¹ Shide mǝn pak gurum mǝ laa ɓǝlǝp dǝr muup kǝ Galili muop wu Bilatus roop tǝgǝm amuop gǝ byitok amuop hǝ. ² Yesu lap fumuop yong, "Gu naa gu kat gurum Galili muop nanyi dok mǝ cin a wubis maa gogot gurum nsa mǝ sua tǝgerchiin kam a? ³ A laa gǝgun, a kam mou. Ɗǝ gu bat gu nyit wubias gǝgu mou ɓǝ gu lat baan a kam hǝ. ⁴ Kabi gurum wu sarkaapogokun wudok mǝlang Siluwam pǝttaa kaa muop mǝn tuo muop, gu ɗye ɓǝ gu kat a wubias gǝmuop maa nung gurum Urishalima dip a? ⁵ A laa gǝgun, a kam mou. Nyang nǝ gu bat gu nyit wubias gǝgu mou ɓǝ gu lat baan a kam hǝ. ⁶ Yesu laa ɓǝlǝpkwoom yen, "Mǝgwo nyi gǝ tǝng wut gǝnaar mar gǝnyi mǝn wul ji tang jeptǝng nanyi mǝn kat mou. ⁷ Dagwo nanyi laa dǝr wukangkaa tǝng nanyi yong, 'Gǝ naa, yii kun an fu tang jeptǝng nhǝ mǝn a kat mou. Gap nyi gǝ ba gǝnyi. Gǝ mǝ nyit nyi nɗar mmar a mpe me?' ⁸ Wukangkaa mar nanyi yen, 'Nyit nyi n-an dǝr yii gǝme ɗǝ a yaa tanggoon yi nbǝdǝr mǝn a ɗǝk fǝp. ⁹ Cigirsatnyi mǝn nsam jep ɓǝ lat; ɗǝ nsam jep mou ɓǝ gǝ gap gǝ tak.'" ¹⁰ Yesu dok nyi fu sheepee nɗǝgǝn me lǝwap par Ɓitnyak. ¹¹ Mǝn me namat nnǝgǝn wu cin yii sarkaapogokun gǝ dawmam wu kut nyi. Namat nanyi goon, mǝn ɓoot mwaan zagat mou. ¹² Yesu naa mǝn yong nyi mǝn yen, "Namat, mǝ pǝt gǝ yi nfu gok gǝ yi." ¹³ Lang sar muup gǝkaa namat nanyi mǝn, gǝ laa mou mǝn namat yagal dar mǝn pǝnyoon nNaan. ¹⁴ Mǝn ɓǝt wunaa kǝ lǝwap nanyi yal gǝ Yesu nsa ɗak gurum par Ɓitnyak. Mǝn laa gǝ gurum wukǝrgǝi yong, "Gun gǝ ɓit peemǝ dǝr ɓǝlang. Gu jya ɗǝwar mǝ ɗak gun yi, gu jya par Ɓitnyak mou." ¹⁵ Yesu lap fumuup yen, "Mweng muop! Bii gu tagat gui gǝ nǝng gǝgu mwaan gu ɗyan shi kǝgǝl mǝn gu pǝn am mmuop par Ɓitnyak mou a? ¹⁶ A kam zak Shetan ɓugat reep Ibrahim nhǝ gǝ yii sarkaapogokun, ɓǝ ɗong ɗyin mǝ nwut nyi par Ɓitnyak mou a?" ¹⁷ Laa kam mǝn kaawaat yaa mǝnyang nyi mǝn gurum wukǝrgǝi mǝ cin tookpya gǝ bii wu nyi cin hǝ. ¹⁸ Lat mǝn Yesu yen, "Ɗe yillong Naan a kabi me hǝ yi; gǝ a kok nyi a kang a gǝ me? ¹⁹ Nyi a kabi wu ǝk mostat wu me dagwo mang tak gǝnaar mar gǝnyi, lat mǝn fyǝr waa tǝng wuyoon, mǝn yer gǝtǝng mǝ kat pee lǝng lǝ shi sarmuup." ²⁰ Lat mǝn bǝn yen, "Ɗe a kok yillong Naan a kang a gǝ me? ²¹ A kabi yis wu namat mang roop gǝ gonggo aas kun mǝn yagal haan gǝnaar aas nanyi." ²² Yesu gǝwar Urishalima mǝn mwaan shi gǝfǝr dǝɗyak-dǝɗyak mǝn shee muop. ²³ Me mǝgwo laa gǝnyi yong, "Miskagam, gurum a til dat gǝ mǝ kat angkaa a?" Mǝn laa gǝ muop yong, ²⁴ "Gu zwat ɗewar gu ruo yi nfulǝ wufǝfogor, nsa, a laa gǝgun gurum gwet gǝ mǝ tangkop ruo mǝn gǝ mǝ ɓoot mou. ²⁵ Dǝ wupinlǝ n-yagal gwe mɓal fulǝ mǝn gu ɗyam gǝɓang gu kwak fulǝ nanyi yi gu yen, 'Miskagam, Miskagam, nook mǝn mǝ ɗyilǝng nɗǝgǝn.' Nyi gǝ lap n-yong, 'A man gun mou, a man peewu gun tugat nnǝgǝn mou.' ²⁶ Lat ɓǝ gu yong, 'Dok mǝ sǝ, mǝ sua ntagam gǝ, mǝn gǝ sheepee gǝkang lǝ gǝmu.' ²⁷ Lat ɓǝ lap yong, 'A man gun mou, a man peewu gu tugat gu wul yi mou. Yigil gu nyit an, gun mǝ can wubias.' ²⁸ Par gu naa Ibrahim, gǝ Ishaku gǝ Yakubu gǝ mǝkaafung nɗǝgǝn yillong Naan, ɗe mǝ cen gun, ɓǝ gu wal ba gu arap fugu. ²⁹ Gurum par gǝ mǝ tugat nggan-fuuska, gǝ gan-fuusrǝ gǝ gan-gǝpang gǝ gan-wang jya mǝ ntugat mǝ nsǝsǝ nɗǝgǝn yillong Naan. ³⁰ Gu man muop wu gǝdǝr gǝ mǝ wak wu ntagam, muop wu ntagam gǝ mǝ wak wu gǝdǝr." ³¹ Lee dat mǝn pak Farisiyawa mǝ jya mǝn mǝ yong, "Yagal gǝ nyit peen, nsa Hirudus fu tang gǝ dǝr tǝ." ³² Yesu yong, "Mwaan gu laa gǝ aslaar nanyi gu yong, 'An fu cen damwam mǝn an fu ɗak gurum cinyi gǝ dǝɗaar, par ɓit wukun ɓǝ a waa a rǝ mpee gǝnǝ.' ³³ Nau kam, a lengwaar gǝ a cin ɓǝlang cinyi, gǝ dǝɗaar, gǝ pǝtɓit, nsa gǝ bii gǝ mǝ tǝ wukaafung nǝ nkwǝt a nUrishalima mou. ³⁴ Urishalima, Urishalima, wu tuo mǝkaafung mǝn zwam gurum wu mǝ lep gǝ muop nnyi shi pang. A ɗemkop a wagar jepyi kabi wu nǝgǝnkoo bii wagar jepdǝ n-agaldǝ, mǝn yi ɗem mou. ³⁵ Naa, mǝ tak lǝ yi waa kop. A laa gǝ yi, she yi naa an zak mou, ɗǝ a par ɓit wu gǝ yi yong, 'Wuret lang-nkaa gwo wu wul nɗǝgǝn sǝm Miskagam.'"