¹ Yesu rə gǝyil Yariko mpe ɗel war yi nnəgən. ² Mən səkang gə məgwo ndung səm muup a Zaka. Nyi a long mǝlap gəndung mǝn nyi a wulǝlong. ³ Tangkop ji man Yesu yi mǝn ɓoot naa nyi mou, nsa gurum ɓǝl mǝn bən nyi wukǝkəp. ⁴ Lat mən yak gəsə ɗel ntagam mwaan gə kaa təng wufyer ɗewar naa nyi yi, nsa Yesu dok nyi nɗel gǝwar nanyi. ⁵ Yesu waarə mbǝdǝr tǝng nanyi mǝn epkaa naa nyi mǝn laa gǝnyi yen, "Zaka, sam gǝtaa bər, nsa yi gǝ a sam a ləgə cinyi." ⁶ Lat mən sam bər mǝn lap nyi gə tookpya. ⁷ Gurum mǝ naa kam mǝn mǝ gwakshik dip, mǝ yen, "Mwaan yaa lǝ dagwo ndung gǝ can wubias." ⁸ Zaka yagal ɗar mən laa gə Miskagam yen, "Gə naa Miskagam, gǝ a gap ɗǝgǝn byilong anə vǝl mǝn a shen nde nwupya muop, ɗyin dok a vogop məgwo kaa məbi, ɓǝ gǝ a bǝp feer a pǝn wupinnyi." ⁹ Yesu lap fu muup yen, "Cinyi angkaa rə shi lə nhə, nsa nyi zak a laa Ibrahim. ¹⁰ Nsa Laa Gurum wul a dǝr tang gurum wudok mə lən ɗepin angkaa muop yi." ¹¹ Muop fu kələng jepe nanyi wa nyi a fu ɓəlǝp dat gǝ laa yi, mǝn laa me ɓəlǝpkwoom, nsa dok nyi dukduk gə Urushalima, mən gurum mə ɗye kat yillong Naan yong gǝ nyin kǝshik a bǝr. ¹² Mən laa yen, "Dok me məgwo wuyoon mwaan mme gǝyil wusəng ɗewar mwaan mǝn pǝs nyi yi a long man ɓǝ wawul. ¹³ Mən yong frang afe muop sar mən pǝn ǝkshagal sar mmuop, mən laa gə muop yen, 'Gu cin lətuk gənyi gu naa wawul gǝ nə yi.' ¹⁴ Mən gurum afe muop mə nyangyit muup mǝn mǝ tak lep gǝdər muup mǝ yen, 'Gǝ mə nyit dagwo nhə nwaa long kaa mu mou.' ¹⁵ Dagwo ba lap long nanyi mǝn wawul, mǝn tak lep mǝ yong frang afe muop wudok shen shagal mmuop hǝ, ɗepin man kopgǝshii wu mǝ kat shi glong wu mǝ can yi. ¹⁶ Wupel ji ntagam muup, mǝn laa yen, 'Miskagam, ǝkshagal gǝgǝ kat kopgǝshii sar.' ¹⁷ Dagwo laa gənyi yen, 'Ho nggǝ frang wukər. Nsa gə ɗarɓal gəkaa bii wu til, yong a pən kamshik nggǝ kaa gǝfǝr sar.' ¹⁸ Wuvəl waaji, mǝn yen, 'Miskagam, ǝkshagal agǝ kat kopgǝshii paat.' ¹⁹ Dagwo nanyi yen, 'Gə kamshik kaa gǝfǝr paat.' ²⁰ Nde waaji, mǝn laa yen, 'Miskagam, ǝkshagal agǝ nyi hǝ, dok a cinkǝn nɗǝgǝn tuǝn, ²¹ nsa a yagal lugut gə, nsa bii gə a wuɗem nuǝn. Bii gə mang bii nǝ gə ɗen hə, mən gə ɗyip bii wu nə gə kop hǝ.' ²² Dagwo nanyi laa gə nyi yen, "A sheep gə a shi ɓəlǝp agə, gə a frang wuɓǝtbis. Kan gǝ man an a wuɗem nuǝn, an gǝ a kok bii wu nǝ a ɗǝk hǝ, mǝn a ɗyip bii wu nǝ a kop hǝ. ²³ A me dok dǝn gǝ ɗen shagal anǝ mbanki, ɗepin a wawul ɓǝ a kat nyi gǝ kopgǝshii ye?' ²⁴ Mǝn long nyi laa dər muop wu mə