¹ Yesu laa dǝr jepgǝdǝrmuup yen, "Jepe wu gǝ saa mǝn mǝ can wubis gǝ kwǝt a lengwaar, ɗe a gwo wu tang muop wul gǝnyi, lat-nkaa muup! ² Ɗyin mǝ mɓugat wa pang fiin ntak ntookmuup mǝn mǝ ntak nyi nɗǝgǝn cip, ɓǝ a wuret maa wu saa me jep wuɗyen nhǝ pal. ³ Kang kǝ suk.Ɗyin emnang ncin wubis, ɓǝ gǝ ɓyaal nyi, ɗyin mbat ncin wuret ɓǝ gǝ kon wubis afe. ⁴ Ɗyin ncin wubis nggǝ pogovǝl mɓit gǝme, mǝn waaji nɗuak gǝ kaa pogovǝl n-yǝn ji bat, ɓǝ gǝ kon wubis afe!" ⁵ Jeplep mǝ laa dǝr Miskagam mǝ yen, "Pǝn pǝn-naduk wu maa ndung mmǝn." ⁶ MǝN Miskagam yen, "Ɗyin gu kwǝt gǝ pǝn-naduk wa kabi wu-ǝk mostaad ɓǝ gu ɓoot laa dǝr tǝng durimi, nhǝ gu yen 'Pǝt gǝ tugus yi mwaan yi kaashik nɗǝgǝn cip,' ɓǝ tǝng nanyi kǝlǝng ɗǝgǝlgu. ⁷ A me gu wumenang, nkwǝt gǝ frang fu mar ko tap tǝm nnyi mǝn frang nanyi nwawul gǝ nungmar ɓǝ laa dǝr muup yǝn 'Waaji gǝ tong bǝr gǝ sǝsǝ he'? ⁸ Gǝ laa n-yǝn, 'Cet mǝbi n-an a sǝ mǝn gǝ ɓugat zau gǝ kang an, a sǝ mǝn a sua nlat ɓǝ she gǝ sǝ mǝn gǝ sua mou a'? ⁹ Gǝ ɗǝkyil nfrang nsa cin bii wu mǝ laa gǝ nyi a? ¹⁰ Gun zak a kam, ɗyin gu cin bii wu laa gǝgun ɓǝ gu yen, 'Mǝn a frang dat, mak wu ɗyin gǝ pyap mǝn mou. Mǝ can a ɓǝlang amu dat.'" ¹¹ Shiwu Yesu gǝwar mwaan Urishalima mǝn met war gǝkang Samariya gǝ Galili. ¹² Nyi fu rǝ dat me mǝpe mǝn tǝlogom muop sar mǝ kang nyi. Mǝ ɗyam njong gǝnyi ¹³ mǝn mǝ ap ɗǝgǝldu ɓalɓal mǝ yen, "Miskagam Yesu, naacigir kaa mu." ¹⁴ Yesu naa muop mǝn laa gǝ muop yen, "Mwaan gu nyin kaasuk dǝr mǝndaawang." Muop mmwaan dat mǝn logom amuop lat. ¹⁵ Nde muop naa kat gok gǝnyi lat mǝn ba gǝ gǝnook waa gǝ pǝnyoon nNaan gǝ ɗǝgǝl ɓalɓal. ¹⁶ Zǝn ntagam Yesu mǝn ɗǝkyil nnyi. Nyi dok a gurum Samariya. ¹⁷ Lat mǝn Yesu yen, "Kan dok mǝ ɗak gurum a sar mou mǝ? Ɗe gogot wu pogofaar muop a ne? ¹⁸ Kan gǝshang wakjya mǝ pǝnyoon nNaan mou ɗe wujong nhǝ dat mǝ? ¹⁹ Mǝn laa dǝr dagwo nanyi yen, "Yagal gǝ waa. Pǝn-naduk agǝ bar gǝ." ²⁰ Gurum Farisiyawa mǝ nang ɓit wul yillong Naan fumuup mǝn Yesu laa dǝr muop yen, "Yillong Naan gǝ wul a shi lǝ-en mou. ²¹ Ɗagat ɓǝ mǝ yen, 'Gu naa, nyi mpeen dukduk' ko 'Nyi mpeen njong' mou. Nsa yillong Naan nyi gǝnaargu." ²² Mǝn laa dǝr jepgǝdǝr yen, "Ɓit mǝ kwǝt nwakwul wu par gu caa mang gu naa me ɓit Laa gurum, mǝ gu kat gu na mou. ²³ Nlat ɓǝ mǝ la dǝr gu mǝ yen, 'Gu naa mpeen njong! Gu naa mpeen dukduk!' Nkwǝt kam ɓǝ gu fat mou, gu suo gǝsǝ gǝdǝr muop mou, ²⁴ nsa kabi namǝlǝp wu bii n-yagal ɓǝ saanpe fukwang gǝme mwaan gǝ lang shi nde hǝ, ɓit wul La Gurum par gǝ kwǝt a kam hǝ. ²⁵ Ɗe par gǝ sua a tǝgǝr ciin jepe mɓǝl ɗang mǝn seen wu gǝɗes hǝ mǝ nnyang nyi. ²⁶ Kabi wu dok taa gǝshii Nuhu hǝ, yong gǝ kwǝt a kam zak gǝshii Laa Gurum. ²⁷ Dok gurum fu sǝ gǝ sua, muop fu lap surǝp, muop fu mwaan ɗyak, waa gǝ rǝ par ɓit wu Nuhu rǝ nɗǝgǝn cii hǝ. Mǝn am pǝt mǝn tuo muop dip. ²⁸ Dok a kam gǝshii Lot. Dok muop fu sǝ muop fu sua, muop fu sarap muop fu sarap gǝ lee, muop fu kop sǝ muo fu ɗyak lǝ. ²⁹ Mǝn par ɓit wu Lot pǝt nyit gǝyil Sodom mǝn wus gǝ wuspya lai kabi fan gǝbǝtǝng hǝ, mǝn tuo muop dip. ³⁰ Gǝ kwǝt a kam par wu gǝ mǝ nyin Laa Gurum hǝ. ³¹ Par ɓit nanyi, gu nyit mǝgwo wu nyi gǝdap lǝ sam mpe mang mǝbi wuret nlǝ mou; gu nyit mǝgwo wu waakwǝt gǝnungmar nwawul gǝpang mou. ³² Gu ɗye mat Lot. ³³ Mǝgwo wu tangkop cinkǝn tenglang afe ɓǝ gǝ kyem, mǝgwo wu nyit tenglang afe kyem ɓǝ gǝ angkaa muup. ³⁴ A laa gǝgun, nɗǝgǝn lǝpar nanyi gurum gǝ mǝ kwǝt vǝl gǝ pǝteer. Gǝ mǝ mang gǝme, mǝn mǝ nnyit nde. ³⁵ Surǝp gǝ mǝ kwǝt vǝl fu ees fiin gǝshak. Gǝ mǝ mang gǝme, mǝn mǝ nnyit nde." ³⁶ ▪ ³⁷ Mǝ nang fumuup mǝ yen, "Ane kam yi Miskagam?" mǝn laa gǝ muop yen "Pee wu kum lua nnǝgǝn ɓǝ nkyaa gǝ mǝ kwǝt a nnǝgǝn."