¹ Par me Ɓitynak mǝn mwaan yaa nlǝ me mǝgwo Farisiyawa mpe sǝsǝ, mǝn gurum mǝ lǝngyit naa nyi yi. ² Lat mǝn kat me dagwo nyi nnǝgǝn gǝ gwang. ³ Mǝn Yesu nang fu kogorong byitǝt nung Yahudawa gǝ Farisiyawa yong, "Mǝ nɗak mǝgwo par Ɓitnyak ɓǝ ɗong a, ɗong mou yi?" ⁴ Mǝn mǝ ɗok kot. Lat mǝn Yesu yaa sar dagwo nanyi mǝn ɗak nyi. ⁵ Mǝn laa gǝ muop yen, "A wuɗa gǝnaar gu ɗǝ laa muup ko nǝng afe mpǝttaa nɗǝgǝn dung am par Ɓitnyak ɓǝ mang bǝr mou yi?" ⁶ Mǝn mǝ ɓoot mpe lap lǝfu nanyi mou. ⁷ Yesu naa dat kat gurum muop wu mǝ dwam muop hǝ mǝ tang pǝtugat wuret mǝn laa me ɓǝlǝp-kwoom gǝmuop yen, ⁸ "Ɗǝ mǝgwo ndwam gǝ mpe byisǝ ɓǝ mwaan gǝ tong gǝ pee tugat mǝnan mou, nook kot mǝ dwam mǝgwo wu ma gǝ zak nnǝgǝn. ⁹ Gurum wu dwam gun nau vǝl ji nwul mǝn nlaa gǝgǝ n-yen 'Pǝn pee ndagwo nhǝ', ɓǝ kaa gǝ waat gǝ waa lap kǝ pǝtong wulee. ¹⁰ Ɗǝ mǝ ndwam gǝ ɓǝ mwaan gǝ tong gǝ pee wulee, nook dagwo wu dwam gun nwul ɓǝ laa gǝgǝ yong 'Shaarnǝ, yagal gǝ tong gǝ pee wugagam.' A nyi ɓǝ gǝ kat pǝnmaa ntagam gurum wu mǝ tugatɗok gǝpe gǝme gǝgǝ hǝ. ¹¹ Nsa mǝgwo wu mang kaashik ɓǝ gǝ mǝ sam nyi, mǝgwo wu sam gǝ kaashik ɓǝ gǝ mǝ mang nyi nlang. ¹² Yesu cin laa gǝ dagwo wu dwam nyi yong, "Ɗǝ gǝ ba dǝr dwam gurum mpe byisǝ, ɓǝ gǝ dwam a mǝshaargǝ gǝ mǝjepnang gǝ mǝmyaagǝ, gǝ tǝlǝnglǝ agǝ dat mou, nsa muop zak par gǝ mǝ dwam gǝ ɓǝ mǝ kwatkop. ¹³ Ɗǝ gǝ cin byisǝ ɓǝ gǝ yong wupǝpyaa muop gǝ wukǝgǝl, gǝ wukut, gǝ wuvagam, ¹⁴ ɓǝ Naan gǝ lang wuret kaa gǝ nsa muop gǝ mǝ ɓoot fu kwat gǝ mou. Nlat ɓǝ gǝ kat kopgǝshiigǝ par ɓit yigil ntugun nung gurum wukǝr muop." ¹⁵ Lat mǝn nde muop wu tongɗok fu sǝ gǝpe gǝme gǝ Yesu kǝlǝng ɓǝlǝp nanyi mǝn laa gǝnyi yong, "Wuret lang-nkaa gwo wu par gǝ sǝ nawe nnǝgǝn yillong!" ¹⁶ Mǝn Yesu laa gǝnyi yong, "Me mǝgwo dok cirak sǝ gwet mǝn dwam gurum gak. ¹⁷ Shiwu mǝ cirak sǝ nanyi lat mǝn lep frang gǝfe mwaan gǝ laa gǝ muop wudok dwam muop hǝ yong 'Gu jya nsa