¹ Mǝ lap gǝndung muop gǝ gogot mǝcan wubis mǝ mwaan dǝr Yesu ɗewar mǝ kǝlǝng nyi yi. ² Farisiyawa muop gǝ mǝ byiran mǝ gwakshik mǝ yen "Dagwo nhǝ bii lap gurum wu can wubis mǝn sǝsǝ gǝpe gǝme gǝmuop." ³ Yesu laa ɓǝlǝpkwoom gǝmuop yen, ⁴ "A wuɗa gǝnaar gu wu nyi gǝ tǝm yagurumpaat mǝn gǝme nlan ɓǝ nyit tǝm muop wu yagurumfeer gǝfu sarkaapogofar ngǝgǝr mǝn mwaan gǝ tang gǝme wu lan hǝ mou yi? ⁵ Ɗǝ nkat ɓǝ mang sǝm gǝtook mǝn cin tookpya. ⁶ Waaji nwul gǝpang ɓǝ yong mǝshaarmuup gǝ tǝlǝnglǝ mǝn laa gǝ moup yen, "Gu cin tookpya gu lap an yi nsa a kat tǝm gǝnǝ wudok lan hǝ.' ⁷ A laa gǝgun a kam shi tookpya gǝ kwǝt gǝbǝtǝng kaa wucin wubis gǝme wu bat nyit wubis ma gurum wu yagurumfeer gǝfu sarkaapokofar ndung muop a wukǝr wu mǝ mbat mou mǝ a ɗes dat hǝ. ⁸ Ɗe namat nkwǝt gǝ wu ǝkshagal sar mǝn gǝme nlan ɓǝ lang til-ngong ɗepin tang yi mou yi? ⁹ Ɗǝ nkat ɓǝ yong mǝshaarmuup gǝ tǝlǝnglǝ gǝfe mǝn yen, "Gu cin tookpya gu lap an yi nsa a kat shagal gǝnǝ wudok lan hǝ.' ¹⁰ A laa gǝgun took mǝwong Naan muop gǝ pya nsa mǝgwo gǝme wu bat nyit wubis hǝ." ¹¹ Lat mǝn Yesu laa yen "Me dagwo nyi gǝ jepdaas vǝl, ¹² mǝn laa wucom laadǝr ndaamuup yen, 'Ndaa, pǝn byilong wu a nǝmaan hǝ n-an.' Mǝn ndaamuup shap byilong afe gǝkang muop. ¹³ Zaa ba jong mou, mǝn laa wucom nanyi tǝl jepe gǝnyi dau mǝn mwaan yaa mme gǝyil jongjong, mǝn mwaan gǝ tar byilong gǝfe nnǝgǝn dwet. ¹⁴ Shiwu wu tǝ jepe lat dip mǝn gǝzǝm wubis taa gǝyil nanyi, mǝn rǝ ndǝgǝn weel. ¹⁵ Mǝn mwaan gǝ pǝn kaashik mme laayil wu ɗen nyi a wu pǝn sǝ nzeng muop. ¹⁶ Tookpya gǝ fis wu kat gǝ sǝ hǝ nsa mǝgwo dok gǝ pǝn mǝbi nnyi mou. ¹⁷ Shiwu enɗye wawul mǝn laa dǝrshik yen, 'Frang ndaanǝ muop a ɗang wu bii mǝ sǝsǝ ba mak muop, ɗe an dǝr muut gǝ ɓlak mpeen yi! ¹⁸ Gǝ a yagal a waa dǝr ndaanǝ waaji a yen "Ndaa, a cin bii wubis ntagam Naan, mǝn cin wubis ntagam gǝ. ¹⁹ Ɗong ɗyin mǝ n-yong an shi laagǝ mou; mang an kabi frang gǝgǝ hǝ.'" ²⁰ Lat mǝn yagal waa dǝr ndaamuup. Dok kutnyi njong mǝn ndaamuup naa, mǝn naachigir gǝfe, mǝn yak gǝsǝ mwaan gǝ ogom nyi ɓǝlem nyi. ²¹ Mǝn lalaa nayi yen, 'Ndaa, a cin wubis ntagam Naan, mǝn a cin wubis ntagam gǝ. Ɗong ɗyin mǝ n-yong an shi laagǝ mou.' ²² Ndaa nanyi laa gǝ frang gǝfe muop yen, 'Bǝr gu jya gǝ byaat wuret maa gogot hǝ, gu ɓyang nshik muup, gu ɓyang shagalɓǝrǝm shi sarmuup, gu ɓyang kogop shi kwakmuup. ²³ Nlat ɓǝ gu yaa laanǝng wujet mǝn fu kǝgǝr hǝ gu tǝ. Ɗagat mǝ cin byisǝ yi. ²⁴ Nsa laanǝ dok muut, mǝn yi nkagam gǝɗes hǝ. Dok lan mǝn mǝ kat nyi.' Lat mǝn mǝ cin byisǝ. ²⁵ Laamuup wumiskagam dok wakot gǝ nungmar. Wawul dukduk gǝ gǝpang mǝn kǝlǝng see gǝ gya. ²⁶ Mǝn yong me frang mǝn nang fumuup. ²⁷ Frang nanyi laa gǝnyi yen, 'Emnǝgǝngǝ wawul mǝn ndaagu tǝ laanǝng wujet mǝn fu kǝgǝr hǝ, nsa kat wawul cagap.' ²⁸ Tuup laamuup wumiskagam lee mǝn nyang rǝ nlǝ, mǝn ndaamuup pǝt ɗuak nyi. ²⁹ Mǝn laa wumiskagam nanyi laa dǝr ndaamuup yen, 'Gǝ naa, yii mɓǝl an fu ɓǝlang nggǝ, jet a damtook gǝ mou. Nau gǝ kam, jet gǝ pǝn wa la ǝk n-an ɗepin mǝ cin tookpya yi gǝ mǝshaarnǝ mou, ³⁰ ɗe a laagǝ wujet wakot gǝ dam byilong agǝ gǝkaa napagar muop wawul mǝn gǝ tǝ laa nǝng wujet mǝn fu kǝgǝr hǝ nnyi.' ³¹ Ndaamuup laa gǝnyi yen, "Laanǝ, gǝ jet zǝm shiɓǝtnǝ, jepe wu a nǝmaan dip a nǝmak. ³² Ɗong ɗyin mǝ cin byisǝ gǝ tookpya, nsa emnǝgǝngǝ nhǝ dok muut, mǝn nyi nkagam gǝɗes hǝ; dok lan mǝn ba mǝ kat'"