¹ Ndangkong Ɓitnyak, nkangǝɓit par ɓit wupel nɗǝgǝn shimuos, mǝn Mariya Makdalin gǝ nde Mariya mǝ jya npe naa gǝsher nanyi. ² A nnǝgǝn mǝn yil sugun, nsa me mǝwong wu tong dǝr Miskagam, tong gǝbǝtǝng sam, mǝn ɓiring pang nanyi ba gǝnyi, mǝn tong gǝkaa. ³ Fanyit muop gǝlap namǝlǝp, mǝn byaat gǝfe pya kabi dagam hǝ. ⁴ Mǝkangpe mǝ yigil lugut ba mǝ ɗaar, mǝ wak kabi kum hǝ. ⁵ Mǝwong nanyi laa ɓǝlǝp gǝ surǝp nanyi yen, "Gu yigil lugat mou, nsa a man gun pǝ tang a Yesu wudok mǝ kwak kǝ shepɓeel. ⁶ Nyi npeen mou, yagal gwe gǝbi wudok laa hǝ. Yokjya gu naa pee wudok teerɗok hǝ. ⁷ Gu mwaan bǝr mwaan gu laa gǝ jepgǝdǝr muup gu yen, 'Yagal gwe gǝnaar mǝdiɗǝm. Gu naa, gǝ yaa tagam ngun nmwaan nGalili. A nnǝgǝn ɓǝ gu naa nyi.' A laa gwe gǝgun." ⁸ Surǝp nanyi mǝ nyit gǝcher nanyi bǝr nɗǝgǝn lugut gǝ tookpya, mǝn mǝ suo mwaan gǝ laa dǝr jepgǝdǝr muup. ⁹ A nnǝgǝn mǝn Yesu kat muop mǝn yen "A nang gun!" Surǝp muop nanyi jya mǝ yaa kwak muop mǝn mǝ wap nyi. ¹⁰ Yesu laa gǝ muop yen, "Gu yigil lugat mou. Mwaan gu laa gǝ mǝjepnaa mǝ mwaan nGalili. A nnǝgǝn ɓǝ gǝ mǝ naa an." ¹¹ Shi wu surǝp nanyi nmwaan mǝn pak mǝkangpe mǝ yigil mwaan gǝfǝr mǝn mǝ laa bii wu taa hǝ gǝ ndaawang wunan. ¹² Ndaawang mǝ kat shak gǝ daskagam mǝ ɓagalka ɓǝlǝp nanyi gǝ mou, mǝn mǝ pǝn shagal gwet nsojya muop, ¹³ mǝn mǝ laa gǝ muop mǝ yen, "Gu laa gǝ gogot gurum gu yen, 'Jepgǝdǝr Yesu jya mǝ mang kum wa mǝn nsaam.' ¹⁴ Ɗǝ ɓǝlǝp nhǝ nrǝ dǝr gwopna, ɓǝ mǝ gwaan nyi ya ba weel nkat gun." ¹⁵ Lat mǝn sojya mǝ lap shagal nanyi mǝ chin kabi wu mǝ laa gǝ muop hǝ. Ɓǝlǝp nhǝ haanpe gǝnaar Yahudawa waa gǝ rǝ nɓit wuchinyi. ¹⁶ Mǝn jepgǝdr wu sarkaagǝme hǝ, mǝ mwaan nGalili, gǝ pang wudung Yesu kam nmuop. ¹⁷ Mǝ naa nyi mǝn mǝ wap nyi, mǝn pak muop mǝ ɓagal. ¹⁸ Yesu ji dǝr muop mǝn laa gǝmuop gǝ muop yen "Mǝ pǝn kamshik dip gǝbǝtǝng gǝ gǝyil n-an. ¹⁹ A waa nnyi, mwaan gu bat gurum gǝyil dip mǝ wak jǝpgǝdǝr. Gu kǝn muop nɗǝgǝn sǝm Ndaa, gǝ nung Laa, gǝ nung Mǝrip Wuret. ²⁰ Gu shee muop mǝ ɗem jepe wu a laa gǝgun hǝ dip. Gu naa, an a kwǝt gǝpe gǝme gǝgun ɗe a gǝyil mwaan gǝ lat dat.