¹ Dok byisǝ nung nawe wu nyang nkwǝt gǝ yis hǝ wulduk, gǝ mǝ yong shi Gapɗel. ² Mǝnan ndaawang mǝbyiran mǝ ɓagalkaa war wu gǝ mǝ tǝ Yesu yi, nsa dok mǝ yigil lugat gurum muop. ³ Mǝn Shetan rǝ nbǝzung Yahuza Iskariyoti wudok nyi a pak muop wu wu sarkaavǝl hǝ. ⁴ Yahuza mwaan dǝr mǝnan ndaawang gǝ mǝlǝng tagam mǝn ɓagalkaa war wu nyi yong gǝ seet gǝ Yesu mmuop. ⁵ Dok took muop pya mǝn mǝ ɗem dǝr yong pǝn shagal yi nnyi. ⁶ Lapɗem mǝn tang war wu gǝ pǝn Yesu yi mmuop njong gǝ gurum muop. ⁷ Wawul shi ɓit nawe wu nǝ nkwǝt gǝ yis hǝ, gǝ mǝ gap latǝm Gapɗel parde a tiit. ⁸ Lat mǝn Yesu lep Bitrus muop gǝ Yahaya yen "Mwaan gu cinpe mmǝn mpe dǝ byisǝ Gapɗel, ɗewar mǝ sǝ yi." ⁹ Mǝ nang fu muup mǝ yen, "Gǝ tangkop mǝ cinpe nanyi ane?" ¹⁰ Mǝn lap yen, "Gu kǝlǝng a, gu ruo gǝfǝr nanyi, ɓǝ me dagwo gǝ sha-am kang gun. Gu mwaan gǝdǝr muup nlǝ wu nyi rǝ hǝ. ¹¹ Ɓǝ gu laa dǝr wupinlǝ nanyi gu yen 'Wusheepee yen, "Ɗe lǝ mǝzep wu gǝ a sǝsǝ Gapɗel gǝ jepgǝdǝrnǝ ane?'" ¹² Nlat ɓǝ nyin me ɗǝgǝnlǝ mǝlang nggun. Gu cinpe nnǝgǝn. ¹³ Mwaan mǝ kat pee nanyi kabi wu nyi laa gǝmuop hǝ. Mǝn mǝ myap pee sǝ Gapɗel nnǝgǝn. ¹⁴ Wawul a shik mǝn tong gǝpe gǝme gǝ jeplep afe. ¹⁵ Lat mǝn laa gǝ muop yen, "A caa mang a sǝsǝ Gapɗel nhǝ gǝpe gǝme gǝgun nɗang she a sua tǝgǝrciin. ¹⁶ Nsa an fu laa gǝgun, she yi a sǝ nde shizak mou, ɗe a par wu gǝ waa nrǝ nogot n-yillong Naan dat". ¹⁷ Lat mǝn Yesu mang foon, mǝn ɗǝkyil mǝn yen, "Gu lap gu shap gǝnaar gu. ¹⁸ Nsa a laa gǝgun, she a sua nde amlaatǝng shizak mou, ɗe a par wu yillong Naan gǝ wul hǝ dat." ¹⁹ Lat mǝn mang nawe, mǝn ndangkong ɗǝkyil, mǝn tarap ɗǝgǝn mǝn pǝn muop yen, "Ndung a shishiknǝ wu gǝ a pǝn gun hǝ. Tong gu can kam ɗǝ gu ɗyedǝr nǝ yi." ²⁰ Ndangkong mǝ sǝ sǝteer mǝn mang foon mǝn yen, "Foon nhǝ a byilaaɗen wufuo nɗǝgǝn tǝgǝm anǝ wu gǝ mǝ kon mpe gu. ²¹ Ɗe gu lǝng engu. Dagwo wu gǝ seet gǝ an hǝ nyi shiɓǝtnǝ fu sǝ gǝkaa tebul. ²² Nsa Laa Gurum nyi mmwaan kabi wujet ɗenɗok gwe hǝ. Ɗe lat nkaa dagwo wu gǝ seet gǝ nyi hǝ!" ²³ Mǝn mǝ ɓǝm ɓagalkaa dǝrshak nkwǝt a wuɗa gǝnaar muop gǝ cin bii nakam o. ²⁴ Lat mǝn jagar taa gǝkang muop nkwǝt a wuɗa a wuyoon dip gǝnaar muop o. ²⁵ Mǝn laa dǝr muop yen, "Long nung Mǝjong bii a muop a mǝpyanlǝ nka muop, muop wu gǝ kamshik hǝ, a muop a mǝcan wuret