1 Muop dip mǝ yigil gǝtǝng mǝn mǝ mwaan gǝ Yesu ntagam Bilatus. 2 Mǝn mǝ ɓǝm pam nyi, mǝ yen, "Mǝ kat dagwo nhǝ pǝ dam gǝyil amu, dǝn gurum gǝ mǝ kwat gǝndung mpǝn Kaisar mou, mǝn yen a jin a Kristo wu a long hǝ." 3 Bilatus nang fu muup yen, "A gǝ a long Yahudawa muop a?" Yesu lap fu muup yen, "Kabi wu gǝ laa hǝ." 4 Bilatus laa dǝr ndaawang wunan gǝ gurum wukǝrgǝi yen, "A kat wu dagwo nhǝ cinɗel mou." 5 Mǝn mǝ negerneng gǝdǝr mǝ yen, "Nyi fu kǝk gurum muop, nyi fu sheepee gǝyi Yahudiya dip, she shi Galili waaji rǝ mpeen." 6 Bilatus kǝlǝng kam mǝn nang nkwǝt dagwo nanyi a gurum Galili hǝ. 7 Man nkwǝt Yesu tong a gan kamshik nung Hiridus, mǝn lep gǝnyi dǝr Hiridus wudok nyi gwe nUrushalima gǝshii nanyi. 8 Hiridus naa Yesu mǝn cin tookpya nsa sǝmbǝdok tangkop naa nyi. Dok kǝlǝng ɓǝlǝp kaa muup mǝn ɗemkop naa me ɗyeer wu gǝ cin yi. 9 Hiridus nang ɓǝlǝp gak fu Yesu, mǝn Yesu lap mǝbi mou. 10 Ndaawang wunan gǝ mǝbyiran mǝ pam nyi gǝ ɓǝtyal. 11 Hiridus muop gǝ mǝlekɗyel afe mǝ agas Yesu mǝn mǝ zhal nyi. Lat mǝn mǝ byang byaat long nshik muup mǝn nǝ cin wakdǝr Bilatus gǝnyi. 12 Mǝn Hiridus muop gǝ Bilatus mǝ wak wushaar shak parde (nsa dok bii muop a mǝnyangyit shak)m. 13 Lat mǝn Bilatus yong ndaawang wunan gǝ mǝ kangkaa gurum wukǝrgǝi. 14 mǝn laa dǝr muop yen "Gu jya gǝ dagwo nhǝ dǝr nǝ a kabi wulangtagam ɗewar gurum mǝ can jepe wulǝlǝng yi, mǝn gu naa a nang ɗǝgǝl muup ntagam gu, a kat cin mǝbi nɗǝgǝn jepe wu gu pam nyi gǝkaa mou. 15 Hayǝu, wa Hiridus kat mǝbi mou, nsa bǝn lep gǝnyi mmǝn; gu naa, cin mǝbi wu mak muut mou. 16 Yong gǝ a nogol nyi a tak nyi." 17 Dok bii Bilatus gǝ shang mǝgwo wu nlǝɓal gǝme ntak nYahudawa a lengwaar gǝshii byisǝ. 18 Mǝn ap ɗǝgǝl muop dip mǝ yen "Ba gǝ dagwo nhǝ, mǝn gǝ tak Barabas mmǝn!" 19 Barnabas dok nyi nlǝɓal nsa lang ɓǝlǝpnyang wudok taa gǝfǝr gǝ tǝgurum hǝ. 20 Bilatus bǝn laa ɓǝlǝp gǝ muop, tangkop ɗyin ntak Yesu. 21 Mǝn mǝ aar ɗǝgǝldu mǝ yen, "Kwak nyi kǝ shepɓeel, kwak nyi kǝ shepɓeel." 22 Bǝn laa gǝ muop sar wukun yen "A nsa me, dagwo nhǝ cin a me? An a kat cin mǝbi wu ɗongɗyin mǝ ntǝ nyi mou. Waa nsa nyi gǝ a nogol nyi, ɓǝ a tak nyi." 23 Mǝn mǝ neger lang gǝdǝr ɗǝgǝl muop ɓalɓal, mǝ tangkop mǝ kwak nyi kǝ shepɓeel. Ɗǝgǝlmuop ma gǝkagam Bilatus. 24 Lat mǝn Bilatus nyitpe mmuop. 25 Tak dagwo wu mǝ tangkop hǝ, dagwo wudok nyi nlǝɓal nsa jagar gǝ tǝgurum hǝ. Ɗe pǝn Yesu mmuop mǝ cin bii wu mǝ mankang gǝnyi. 26 Mǝn fwat gǝnyi, mǝn mǝ yaa me dagwo sǝm muup a Siman gurum Kurane, gǝ tongpǝt ndangkong gǝfǝr, mǝn mǝ lang shepɓeel nanyi kaa muuop, mang langgǝdǝr Yesu gǝnyi. 27 Gurum kǝrgǝi, nau g surǝp wu muop fu wal nsa nyi, mǝ lǝnggǝdǝr muup. 28 Yesu bat naa muop mǝn yen, "Jiraap Urushalima, gu wal nsa an mou, gu wal gǝ kaasuk gǝ jepgu. 