¹ Mok-mok par ɓit wupel nɗǝgǝn shiimuos mǝn mǝ mwaan gǝpe gǝcer nanyi, gǝ muor wu gǝ tagas wudok mǝ cin hǝ. ² Mǝ kat mǝ ɓiring pang wudok fu tugun hǝ ɗen gǝjong. ³ Mǝ ruo nɗǝgǝn mǝn mǝ kat shishik Miskagam Yesu mou. ⁴ Gǝkang rǝng muop, mǝn bagat dat mǝn mǝ kat daas vǝl ɗyamɗok gǝ byaat pya ba mǝlǝp shiɓǝt muop. ⁵ Shiwu lugut surǝp nanyi ba mǝ zǝmkaa du n-yil, mǝn daas nanyi mǝ laa dǝr surǝp nanyi mǝ yen, "A nang gun fu tang wukagam gǝnaar mǝdiɗem e? ⁶ Nyi mpeen mou, mǝ ep nyi gǝtǝng gwe! Gu ɗyedǝr ɓǝlǝp wudok laa dǝr gu shi wu kutnyi nGalili, ⁷ yen yong gǝ mǝ pǝn Laa Gurum a lengwaar gǝsar mǝ can wubias mǝn mǝ nkwak nyi kaa shepɓeel, mǝn par ɓit wukun ɓǝ bǝn yagal." ⁸ Surǝm nanyi mǝ ɗyedǝr ɓǝlǝp afe, ⁹ mǝn mǝ nyit gǝcer nanyi wak mǝ laa jepe nanyi dip dǝr muop wusarkaagǝme hǝ gǝ gǝshang. ¹⁰ Mariya gurum Makdala, gǝ Yuwana, gǝ Mariya nǝgǝn Yakubu, gǝ gǝshang surǝp mǝ yakdang jepe nhǝ dip pǝn jeplep. ¹¹ Mǝn jeplep mǝ kat gǝye a lǝfu baan dat, mǝn mǝ pǝn naduk nsurǝp nanyi mou. ¹² Nau gǝ kam hǝ, mǝn Biturs yaal yak mwaan gǝpe gǝcer nanyi, dugum gǝ naape yi mǝn naa byaatwum ɗakɗok mmeshak. Lat mǝn Bitrus yagal waa lǝnyi, ɗe gǝ rang bii wu taa nanyi. ¹³ Gurum vǝl nɗǝgǝn jepgǝdǝr parde dok muop mmwaan yaa memǝ fungwang wu gǝ mǝ yong shi Imawus a bit nani, kabi mel kun kan gurum tong nUrushalima. ¹⁴ Dok muop pǝ ɓagalkaa jepe wu tǝk hǝ. ¹⁵ Muop pǝ ɓagalkaa gǝ ɓǝlǝpnang dǝrshak mǝn Yesu ɗellang mǝn mwaan gǝpe gǝme gǝ muop. ¹⁶ Mǝn yitmuop naa nyi man mou. ¹⁷ Yesu nang fu muop yen, "Gu lǝngɗok gǝwar gun vǝl fu ɓagalɓǝlǝp a kaa me kam mǝ?" Mǝn mǝ ɗyam gǝ tookmuop a wudǝdam. ¹⁸ Nde muop wu sǝm a Kliyopas, lap fu muup yen, "A gǝ dat nɗǝgǝn Urushalima wu nǝ gǝ man jepe wu tǝk nnǝgǝn nɗǝgǝn ɓit muop nhǝ a?" ¹⁹ Yesu laa gǝ muop yen, "A jepe me?" Mǝ lap yen, "Jepe gǝkaa Yesu gurum Nazaret wudok nyi a wukaafung, wu can jepe wunan gǝ ɓǝlǝp wuret ntagam Naan gǝ gurum dip, ²⁰ mǝ ndaawang wunan mǝkangkaamu mǝ pǝn nyi ɗepin gap shep muut kaa muop mǝn mǝ tǝ nyi gǝ shepɓeel. ²¹ Dok mǝ ɗye mǝ kat a nyi par gǝ angka Izraila. A kam, jepe nhǝ cin ɓit kun shiwu tǝk hǝ. ²² Mǝn pak surǝp wu gǝnaar mu wu mǝ mwaan gǝpe gǝcer nanyi mok gǝɓit hǝ, mǝ laa ɓǝlǝp wu rǝng mǝn. ²³ Shiwu mwaan mǝ kat shishik muup mou mǝn wakjya mǝ yen du naa mǝwong wu laa yen nyi nkagam. ²⁴ Pak daas wudok mǝn gǝpe gǝme gǝ muop mǝ mwaan gǝpe gǝcer nanyi mǝn mǝ kat a kabi wu surǝp mǝ laa hǝ. Mǝn mǝ naa nyi mou." ²⁵ Yesu laa dǝr muop yen, "Haa wuyogor muop, wu bǝzung gu gǝ ɓǝs pǝn naduk mɓǝlǝp wudok mǝkaafung