nggurum gǝdu. ²⁶ Nǝmuk gǝ kwǝt a kam mou. Mǝgwo wu a wuyoon dip gǝnaar gu gǝ waa kabi laa wucom, mǝgwo wu a nyi gǝ kyen maa gurum dip gǝnaar gu a nyi gǝ waa kabi frang hǝ. ²⁷ Nsa a wuɗa a wuma nde yi, a gurum wu tongɗok fu sǝ a, a gurum wu fu shap sǝ yi? A gurum wu tongɗok fu sǝ mou a? Nau gǝ kam, an gǝnaar gu kabi wushap sǝ hǝ. ²⁸ A gun gu lǝngɗok gǝɗǝrnǝ nɗǝgǝn katshii anǝ. ²⁹ A pǝn yillong nggun kabi wu ndaanǝ pǝn yillong n-an hǝ, ³⁰ ɗepin gu sǝ mǝn gu sua yi gǝka tebul nɗǝgǝn yillon anǝ, mǝn gu tugat kaa pǝtong-long gu sheep seen Izraila muop wu sarkaavǝl yi. ³¹ Siman, Siman, gǝ mang Shetan tangpe ɗewar wang gun yi kabi fiin hǝ. ³² Mǝn a ɗangnaan yong ba pǝnnaduk agǝ nzugum. Ndangkong gǝ waa gǝwul shizak ɓǝ gǝ kwaskwak mǝjepnang." ³³ Bitrus laa yen, "Miskagam, gǝ a mwaan gǝdǝr gǝ nlǝɓal ba nwaa a muut ɓǝ nau a nyi." ³⁴ Yesu lap yen, "A laa gǝgǝ, Bitrus, deelkoo yong gǝ tokshik cinyi nǝ gǝ cii man an sar kun mou." ³⁵ Lat mǝn Yesu laa gǝ muop yen, "Dok shiwu a lep gun nǝ nbangshagal, gǝ mǝbi nɗǝgǝn shang, wa kogop mou hǝ, dok mǝbi won nggun a?" Mǝ lap yen "Mǝbi mou." ³⁶ Mǝn laa dǝr muop yen, "Gǝɗǝs hǝ, mǝgwo nkwǝt gǝ bangshagal ɓǝ mang, nau gǝ shang mpe ɗǝk sǝ. Mǝgwo wu nyi gǝ nggo mou ɓǝ seet gǝ byaat afe mǝn seet me. ³⁷ Nsa a laa gǝgun, bii wu mǝ ran kaanǝ mǝ yen, 'Mǝ kun nyi lǝ gǝnaar mǝɓakpe' hǝ gǝ kǝgǝt a tiit. Nsa bii wu dok mǝ laa kaa nǝ hǝ nyi fu waarǝ nogot gwe." ³⁸ Mǝn mǝ yen "Miskagam, gǝ naa! Nggo muop hǝ vǝl." Mǝn laa dǝr muop yen "Lang kam." ³⁹ Ndangkong sǝteer mǝn Yesu mwaan Gǝpan Tǝng Paat kabi wujet gǝ cam hǝ, mǝn jepgǝdǝr mǝ lǝnggdǝr muup. ⁴⁰ Mwaan mǝ ruo mǝn laa gǝ muop yen, "Gu ɗangnaan ya gu ruo nɗǝgǝn katshii." ⁴¹ Yagal nyit muop, mwaan dat lee mǝn dugum gǝ frǝm mǝn ɗangnaan, ⁴² yen, "Ndaa, ɗyin gǝ ɗem ɓǝ gǝ ba gǝ foon nhǝ n-an. Nau gǝ kam, gǝ kwǝt a cin anǝ mou, ɗe a nǝmak." ⁴³ Lat mǝn me mǝwong tong gǝbǝtǝng sam pǝn tugurduan nnyi. ⁴⁴ Muutlaa dogol mǝn ɗangnaan wagap swet ba peɓaan afe waa kabi tǝgǝm mǝn wat n-yil. ⁴⁵ Shiwu yagal fu ɗangnaan mǝn waaji dǝr jepgǝdǝr mǝn kat muop nsaam nsa tookdam. ⁴⁶ Mǝn tal fu muop yen, "A na gun fu saam ye? Gu yigil gu ɗangnaan, ya ba gu ruo nɗǝgǝn katshii." ⁴⁷ Nyi fu lǝfu dat mǝn gurum kǝrgǝi mǝ ɗyilǝnglǝng, gǝ Yahuza wudung a pak muop