ɗyamɗok hə yen, 'Gu lap ǝkshagal nanyi fumuup mǝn gu pən gwo wu nyi gə ǝkshagal sar hə.' ²⁵ Mən mə laa gǝnyi mə yen, 'Miskagam, nyi gwə gǝ ǝkshagal sar.' ²⁶ 'An fu laa gəgun, mǝgwo wu nyi gə məbi ɓə mə pən nde nnyi, mǝgwo wu nyi gǝ nyi mou, ɗyin nkwət gǝnyi wa til, ɓǝ gǝ mǝ ɗuan fumuup. ²⁷ Ɗe wukasnə muop nhə, muop wu mə ɗemkop a waa long kaa muop mou, gu jya gə muop mpeen mən gu tuo muop dər yit nə." ²⁸ Laa jepe muop nhǝ lat mǝn yagal ntagam, gǝwar kaa yaa nUrushalima. ²⁹ Wul dukduk gə Betfaji gə Betaniya, gə ləɓung ndung bii mə yong shi Zaitun hǝ, mǝn lep jepgǝdǝrmuup vəl, ³⁰ yen, "Gu mwaan nɗəgən gǝfǝr wu ntagam hǝ. Gu ruo ɓǝ gu kat laa gui wu məgwo met duk mou. Gu wut nyi mən gu jya gə nyi n-an. ³¹ Məgwo nnang fugu n-yen, 'A nang gun fu wut nyi yi?' ɓə gu yen, 'Miskagam nyi fu tangkop muup.'" ³² Muop wu mə lep muop hə mwaan mə kat laa gui nanyi kabi wu Yesu laa dər muop hə. ³³ Muop fu wut laa gui nanyi dat mən mǝpyannyi mə yen, "A nsa me gun fu wut laa gui nanyi ye?" ³⁴ Mə lap yen, "Miskagam nyi fu tangkop muup." ³⁵ Mə wak jya gənyi nYesu, mən mǝ swap tuən amuop gǝkaa laa gui nanyi mən mǝ lang Yesu gədap. ³⁶ Nyi fu mwaan mǝn mǝ swap tuən amuop gəwar mǝn ɗel gǝkaa. ³⁷ Dok fu wulduk gǝ pee wu Pang Zaitun yagal zǝm hǝ mən jepgǝdǝrmuup kǝrgǝi mǝ yigil gə tookpya mǝn mǝ pyap Naan gǝ ɗǝgǝl muop bǝɓal nsa ɓǝlang wunan wu mǝ naa hǝ, ³⁸ mǝn mǝ yen, "Wuret lang-nkaa long wu nyi nwul nɗǝgǝn sǝm Miskagam! Mang tugatcagap kwǝt gəbətəng mən yoon a nung Naan!" ³⁹ Pak Farisiyawa gənaar gurum wukǝrgǝi mə laa gǝnyi mə yen, "Wusheepee, ɓyaal jepgǝdǝrgǝ." ⁴⁰ Yesu lap yen, "A laa yi gǝgun, ɗǝ muop nhǝ mə nɗok, ɓǝ pang muop gǝ mǝ zwam ɗəgəl." ⁴¹ Yesu wulduk gǝ gǝfǝr nanyi, mən wal, ⁴² yen, "Cinyi nhǝ, ɗyin gu man jepe wu gǝ wul gǝ tugatcagap ɓǝ ɗyin nɗong! Mən a ne dat yi, muop a wusəsok fu gu. ⁴³ Nsa ɓit kot nwawul, wu wukasgu muop gə mə ɗyak gan nwaat gun gənyi, mǝ nlap gun nlǝ gǝnaar mǝn mə ntulang gun dedat meet. ⁴⁴ Gə mə tuo gun dip gə jepgu. Gǝ mǝ nyit me pang kaa nde mou, nsa ɓit wu Naan mpe angkaa gu hǝ, dok gu naa gu man mou." ⁴⁵ Yesu rə nlewap wuyoon mən ɓəm cen mǝpyan seet gə jepe, ⁴⁶ mǝn laa gə muop yen, "Mǝ ran ɗen gwe nkwət 'Lənə yong gə kwət a pee ɗangnaan,' mən gu bat nyi waa pee kuləp." ⁴⁷ Lat mǝn Yesu fu sheepee shiɓit nɗəgən lewap wuyoon. Mǝndaawang wunan gə mǝbyiran gə mǝlǝngtagam gurum muop mə ɗemkop tə nyi, ⁴⁸ mən mə kat war mou, nsa gurum muop dau fu lǝngkom grǝt kələng nyi yi.