¹ Lat mǝn laa ɓǝlǝpkwoom gǝ muop ɗepin mǝ ɗangnaan yi veet mǝn kwak muop nwaam mou, ² yen, "Me wusheep dok nyi mme gǝfǝr, nyi dok gǝ yagal lugut Naan mou, mǝn gǝ pǝnmaa gurum mou. ³ Me matkaa dok nyi gǝfǝr nanyi, bii jya dǝr ji yong, 'Rǝ gǝkangmu gǝ wukasnǝ depin a kat shik yi'. ⁴ Nungdǝm jet dagwo nanyi ɗem mou, pogot dat mǝn laa dǝrshik yen, 'An wagap de a wu yagallugut Naan ko a pǝnmaa nggurum mou, ⁵ nau gǝ kam nsa matkaa nhǝ weel an fyer, a gǝ a tǝpɓǝt muup nkat shik yi, ya ba nwul shiɓit-shiɓit mǝn ndǝn pǝsnook shinǝ.'" ⁶ Lat mǝn Miskagam yen, "Gu kǝlǝng bii wu wusheep wu nynag kwǝt a wukǝr hǝ laa ko? ⁷ Ɗe Naan gǝ pǝn shik nggurum afe wu gǝ mǝ eer dǝr muup nfuus gǝ lǝpar mo? Gǝ cin daaye gǝ muop a? ⁸ A laa gǝgun gǝ pǝn shik mmuop bǝr. A gǝ kam ɗe Laa Gurum par nwul ɓǝ kat pǝn-naduk gǝyil a?" ⁹ Lat mǝn laa ɓǝlǝpkwoom ndung zak dǝr gurum wu mǝ ɗye mǝ kat dun a wukǝr mǝn mǝ lǝɓak si gogot gurum hǝ, yen, ¹⁰ "Daas vǝl mǝ mwaan nlǝwap wuyoon ɗepin mǝ ɗangnaan yi. Nde a gurum Farisiyawa ɗe nde a wulap gǝndung. ¹¹ Gurum Farisiyawa yaa kǝ ɗangnaan nanyi mǝn laa ɓǝlǝp a kǝ kaashik yen, 'Naan, a ɗǝkyil a naa gǝ yi nsa an a kabi gogot gurum—kulǝp, gurum wubaan, muop wuturǝp gǝ surǝp gurum—ko kabi dagwo wulap gǝndung nhǝ mou. ¹² Bii a sǝnfu nǝ kaa vǝl nɗǝgǝn shiimuos gǝme. Bii a kwat kaasǝ gǝkaa jepe wu a kat hǝ dip.' ¹³ Ɗe wulap gǝndung ɗarɗok nsǝng, ep wa yitnyi naa gǝbǝtǝng yi mou, ɗe gǝ zǝm a kaa dat, nyi fu yen, 'Naan, naacigir anǝ, an a wu cin wubis.' ¹⁴ A laa gǝgun, dagwo nhǝ waa gǝpang a gurum wukǝr maa nde, nsa mǝgwo wu pǝnyoon nkaashik ɓǝ gǝ mǝ sam nyi, ɗe a mǝgwo wu sam gǝ kaashik ɓǝ gǝ mǝ pǝnyoon nnyi." ¹⁵ Gurum zak dok muop fu jya gǝ jep muop wuɗyen dǝr muup ɗepin nyi ɓwam muop yi. Shiwu jepgǝdǝr mǝ naa mǝn mǝ ɓyaal muop. ¹⁶ Mǝn Yesu yong muop dǝrshik mǝn yen, "Gu nyit jep wuɗyen mǝ jya dǝr nǝ, gu dǝn shi muop mou. Nsa yillong Naan a nung gurum kabi muop hǝ. ¹⁷ A laa naduk gǝgun, mǝgwo wu lap yillong Naan kabi laa wucom nhǝ mou ɓǝ gǝ kat war rǝ nnǝgǝn mou." ¹⁸ Me long nang fumuup yen, "Wusheepee wuret, gǝ a cin a me ɗepin a kat tenglang gǝgwoo ye?" ¹⁹ Yesu laa gǝnyi yen, "A nsa me gǝ yong an shi wuret ye? Mǝgwo a wuret mou, ɗe a Naan dat. ²⁰ Gǝ man byitǝt muop—gǝ teer gǝ mat mǝgwo mou, gǝ tǝ gurum mou, gǝ mwaan wat