mǝ laa hǝ mou! ²⁶ Dok Kristo gǝ sua tǝgǝrciin jepe muop nhǝ a lengwaar she rǝ nɗǝgǝn yoon afe mo?" ²⁷ Lat mǝn Yesu she shi Musa gǝ ɓǝlǝp mǝkaafung dip mǝn kaggǝyit jepe wu nɗǝgǝn bangbyiran kaa muup hǝ dip. ²⁸ Mǝ wulduk gǝ pee wuɗyin mmwaan mǝn Yesu cin kabi wu nyi a mpe ɗel. ²⁹ Mǝn mǝ dǝn shimuup mǝ yen, "Teer shiɓǝt mu nsa pee mang kansǝgǝn gwe." Mǝn Yesu mwan gǝdǝr muop. ³⁰ Shiwu dǝr muop mpe sǝ mǝn mang nawe, lang wuret akaa, tarap ɗǝgǝn mǝn pǝn mmuop. ³¹ Lat mǝn yit muop ap mǝn mǝ naa nyi man, mǝn lan ba mǝ kat nyi mou. ³² Lat mǝn mǝ laa dǝrshak mǝ yen, "Kan ɗyin bǝzung mu saan shiwu nyi fu kaggǝyit bangbyiran muop mmǝn mou mǝ?" ³³ Mǝn mǝ yigil wagap shii nanyi wakdǝr Urushalima. Mǝ kat muop wu sarkaagǝme hǝ shi ɓǝtshak, gǝ muop wudok muop nnǝgǝn, ³⁴ wu mǝ yen, "Miskagam yagal wagap a naduk, mǝn nyin kaashik nSiman." ³⁵ Lat mǝn mǝ laa jepe wu tǝk gǝwar hǝ, gǝ wudung Yesu nyin kaashik mmuop shi nawe wu tarap hǝ. ³⁶ Muop fu laa dat kam mǝn Yesu ɗellang gǝnaar muop, mǝn laa gǝ muop yen, "Tongcagap lang gǝpe gǝme gǝgu." ³⁷ Mǝn mǝ ɗaar mǝn mǝ yigil lugat nsa mǝ kat kwǝt dun fu naa a mǝrip. ³⁸ Yesu laa gǝ muop yen, "A na gu weel e? A na gu fu ɓǝlǝpnang mbǝzung gu e? ³⁹ Gu naa sarnǝ, gǝ kwaknǝ, kwǝt a an gǝ kaasan. Gu ɓwam an ɓǝ gu man. Nsa mǝrip bii nyi gǝ nan shishik gǝ ǝgǝs gǝbi wu gu naa an gǝnyi hǝ mou." ⁴⁰ Laa lat kam mǝn nyin sarmuup gǝ kwakmuup mmuop. ⁴¹ Mǝn mǝ pǝn naduk mou nsa tookpya, kang rǝng muop. Yesu laa gǝ muop yen, "Gun gǝ me mǝbi dǝr sǝ a?" ⁴² Mǝ pǝn cerǝp wu mǝ wus hǝ nnyi, ⁴³ mǝn lap aar gǝyit muop. ⁴⁴ Mǝn laa gǝ muop yong "Shiwu dok an gǝpe gǝme gǝgun hǝ, a laa a yong jepe wudok mǝ ran nɗǝgǝn byitǝt nung Musa gǝ nung mǝkaafung gǝ wudung nyi nɗǝgǝn see hǝ gǝ kǝgǝt a lengwaar." ⁴⁵ Lat mǝn ap yitmuop ɗepin mǝ mǝ mankang bangbyiran muop yi. ⁴⁶ Laa dǝr muop yong "Mǝ ran ɗen gwe kwǝt Kristo gǝ sua tǝgǝrciin ɗǝng she mǝn yagal shizak gǝnaar mǝdiɗǝm par ɓit wukun. ⁴⁷ Gǝ mǝ shakɓǝlǝp bat gǝ konwubias a nɗǝgǝn sǝmmuup dǝr gǝyil dip, she shi Urushalima. ⁴⁸ A gun a wu tuamshik kaa jepe nhǝ. ⁴⁹ Gu naa, yong gǝ a lep gǝ bii wu Ndaanǝ pǝsfu akaa hǝ. Gu tugat gǝfǝr ɗe par wu gu kat kamgǝɓǝlǝp wu tong gǝbǝtǝng yi." ⁵⁰ Lat mǝn Yesu pǝt gǝ muop mwaan mǝ ruo dukduk gǝ Betanya. Mǝn ap sar gǝtǝng mǝn lang wuret kaa muop. ⁵¹ Shiwu nyi fu lang wuret kaa muop dat mǝn nyit muop mǝn mǝ mang nyi kaa gǝbǝtǝng gǝnyi. ⁵² Lat mǝn mǝ wap nyi mǝn mǝ yok dǝr Urushalima gǝ tookpya wu gagam. ⁵³ Dok bii muop dat kwang nɗǝgǝn lǝwap wuyoon, muop fu pyap Naan.