¹ Yesu laa zak dǝr jepgǝdǝrmuup yen, "Me dagwo wulǝlong dok nyi gǝ wuɗaanpe, mǝn gurum mǝ yakdang dǝr dagwo nanyi gǝtap wuɗaanpe nanyi fu cinɗǝgǝl gǝ byilong gǝfe. ² Lat mǝn dagwo nanyi yong nyi laa dǝr muup yen 'A fu kǝlǝng a me kam kaagǝ ye? Gǝ rangshii ɓǝlang ɗaanpe agǝ gǝ pǝn an, nsa yong gǝ tong a wuɗaan byilong anǝ zak mou.' ³ Wuɗaanpe nanyi laa dǝr shik yen, "Ɗe gǝ a cin me shiwu wupinlǝ gǝnǝ gǝwar ɗuan ɓǝlang ɗaanpe funǝ yi? An gǝ ɓal mpe mar mou, mǝn waatkaa gǝ nyit an mpe ɗang mou. ⁴ A man byicin ɗepin mǝn nshang an mɓǝlang ɓǝ gurum mǝ lap an lǝmoup.' ⁵ Lat mǝn wuɗaanpe nanyi yong muop wu gǝ kaat wupinlǝ hǝ. Mǝn nang fu wupel yen, 'Gǝ gǝ kaat wupinlǝ anǝ a ɗang e?' ⁶ Dagwo lap yen, 'Tuu muǝr paat yagurumpaat.' Laa dǝr muup yen, 'Lap klabyiran, tong bǝr mǝn gǝ ran yagurumvǝl gǝfu sar.' ⁷ Lat mǝn laa gǝ nde yen, 'Gǝ gǝ kaat a ɗang yi?Mǝn dagwo lap yen, beng alkama ɗaa gǝme.' Mǝn laa gǝnyi yen, 'Gǝ lap klabbyiran, mǝn gǝ ran yagurumfeer.' ⁸ Wupinlǝ tǝgǝr wuɗaanpe wulǝleng nanyi nsa cin en. Nsa jep gǝyil gǝɗes hǝ nɗǝgǝn jepe wu gǝ mǝ can gǝ gurum gǝmuop hǝ, mǝ en ma jep peewusaan. ⁹ A laa gǝgun, gu yak shaar dǝr kaasuk gǝwar shagal wu a bii wukǝr mou hǝ, ɗepin shagal nanyi nlat, ɓǝ mǝ lap gun gǝ pee tugat wu gǝgwoo. ¹⁰ Mǝgwo wu ɗarɓal nɗǝgǝn bii wu til ɓǝ gǝ ɗarɓal nɗǝgǝn bii wu gwet, mǝgwo wudidam nɗǝgǝn bii wu til ɓǝ gǝ kwǝt a wudidam nɗǝgǝn bii wu gwet. ¹¹ Ɗyin gǝ ɓoot mpe yaa shagal wudidam mou, ɓǝ a wuɗa gǝ pǝn byilong naduk nggǝ yi? ¹² Ɗyin jet gǝ ɓoot yaa shagal mǝgwo mou, ɓǝ a wuɗa gǝ pǝn shagal wu a nǝmak nggǝ yi? ¹³ Frang gǝme gǝ ɓoot mpe cin ɓǝlang nmǝpyanlǝ vǝl mou, nsa ɗagat nnyangyit nde ɗe nɗem nde mou, ɓǝ pǝnshik nmǝgwo gǝme ɗe takɓal shi nde. Gǝ ɓoot mpe cin ɓǝlang nNaan gǝ byilong dau mou." ¹⁴ Mǝn Farisiyawa wudok muop a wuɗem shagal mǝ kǝlǝng kam mǝn mǝ zhal nyi. ¹⁵ Laa gǝ muop yen, "Bii gu fwat gǝ kaasuk ntagam gurum, ɗe Naan a wuman bǝzung gu. Bii wu a wuret n-yit gurum a nyi a wuret