¹ Me mə ɓit wu Yesu nyi fu sheepee nɗəgən lǝwap wuyoon mǝn nyi fu shakɓəlǝp langship, mən mǝndaawang wunan gə mǝbyiran gǝ daskagam mə jya dər muup. ² Mə laa ɓəlǝp gǝnyi mǝ yen, "Laa gə mǝn, gə fu can jepe muop nhə a shi kamshik me? A wuɗang pən kamshik ndung nggǝ yi?" ³ Lap fu muop yen, "An zak gə a nang ɓəlǝp fu gu. Gu laa mǝbi gə an gəkaa ⁴ kənpe nung Yahaya. Dok tong a gəbətǝng a, tong a dǝr gurum e?" ⁵ Mən mə ɓagalkaa dǝr shak mǝ yen, "Ɗǝ mə yen, 'Tong a gəbǝtǝng,' ɓǝ yen, 'A waa mme dok gu pǝn naduk nnyi mou e?' ⁶ Ɗǝ mə yen, 'Tong a dǝr gurum,' ɓə gurum dip yong gə mə zwam mən shi pang, nsa mə ɗem nkwət dok Yahaya a wukaafung." ⁷ Lat mən mə lap yen du man pee wu tong nnǝgǝn mou. ⁸ Yesu laa gə muop yen, "An zak gǝ a laa kamshik wu an fu can jepe nhǝ gǝnyi mou." ⁹ Laa ɓəlǝpkwoom nhə gə gurum muop yen, "Me dagwo kaa təng gǝnaar mar afe, mǝn pən gurum mǝkagar tǝng mǝ naakaa kǝ shagal mǝn mwaan gǝ tong nde gǝyil wagap veet. ¹⁰ Kun ɓit waarə mən lep frang dər mǝmar nanyi ɗepin mə pǝn pak jepe mar nanyi yi nnyi. Mən mǝkagar tǝng nanyi mǝ nas frang nanyi mǝn mə cen nyi waa gǝ sar wufii. ¹¹ Bən lep nde frang mǝn mə bǝn nas nyi, mə cinkləng gǝnyi mən mə cen nyi waa gǝ sar wufii. ¹² Bən lep wukun mən mə pəngok nnyi mən mə cen tak. ¹³ Lat mən wupin mar nanyi yen, 'Ɗe gə a cin a me? Gə a lep laa gəɗam anə. Ɗong ɓǝ mə pǝnmaa nnyi.' ¹⁴ "Mǝkagar tǝng nanyi mǝ naa laamuup dat mǝn mǝ ɓagalkaa dǝr shak mǝn mǝ yen, 'Ndung a nyi a wuteerkop. Mə tə nyi, ɓə byikop nanyi ɗe a nəmuun.' ¹⁵ Mə del nyi gənaar mar fwat gǝnyi mǝn mə tə nyi. Ɗe wupin mar gə cin a me gə muup e? ¹⁶ Waaji gǝ tuo mǝkagar tǝng nanyi mǝn mpən mar nanyi nde gurum muop." Mǝ kələng kam mǝn mə yen "Gǝ taa kam mou!" ¹⁷ Yesu lang yit naa muop yi, mən yen, "Ɗe bii wu mǝ ran ɗen nhǝ laa yen a me: 'Pang wu mǝɗyak lə mə nyang a nyi waa pang kugur'? ¹⁸ Gurum wu pal gə pang nanyi ɓə gə tərap nwaa cigit. Ɗǝ pang mpəttaa kaa muup ɓə byagas nyi." ¹⁹ A waa nsa kam mən mǝbyiran gə mǝndaawang wunan mə tang ɗyin mə naa nyi gəshii nanyi, nsa mə man nkwǝt laa ɓǝlǝpkwoom nanyi a kaa du. Mǝn mǝ yigil lugat gurum muop. ²⁰ Muop fu lǝngyit naa nyi, mən mǝ lep pak gurum mwaan mǝ ɓong nyi, tongku a gurum wukǝr ɗewar mǝ kǝlǝng mǝbi wubis wu gǝ tongpǝt nlǝfumuup yi, man ɓǝ mǝ yaa mwaan ntagam gwopna gǝnyi. ²¹ Mə nang fu muup mə yen, "Wusheepee, mə man bii gə laa ɓələp wukǝr mən gə shee