29 Nsa ɓit kwǝt nwawul wu par gǝ mǝ yen,'Wuret lang-nkaa zang muop gǝ tenglaa wu nǝ nkat gurum hǝ, gǝ yugur wu mǝ sua mou hǝ.' 30 Nlat ɓǝ mǝ laa dǝr pang mǝ yen, 'Gu wak gu tǝk kaa mu,' ɓǝ mǝ laa lǝɓung mǝ yen 'Gu ogot kaamu.' 31 Nsa ɗe mǝ ncan kam hǝ gǝ tǝng wu kutnyi a wuɓǝrak, ɓǝ par nfii ɓǝ a na?" 32 Dok mǝ mwaan gǝ daa vǝl, wu muop a kogorong hǝ gǝpe gǝme gǝnyi mpe mwaan mǝ tuo muop yi. 33 Mwaan mǝ ruo mpee wu bii gǝ mǝ yong shi "Ǝgǝskaa" mǝn mǝ kwak nyi nnǝgǝn kaa shepɓeel nau gǝ kogorong muop nanyi—gǝme nggan dasǝ, nde nggan dakul. 34 Mǝn Yesu yen, "Ndaa, kon wubis amuop nsa mǝ man bii wu muop pǝ can mou." Lat mǝn ɗǝk zek mǝ mǝ shap byaat afe. 35 Gurum mǝ ɗyamɗok gǝ mǝ naa yi ɗe mǝnan muop fu zhal nyi mǝ yen, "Dok angkaa gurum muop. Ɗagat nyi angkaa shik kan nyi a Kristo nung Naan, wu Naan mang a nyi." 36 Mǝlekɗyel zak mǝ zhal nyi, mǝ mwaan dukduk gǝnyi, mǝ pǝn am wuɗuang nnyi, 37 mǝn mǝ yen, "Ɗyin gǝ a Long Yahudawa ɓǝ gǝ angkaasak." 38 Dok me byinyin langɗ ndapkaa muup yen, "Wudung a Long Yahudawa." 39 Nde kogorong wu kwapɗok nnǝgǝn hǝ laa ɓǝlǝp wubaan dǝr muup yen, "A gǝ a Kristo mo? Angkaasak gǝ dau gǝ mǝn shiko." 40 Mǝn nde ɓyaal nyi yong, "Gǝ a wu yagal lugut Naan zak a! Nsa gǝ kat mǝ pǝn nogol mmǝn gǝpe gǝme gǝnyi a? 41 Nǝmuun a ɓogon mu nsa mǝn fu lap a kopgǝshii mu. Dagwo nhǝ cin mǝbi wubis mou." 42 Lat mǝn yen, "Yesu, ɗyedǝr gǝ an shiwu gǝ rǝ n-yillong agǝ." 43 Yesu laa dǝr muup yen, "A laa naduk gǝgǝ, cinyi ya gǝ kwǝt shiɓǝtnǝ fugǝtǝng." 44 Dok a fuus gǝnaar, mǝn gǝyil yagal kwoo dip ba fuus mwaan gǝ neep 45 nsa fuus saanpe zak mou. Lat mǝn byaat fulǝwap wuyoon gapɗǝgǝnshik ncat gǝnaar sampǝt. 46 Yesu tak ɗǝgǝl ɓalɓal yen "Ndaa, a ɗen mǝrip nǝ nsargǝ." Laa dat lat mǝn muut. 47 Long mǝlekɗyel naa bii wu mǝ cin hǝ, mǝn pǝnyoon nNaan, yen "Dagwo nhǝ wagap dok a gurum wukǝr." 48 Gurum wukǝrgǝi wu mǝ jya ɗepin mǝ tuamshik yi, mǝ naa jepe tǝk, mǝn mǝ yigil yok ɗe gǝ mǝ taat a kaadu dat. 49 Mǝn muop wudok mǝ man hǝ dip, gǝ surǝp wudok mǝ lǝngɗok gǝdǝr muup ɗagat shi wu nyi nGalili hǝ, mǝ ɗyam nsǝng gǝ mǝ naa jepe nanyi yi. 50 Mǝn me dagwo wu sǝm muup a Yusufu, dok nyi nɗǝgǝn gǝwur daskagam. Dok nyi a gurum wukǝr. 51 Dagwo nanyi dok ɗem ɓǝlǝp wu fu gurum gǝwur daskagam mang gǝ bii wu mǝ cin hǝ mou. Nyi dok a mǝgwo gǝfǝr Yahudiya gǝyil Arimatiya; mǝn dok nyi pǝ tang yillong Naan. 52 Dagwo nanyi mwaan dǝr Bilatus, mwaan gǝ ɗang dǝr mǝ pǝn kum Yesu yi nnyi. 53 Sam kum nanyi mǝn mwaar shi byaat wum mǝn wum nyi nɗǝgǝn tugun wudok mǝ gap a ngulung pang, jet mǝ wum mǝgwo duk nnegǝn mou. 54 Dok a par ɓit cinshik, mǝn Ɓitnyak dok wawul ashik gwe. 55 Ndangkong mǝn surǝp wudok mǝ tugat nGalili wul gǝdǝr Yesu hǝ, mwaan mǝ naa gǝcer nanyi gǝ pǝɗen kum nanyi. 56 Yok mǝ cin ɗyeltuut gǝ muor. Par Ɓitnyak mǝn mǝ nyakshak kabi wu byitǝt laa hǝ.