wu sarkaavǝl hǝ, a nyi langtagam muop. Ji dukduk gǝ Yesu ɗepin kangfu yi gǝnyi, ⁴⁸ mǝn Yesu laa dǝr muup yen, "Yahuza, gǝ gǝwar seet gǝ Laa Gurum a shi kangfu a?" ⁴⁹ Muop wu shiɓǝt Yesu mǝ naa kam mǝn mǝ yen, "Miskagam, mǝ san muop shi nggo a?" ⁵⁰ Lat mǝn me muop cit frang ndaawang wukakǝgǝt mǝn gap kom muop wu ndasǝ. ⁵¹ Yesu yen, "Lang kam!" Mǝn ɓǝm kom frang nanyi mǝn ɗak nyi. ⁵² Yesu laa gǝ ndaawang wunan, gǝ mǝnaakaa lǝwap wuyoon, gǝ daskagam wu mǝ ɗyam n-yitmuup hǝ yen, "Gu jya dǝr nǝ gǝ cuk gǝ kur kabi wu gu jya a dǝr kulǝp a? ⁵³ Shi wudok an gǝpe gǝme gǝgun shiɓit-shiɓit nlǝwaap, dok gu yaa an mou. Ndung a ɓit agu, gǝ kamshik nung kwoo." ⁵⁴ Mǝ yaa nyi mǝn mǝ yigil gǝnyi, mwaan lǝ ndaawang wukakǝgǝt. Mǝn Birtus langgǝdǝr njong. ⁵⁵ Ndangkong wu mǝ ɓil wus ntǝlǝng gǝpang, mǝ tugat lat mǝn Bitrus tong gǝnaar muop. ⁵⁶ Me lareep wu a frang hǝ naa nyi ntong n-yit wus, lang yit kǝr shi muup mǝn yen, "Dagwo nhǝ dok nyi gǝpe gǝme gǝnyi." ⁵⁷ Mǝn Bitrus cii yong "Namat, an a man nyi mou." ⁵⁸ Com dat mǝn nde mǝgwo naa nyi mǝn yong, "Gǝ zak a nde muo.p" Mǝn Bitrus yong, "Dagwo, a an mou." ⁵⁹ Ndangkong shii gǝme mǝn nde dagwo ɓagal negerneng yong, 'Nung naduk dagwo nhǝ dok nyi gǝpe gǝme gǝnyi, nsa nyi a gurum Galili." ⁶⁰ Mǝn Bitrus yong, "Dagwo, a man bii wu gǝ fu laa mou." Nyi fu laa dat kam mǝn deelkoo tokshik. ⁶¹ Miskaam bat naa Bitrus, mǝn Birtus ɗyedǝr ɓǝlǝp wudok Miskagam laa gǝnyi, shiwu yong, "Deelkoo ya ntokshik cinyi ɓǝ gǝ cii man an gwe waarǝ kun." ⁶² Bitrus yagal pǝt gǝɓang mǝn goor wal. ⁶³ Lat mǝn daas wu fu kangkaa Yesu hǝ mǝ zhal nyi mǝn mǝ nas nyi. ⁶⁴ Mǝ sǝp bii kaamuup mǝn mǝ nang fu muup mǝ yen, "Laa ɓǝlǝpkaafung! A wuɗa cit gǝ ye?" ⁶⁵ Mǝn mǝ laa pak ɓǝlǝp wubaan kaa Yesu, mǝ dam sǝmmuup. ⁶⁶ Ɓit ɓang dat mǝn daskagam mǝ tǝl kǝshak, ndaawang wunan gǝ mǝbyiran. Mǝ mwaan gǝnyi ntagam gǝwur daskagam ⁶⁷ mǝn mǝ yong, "Ɗyin gǝ a Kristo ɓǝ gǝ laa gǝ mǝn." Mǝn laa dǝr muop yong, "Ɗǝ a laa gǝgun ɓǝ gu pǝn nadku mou, ⁶⁸ ɗǝ a nang fu gu ɓǝ gu lap mou. ⁶⁹ She shi gǝɗes hǝ, Laa Gurum gǝ tong gǝsar dasǝ nung kamgǝɓǝlǝp nung Naan." ⁷⁰ Mǝn muop dip mǝ yong " Ɓǝ gǝ a Laa Naan a?" Yesu laa dǝr muop yong, "A laa gu yong an a kam hǝ." ⁷¹ Mǝ yen, "Mǝ tang wutuamshik a mpe me? Nsa mǝn gǝ kaasun mǝ kǝlǝng fumuup."