mou, gǝ tuamshik wurum mou, pǝnmaa ndaagǝ gǝ nǝgǝngǝ." ²¹ Long nanyi yen, "A tǝt jepe muop nhǝ gwe dip ɗagat shiwu dok an a laaswaal hǝ." ²² Yesu kǝlǝng kam mǝn laa gǝnyi yen, "Nau kam hǝ mǝbi gǝme won nggǝ. Sarap gǝ byilong agǝ dibbit mǝn gǝ shap ntǝguk muop ɓǝ gǝ kat byilong gǝbǝtǝng—man ɓǝ waaji gǝ langgǝdǝr nǝ." ²³ Long nanyi kǝlǝng jepe nashak mǝn took muup dam nogot nsa nyi dok a wulǝlong. ²⁴ Yesu naa kat took muup dam badǝn mǝn yen, "Gǝ laafu dǝr mǝlǝlong mǝ nruo yi nɗǝgǝn yillong Naan! ²⁵ Nsa kulmi gǝ ɓes nrǝ nfung n-yir ma gurum wulǝlong wu gǝ rǝ nɗǝgǝn yillong Naan." ²⁶ Gurum wu mǝ kǝlǝng ɓǝlǝp nanyi mǝ yen, "Nkwǝt a kam ɓǝ a wuɗang gǝ kat angkaa e?" ²⁷ Yesu lap yen, "Jepe wu ma gurum gǝ ma Naan mou." ²⁸ Bitrus yen, "To, mǝ nyit jepe amu dibbit mǝn mǝ lǝngɗok gǝdǝr gǝ." ²⁹ Lat mǝn Yesu laa gǝ muop yen, "A laa naduk gǝgun, mǝgwo gǝ nyit lǝ ko mat ko mǝjepnǝgǝn ko ndaa gǝ nǝgǝn ko jep nsa yillong Naan hǝ, ³⁰ mǝn kopgǝshii muup nwon gǝyil nhǝ mou; gǝ bǝn nkat tenglang gǝgwoo gǝyil wu ntagam." ³¹ Ndangkong wu tǝl muop wusarkaavǝl hǝ lǝ shiɓǝtshik mǝn laa gǝ muop yen, "Gu naa, mǝ kaa mǝ yaa nUrushalima, jepe wu mǝkaafung dok mǝ ran gǝkaa Laa Gurum hǝ dip yong gǝ mǝ kagat nogot. ³² Nsa gǝ mǝ pǝn nyi mMǝjong, gǝ mǝ zhal nyi, gǝ mǝ cin kǝlǝng nyang-nyang gǝnyi mǝn tuak zeel nlǝ shimuup. ³³ Mǝ mmwak nyi shi nas nlat ɓǝ mǝ tǝ nyi, ndangkong ɓit wukun ɓǝ bǝn yagal." ³⁴ Dok mǝ mankang mǝbi wu nyi laa hǝ mou, mǝ sok ɓǝlǝp nanyi fumuop, mǝn mǝ mankang jepe wu mǝ laa hǝ mou. ³⁵ Yesu wulduk gǝ gǝyil Yariko, mǝn me wuvugum zak tongɗok fukyep war, nyi fu ɗang, ³⁶ dagwo nanyi kǝlǝng gurum kǝrgǝi muop fu ɗyilǝng mǝn nang bii wu taa hǝ. ³⁷ Mǝ laa gǝnyi nkwǝt a Yesu nung Nazaret nyi nɗel. ³⁸ Lat mǝn dagwo wuvugum nanyi tak ɗǝgǝl yen "Yesu, laa Dauda, naa cigir kaa nǝ." ³⁹ Muop wudok ntagam hǝ mǝ byaal dagwo nanyi, mǝ yen gwar ɗok. Mǝ dagwar bǝn tak a ɗǝgǝl dat maa wuɗyin yen, "Laa Dauda, naa cigir kaa nǝ." ⁴⁰ Yesu ɗar kit mǝn yen nua wakjya gǝnyi njin. Shiwu dagwo nanyi wulduk mǝn Yesu nang fumuup yen, ⁴¹ "Gǝ tangkop a cin a me nggǝ e?" Lap yen, "Miskagam, a tangkop a naape." ⁴² Yesu laa gǝnyi yen, "Naape dat. Pǝn-naduk agǝ bar gǝ." ⁴³ Nnǝgǝn dat mǝn naape ba yagal langgǝdǝr muup, nyi fu pǝnyoon nNaan. Gurum dip mǝ naa kam mǝn mǝ pyap Naan.