n-yit Naan mou. ¹⁶ Byiyil nung byitǝt gǝ nung Mǝkaafung dok muop nǝgǝn gwe she Yahaya wul. She shi nanyi mǝn mǝ shakɓǝlǝp yillong Naan, mǝn ko wuɗang fu zwat dǝr rǝ nnǝgǝn gǝ bangsang. ¹⁷ Mǝn a ne dat yi, gǝbǝtǝng gǝ gǝyil gǝ mǝ ɓes nlat mma wu me ǝk byitǝt nlat baan. ¹⁸ Mǝgwo wu tǝɗyik gǝ mat muup mǝn nlap nde ɓǝ cin a bwaar, mǝgwo wu lap namat wu mis muup tǝɗyik afe hǝ ɓǝ nyi a fu bwaar dat gǝnyi. ¹⁹ Dok me dagwo wulǝlong wu bii gǝ ɓyang byaat wuret nung long mǝn bii myaar shik gǝ byilong gǝnyi. ²⁰ Me mǝgwo wu gǝ ɗangɗang, sǝm muup a Lazarus bii tongɗok fukǝrang afe, shishikmuup, a shel dip, ²¹ mǝn bii tangkop ji sǝ kwarsǝ wu fwatɗǝk nsar dagwo wulǝlong nanyi. As muop bii jya mǝ ɓlǝm shel gǝfe. ²² Ɓit waarǝ wuɗangɗang nanyi muut mǝn mǝwong mǝ mang mwaan shiɓǝt Ibrahim gǝnyi. Dagwo wulǝlong nanyi zak muut mǝn mǝ wum nyi, ²³ mǝn rǝ nlǝwus, nyi nɗǝgǝn muultaa mǝn ep yitmuup mǝn naa Ibrahim njong gǝ Lazarus shiɓǝtmuup. ²⁴ Mǝn epɗǝgǝl yong, 'Ndaa Ibrahim, gǝ naacigir kaanǝ mǝn gǝ lep Lazarus, ɗepin ɓang longsar muup yi n-am mǝn tak gǝ liisnǝ, nsa an nɗǝgǝn muutlaa nɗǝgǝn wus nhǝ.' ²⁵ Mǝn Ibrahim yen, 'Laanǝ, ɓǝ gǝ ɗye shiwu dok gǝ gǝyil dok gǝ kat jepe wuret, wa Lazarus a kat jepe wubias. Mǝn gǝɗes hǝ muop fu zwaan nyi mpeen, de gǝ nɗǝgǝn muutlaa. ²⁶ Nau gǝ kam, memǝ kool wu gagam ɗenɗok gǝkang mu gǝgun, ya ba mǝgwo ngapɗel mpeen mmwaan dǝrgu, ko mǝgwo ngapɗel gǝpe gu nwaaji dǝrmu.' ²⁷ Dagwo wulǝlong nanyi laa yen, 'A ɗang gǝ, ndaa Ibrahim, ɗepin gǝ lep nyi lǝ ndaanǝ — ²⁸ nsar an gǝ mǝjepnǝgǝn paat—ɗewar nyi mwaan gǝ dǝlkom muop ya ba wakjya mǝ nruo gǝpe muutlaa nhǝ.' ²⁹ Mǝn Ibrahim yen, 'Muop gǝ byiyil Musa gǝ nung mǝkaafung; ɗagat muop kǝlǝng muop yi'. ³⁰ Dagwo wulǝlong nanyi lap yen 'A kam mou, ndaa Ibrahim, ɗyin mǝgwo ntong dǝr mǝdiɗǝm mmwaan dǝrmuop ɓǝ mǝ bat.' ³¹ Mǝn Ibrahim laa gǝnyi yen, 'Ba ɗagat nǝ mǝ nkǝlǝng byiyil Musa gǝ nung mǝkaafung mou, ɓǝ wa mǝgwo n-yagal gǝnaar mǝdiɗǝm ɓǝ gǝ mǝ kǝlǝng nyi mou.'"