝ engu nsa Laa Gurum gǝ wul nɓit wu nyang gu ɗye hǝ. ⁴⁵ A wuda a frang wudarbal mǝn nyi a wusǝsoon wudung wupin lǝ afe den nyi a wu naa kaa lǝ afe dewar pǝn sǝ yi ngurum afe eh? ⁴⁶ Wuret lang-nkaa frang wu wupin lǝ afe waaji gǝ kat nyi fu chin kam. ⁴⁷ A laa naduk gǝgun, wupin lǝ afe gǝ den nyi nkaa byilong afe dip. ⁴⁸ Ɗǝ frang wubǝtbis ndye n-en muup mǝn n-yen, "Wupin lǝ anǝ nhǝ nung muup dǝm,' ⁴⁹ mǝn bǝm nas wunye muup frang, mǝn sǝ mǝn sua ba mous tǝ; ⁵⁰ bǝ wupin lǝ afe gǝ waa nwul nbit ndung frang nanyi den en mou, gǝshi wu nyi man mou. ⁵¹ Wupin lǝ afe slam nyi shi nas mǝn nnyit nyi kabi mweng muop hǝ, pee wu gǝ wal ba n-arap fu.