¹ Mǝn Yesu epyit naape gǝtǝng mǝn naa mǝlǝlong pǝ ɗǝk shagal ntugul shagal. ² Mǝn naa me matkaa dǝk kobo vǝl. ³ Mǝn yen, "A la naduk gǝgun, matkaa wupya nhǝ dǝk bii wu ma nǝmuop dip. ⁴ Nsa muop dip mǝ pǝn a nɗǝgǝn nǝmuop wu ɗuar hǝ. Ɗe matkaa nhǝ, nɗǝgǝn pya afe, ɗǝk bii wu nyi gǝnyi hǝ dau gǝ nung sǝ afe." ⁵ Shiwu pak gurum mǝ laa ɓǝlǝp kaa lǝwap wuyoon, kabi wu mǝ daa nyi shi pang wuret gǝ byipǝn, mǝn yen, ⁶ "Jepe wu gun pǝ naa nhǝ, ɓit kwǝt nwawul wu gǝ mǝ nyit me pang gǝkaa nde nyang mǝ ntugan nzwam mou." ⁷ Mǝn mǝ tal fu muup mǝ yen, "Wusheepee, ɗe jepe nhǝ mǝ tǝk a gǝshii me? A bii me par gǝ nyin nkwǝt jepe nhǝ gǝwar tǝk e?" ⁸ Yesu lap yen, "Naa mǝgwo yong nfuǝn gun. Nsa gurum gak yong par gǝ mǝ wul nɗǝgǝn sǝmnǝ, mǝn mǝ n-yen, 'A an a nyi,' mǝn mǝ n-yen, 'Shii wulduk gwe.' Gu mwaan gǝdǝr muop mou. ⁹ Gu kǝlǝng lekɗyel gǝ jagar, ɓǝ gu yigil lugat mou, nsa jepe nanyi gǝ mǝ ɗǝk nɗǝng, wutǝs gǝ kwǝt bǝr mou." ¹⁰ Lat mǝn laa ɗǝr muop yen "Gǝyil par gǝ yagal nɗar n-yit nde gǝyil, yillong gǝ yagal nɗar n-yit nde yillong. ¹¹ Yilsugun wunan yong gǝ kwǝt, mǝn gǝzǝm gǝ tǝɗǝp gǝ ɗak dat mpee dǝɗyak-dǝɗyak. Jepe wu lugat gurum par tǝk gǝ byinyin wunan gǝbǝtǝng. ¹² Par gǝ mǝ yak gun mǝ ntuang gun, mǝ nzwam gun nlǝwap gǝ lǝɓal, mǝ mmwaan gǝgun ntagam long muop gǝ gwopna muop nsa sǝmnǝ, ɗǝng she jepe nhǝ tǝk. ¹³ A kam ɓǝ gu katwar tuamshik. ¹⁴ A waa nnyi, gu yaawar gu tang bii ɓenkaa suk mou, ¹⁵ nsa gǝ a pǝn lǝfu gǝ soon nggun, ndung wukasgu gǝ mǝ ɓoot pǝ nyang mǝn mǝ yaa nvin mou. ¹⁶ Ndaagu, gǝ mǝjepnung gǝ mǝmyagu gǝ mǝshaargu yong gǝ mǝ pǝn gun mǝn mǝ ntuo pak gu. ¹⁷ Gurum dip yong gǝ mǝ nyangyit gu nsa sǝmnǝ. ¹⁸ Nau gǝ kam me ɗyipkaagu gǝ latbaan mou. ¹⁹ Yong gu angkaa celemgu a shi mogorkung agu. ²⁰ Ɗǝ gu naa gǝwur mǝlekɗyel mǝ gar Urushalima, ɓǝ gu man ɓit rugup afe waarǝ. ²¹ Nkwǝt kam ɓǝ muop wu nYahudiya hǝ mǝ suo kaa pang, muop wu gǝnaar gǝfǝr hǝ mǝn yigil, mǝn gu nyit muop wu ndangkong gǝfǝr mǝ nruo mou. ²² Nsa ɓit muop nanyi a nung yaawaap, ɗepin jepe wudok mǝ ran gwe hǝ waarǝ yi nogot. ²³ Lat nkaa muop wu gǝ gǝrang gǝ muop wu gǝ jep fu sua yugur gǝshii nanyi! Nsa par gǝ kwǝt a ɓit tookdam wugagam, mǝn dǝfil Naan gǝ sam kaa gurum. ²⁴ Par gǝ mǝ tuo muop mǝn mǝ nkok muop a kuramlek nwakdǝr gǝyil mǝpe gǝ muop. Mǝjong gǝ mǝ dal Urushalima, ɗǝ a ɓit amuop par gǝ waa nrǝ dat. ²⁵ Byinyin par gǝ mǝ kwǝt n-yit fuus, gǝ tar gǝ ɗagar muop gǝ gǝyil. Gǝyil gwet yong gǝ mǝ kat weel gǝ lugut nsa liis am gǝ or cip. ²⁶ Gurum par gǝ ɗuam nangkotom nsa lugat gǝ enɗye kaa jepe wu fu ɗak gǝyil hǝ. Nsa par gǝ mǝ yogop kamǝɓǝlǝp gǝbǝtǝng. ²⁷ Par gǝ mǝ naa Laa Gurum ntongwul gǝkaa ligin gǝ kamgǝɓǝlǝp gǝ yoon wugagam. ²⁸ Shiwu jepe nhǝ mǝ ɓǝm ɗak ɓǝ gu yigil gǝtǝng mǝn gu ap kaagu gu naa gǝtǝng yi nsa ɓit angkaa wul a shik. ²⁹ Yesu laa me ɓǝlǝpkwoom gǝ muop yen, "Gu naa tǝng wut, gǝ gogot tǝng muop. ³⁰ Mǝ n-or, ɓǝ gu naasuk mǝn gu yen pas wul a shik. ³¹ A kam zak, ɗǝ gu naa jepe nhǝ pǝ tǝk, ɓǝ gu man nkwǝt yillong Naan wul a shik. ³² A laa naduk yi gǝgun, yii yigil nhǝ gǝ ɗel nyang jepe nhǝ ntǝk mou. ³³ Gǝbǝtǝng gǝ gǝyil yong gǝ mǝ ɗyelǝng, ɗe a ɓǝlǝp anǝ gǝ ɗel mou. ³⁴ Gu lǝng engu yong ba gu ɗe sua muos mǝn gu gǝl, nau gǝ weel gǝyil, mǝn ɓit nanyi nggap gun mmang brat kabi gwak hǝ. ³⁵ Nsa yong gǝ wul nkaa gurum dip wu muop nkagam gǝyil hǝ. ³⁶ Gu tugat gǝ engu kwang, gun fu ɗangnan ɗepin gu kat ɓal mpe fatnfu jepe wudung yong gǝ tǝk yi, ɗewar gu ɗyam yi ntagam Laa Gurum." ³⁷ Dok bii nfuus ɓǝ langɗok fu sheepee nɗǝgǝn lǝwap wuyoon, nlǝpar ɓǝ mwaan gǝ tong gǝ Pang Muor Paat. ³⁸ Gurum dip bii mǝ fwat gǝɓit mwaan mǝ kǝlǝng nyi yi nɗǝgǝn lǝwap wuyoon.