gurum gǝ bii wukǝr, mǝgwo gǝ dung gǝ mou; bii gə sheepee gǝ naduk gəkaa war nung Naan. ²² Ɗong ɗyin mǝ wap gǝndung mǝ pǝn Kaisar ah, mə wap mou e?" ²³ Mən Yesu man muop fu lǝng a gwak, mən laa gə muop yen, ²⁴ "Gu nyin me ǝkshagal n-an. A riin gə səm wuɗang gǝkaa muup e?" Mə yen, "A nung Kaisar." ²⁵ Mən laa gə muop yen, "A kam ɓǝ gu pən bii wu a nung Kaisar hə nKaisar, gu pǝn bii wu a nung Naan hǝ nNaan." ²⁶ Mə kat məbi wubis nɗəgǝn lǝfu wu laa ntagam gurum muop hǝ mou; rǝng muop mǝn mǝ ɗok kot. ²⁷ Pak Sadukiyawa mə jya dər muup, muop wu nyang nkwǝt gurum gǝ yagal ntugun mou hə, ²⁸ mə nang fu muup mǝ yen, "Wusheepee, Musa yil pǝn mən nkwət ɗyin emnəgən mǝgwo mmuut nnyit mat, gə lalaa mou ɓə dagwo nanyi lap namat nanyi mən ɓak jep ɗək nkop emnəgənmuup. ²⁹ Dok mə gurum muop pogovəl a daas a məjepnəgən shak, mən wupel lap mat mən muut nə nlaa, ³⁰ mən wuvəl bən a kam sə. ³¹ Mən wukun lap namat nanyi; a kam mǝn muop wupogovəl nanyi dau mǝ lap nyi mǝn mǝ ɗǝm, me muop nyit lalaa mou. ³² Lat mən namat nanyi zak muut. ³³ Ɗe par yigil ntugun ɓə namat nanyi gǝ kot a mat wuɗa? Nsa muop dau pogovəl mə lap nyi." ³⁴ Yesu laa gə muop yen, "Jep gədes hə bii mǝ lap surǝp mǝn mǝ mwaan ɗyak. ³⁵ Muop wu mǝ mak nfu yigil ntugun hǝ gǝ mǝ lap surǝp ɗǝ mǝn mwaan ɗyak yi zak mou. ³⁶ Muop gə mə ɗwam shizak mou nsa muop ncat gə məwong, mən muop a jep Naan, a jep yigil ntugun. ³⁷ Nung ndung mǝdiɗǝm gǝ mǝ yigil hǝ, dok Musa nyin shi bii wu dok kat nyi ngǝgǝr hǝ, a nnǝgǝn mǝn yong Miskagam shi Naan Ibrahim gə Naan Ishaku gə Naan Yakubu. ³⁸ Nyi a Naan mǝdiɗǝm mou, nyi a Naan gurum wukagam muop, nsa dǝr muup ɓǝ gurum dau a nkagam." ³⁹ Pak məbyiran mə lap yen, "Wusheepee, gə lap nyit." ⁴⁰ Nsa tugur muop duan mpe nang nde məbi fu muup zak mou. ⁴¹ Yesu laa dər muop yen, "A waa mme bii mə yen Kristo a laa Dauda yi? ⁴² Nsa Dauda gə kaashik laa nɗǝgǝn Byiyil See, yen, Miskagam laa dər Miskagam anə, 'Tong gəsarnə wumis, ⁴³ ɗe a par wu gǝ a saa wukasgǝ nwaa pǝtǝp kwak gǝ.' ⁴⁴ Dauda yong Kristo shi 'Miskagam', cin a na nkwǝt nyi a laa David ye?" ⁴⁵ Gurum dip fu kǝlǝng nyi mǝn laa gǝ jepgǝdǝrmuup yen, ⁴⁶ "Gu kang suk gǝ mǝbyiran wudung mǝ tankop mwaanɗok mbyaat wunan mǝn mǝ ɗemkop gurum mǝ nang muop gǝ lǝtuk gǝ pǝtugat wunan nɗǝgǝn lǝwap gǝ pee byisǝ. ⁴⁷ Bii mǝ vogop surəpkaa mən mǝ lǝ fuseer wukukun. Daas kabi muop hǝ, lat baan gǝmuop gǝ kwǝt gagam."