sǝ nanyi nung gwe.' ¹⁸ Mǝn mǝ lǝngfu nkwǝt gǝ du wul mou. Dagwo wu pel laa yong, 'A seet mar, mwaan gǝ a naa a lengwaar. Kambok a langfu nǝmaan. ¹⁹ Nde yong, 'A sarap nǝng paat mpe mar, an dǝr mwaan gǝ katshii muop. Kambok a langfu nǝmaan.' ²⁰ Nde dagwo yong, 'A lap mat; gǝ a ɓoot mpe wul mou.' ²¹ Frang nanyi waa gǝ laa gǝ wupilǝ afe. Mǝn dǝfil mang wupinlǝ nanyi mǝn laa gǝ frang afe yen, 'Pǝt ɓǝr gǝ mwaan gǝ war gǝkang lǝ gǝ war kaam mǝn gǝ yong wupǝpya, muop gǝ wukut, gǝ wuvagam gǝ wukǝgǝl muop.' ²² Frang nanyi yong 'Miskagam, a cin bii wu gǝ laa hǝ mǝn pee bǝn kutnyi gwet.' ²³ Wupinlǝ nanyi laa gǝ frang yong, 'Mwaan gǝwar kaam mǝn gǝ laa gǝ gurum dip mǝ wul a lengwaar, ɗepin lǝ nanyi gam yi. ²⁴ A laa gǝgǝ, muop wudok a dwam pel hǝ, me muop gǝ cam sǝ gǝnǝ mou.'" ²⁵ Gurum wukǝrgǝi dok mǝ mwaan gǝder muup, mǝn bat laa gǝ muop yong, ²⁶ "Mǝgwo wu wul dǝr nǝ mǝn nnyang ndaamuup, gǝ nǝgǝnmuup, gǝ matmuup gǝ jepmuup, gǝ mǝjepnǝgǝn muup daas gǝ surǝp gǝ tenglang gǝfe mou ɓǝ gǝ kwǝt a lagǝdǝrnǝ mou. ²⁷ Mǝgwo wu mang shepɓeel gǝfe lang gǝdǝrnǝ mou ɓǝ gǝ kwǝt a lagǝdǝrnǝ mou. ²⁸ A wuɗa gǝnaar gu mba dǝr ɗyik mǝlang ɓǝ tong kun shagal gǝfe ɗǝng, ɗepin man nkwǝt yong gǝ lat kǝgǝt mou yi? ²⁹ Nyang nkwǝt kam mou ɓǝ mɓuǝt kugur mǝn ba nɗyik lat mou ɓǝ muop wu mǝ naa hǝ gǝ mǝ zhal nyi ³⁰ mǝ yong 'Gu naa dagwo wu ɓuǝt kugur lǝ mǝn ma nyi nɗyik lat.' ³¹ A long me wuɗa gǝ kot dǝr mwaan lek gǝ nde long ɓǝ tong ɗǝng nang ɓǝlǝp nkwǝt nyi wu gǝ daas kam sar gǝ ɓoot lek long wu gǝ daas kam yagurum mou yi? ³² Ɗǝ nkat gǝ ji ɓoot mou ɓǝ lep gurum mwaan mǝ gapdǝr mǝlekɗyel gǝyil nde mǝ kutnyi njong mǝ tang tugatcagap. ³³ Gun zak a kam, mǝgwo nnyit byilong gǝfe dau mou ɓǝ gǝ kot a lagǝdǝrnǝ mou. ³⁴ Kǝgǝn a bii wuret, ɗe shang gǝfe nlat ɓǝ a me gǝ bat nyi waa kǝgǝn shizak yi? ³⁵ Nyi a bii kyen yil, ɗǝ kot yi a tung fǝp mou. Gǝ mǝ kon a kon dat. Mǝgwo nkwǝt gǝ kom, ɓǝ kǝlǝng."