¹ Muop shifu dat kam mǝn gurum mǝ wul gǝr mǝn mǝ ɓǝl ba mǝ byak dal shak, lat mǝn Yesu laa gǝ jepgǝdǝr muop ɗǝng pel yen, "Gu kang suk gǝ yis Farisiyawa, wu a mweng hǝ. ² Nsa mǝbi kwǝt wu mǝ ɓǝmkaa wu gǝ ma ep mou, mǝbi kwǝt gǝsok wu nǝ par gǝ mǝ mman mou. ³ A waa nnyi mǝbi wu gu laa nkwoo ɓǝ gǝ mǝ kǝlǝng gǝtal, bii wu gu laa nciin nɗǝgǝn lǝ ɓǝ gǝ mǝ shak nyi gǝɓang. ⁴ A laa gǝgun mǝshaarnǝ, gu yigil lugut gurum wu gǝ tǝ a dǝng shishik dat mǝn lat mou. ⁵ Gǝ a dǝlkom gu kaa gwo wu gu yagal lugut muup. Gu yigil lugut dagwo wu ɗǝ ntǝ dǝng shishik nlat ɓǝ tak nlǝwus. A laa gǝgun, gu yigil a lugut wupinnyi. ⁶ Bii gǝ mǝ sarap gǝ jep yer paat a kobo vǝl mou a? Mǝn Naan gǝ mandǝr me muop wa gǝme mou. ⁷ Naan kun swoopkaagu nau. Gu yigil lugut mou. Gun a wuret ma jep yer gwet. ⁸ A laa gǝgun, mǝgwo wu yong jin a nǝmaan ntagam gurum, ɓe Laa Gurum zak par gǝ yogng jin a nǝmuup ntagam mǝwong Naan muop; ⁹ mǝgwo wu cii yong ji man an mou ntagam gurum, ɓǝ an zak par gǝ a cin a kam ntagam mǝwong Naan muop. ¹⁰ Mǝgwo nlaa ɓǝlǝp wubaan kaa Laa Gurum ɓǝ gǝ mǝ kon wubis gǝfe, ɗe mǝgwo wu laa ɓǝlǝp wubaan kaa Mǝrip Wuret ɓǝ gǝ mǝ kon wubis gǝfe mou. ¹¹ Mǝ mmwaan gǝgun ntagam lǝwap, gǝ mǝnan gǝ mǝ kamshik ɓǝ gu weel kǝ lǝfu wu gu laa gu ɓenkaasuk yi mou, ¹² nsa shide ɓǝ Mǝrip Wuret gǝ shee gun gǝ bii wu gu laa hǝ." ¹³ Lat mǝn mǝgwo gǝnaar gurum wukǝrgǝi la gǝnyi yen. "Wusheepe, laa gǝ emnǝgǝnnǝ shap byilong gǝkop gǝ an." ¹⁴ Yesu lap yen, "Dagwo, a wuɗa ɗen an a wusheep gǝ gurum gekang kaa gu yi?" ¹⁵ Mǝn yen, "Gu kang gǝ byicaa ɗak dip, nsa gurum gǝ kat tenglang a shi byilong gǝyil wu nyi gǝnyi gwet hǝ mou." ¹⁶ Lat mǝn Yesu laa me ɓǝlǝpkwoom gǝmuop yen, "Me dagwo wulǝlong kat sǝ gwet mmar afe, ¹⁷ mǝn laa gǝshik yen, 'Ɗe gǝ a cin a na, an gǝ pee chinkǝgǝn sǝ anǝ mou?' ¹⁸ Mǝn yen, 'A man bii wu gǝ a cin hǝ. Gǝ a sharap mee anǝ wuɗyen mǝn a ɗyak wunan, ɓǝ a chinkǝgǝn ǝksǝ gǝ gogot lee anǝ nnǝgǝn. ¹⁹ Lat ɓǝ a laa gǝ san a yen, "Dagwo, sǝ nyi gwet mmee dǝr yii mɓǝl. Nyak sak, sǝ, sua, mǝn gǝ cin tookpya.'" ²⁰ Mǝn Naan laa gǝnyi yen, "Gǝ a wuyogor, yi gǝ mǝ mang nook gǝ nlǝpar nhǝ, ɗe byilong nanyi gekwǝt a nung wuɗang ee?' ²¹ Mǝgwo wu cinkǝn byilong dǝr kaashik dat mǝn nyi a lǝlong ntagam Naan mou, ɓǝ nyi a kam." ²² Yesu laa ge jepgǝdǝr muup yen, "A waa nnyi a laa yi gǝgun, gu weel gǝ kaasuk mou—bii wu gu sǝ, gǝ lee wu gu ɓyang nsuk. ²³ Nsa tenglang wu maa sǝ, shishik a wu maa ɓyaat. ²⁴ Gu naa shi yer muop, bii mǝ kop sǝ ɗǝ mǝ ɗyip yi mou. Muop gǝ mee gǝ par mou, mǝn Naan bii sǝ gǝ muop. Gun a wu maa yer! ²⁵ Ɗe a wuɗa nweel ɓǝ del ɓit muut gǝfe yi? ²⁶ Ɗǝ gu ɓoot fu cin bii wutil nanyi mou, ɓǝ gu weel gǝ gǝshang a mpe me? ²⁷ Gu naa shi pel wung wu bii mǝ fyar hǝ. Gǝ mǝ cin ɓǝlang ɗǝ mǝ bat shak yi mou. Mǝn a laa gǝgun, wa Sulemanu ɓyang byaat wuret kabi pel gǝmuop mou. ²⁸ Ɗǝ Naan nruan lee wuret nwung wu bii nyi cinyi ɓǝ ɗaar fii mǝn ɗǝ ɓyal wus gǝ nyi dat, ɓǝ shee a shi me mpǝn lee nggun mou yi? Pǝn-naduk agu kat! ²⁹ Naa yong gu weel kaa bii wu gu sǝ gǝ bii wu gu sua. ³⁰ Gurum gǝyil dau muop fu tang jepe nanyi, Ndaa gu man nkwǝt gu tangkop. ³¹ Gu tang yil-long gǝfe ɓǝ Naan pǝn gogot jepe muop nhǝ nau nggun. ³² Gu yigil lugut mou nsa Ndaagu ɗempkop pǝn yil-long nanyi nggun. ³³ Gu sarap gǝ byilong agu mǝn gu pǝn wupya muop. Gu cin bangshagal wu nǝ gǝ ndam, gu cinkǝn byilong agu gǝbǝtǝng gǝpe wu gǝ latlat mou hǝ, peewu wat gǝ wulduk gǝ nyi mou, mǝn dǝɗat gǝ aar mou. ³⁴ Nsa peewu byilong age nnǝgǝn ɓǝ engǝ gǝkwǝt a nnǝgǝn. ³⁵ Gu ɗyan teng ɓuǝn gu ɓalɓal, mǝn gu lǝng wus shi til-ngong agu, ³⁶ mǝn gu tugat kabi muop wu fu kang wawul wupinlǝ gǝmuop gǝpe gya mat hǝ, ɗǝ waaji nkwak fulǝ ɓǝ mǝ ep nnyi bǝr. ³⁷ Wuret lang-nkaa frang wu wupinlǝ waaji kat muop mmeen. A laa naduk gǝgun, gǝ ɓugat ɓuenshik shi zau gǝ byaat afe, mǝn nlaa gǝmuop mǝ tugat mpe sǝ, ɓǝ ji pǝn sǝ mmuop. ³⁸ Ɗǝ wupinlǝ nanyi nwawul kwǝt a nlǝpar oh, kwǝt a nkanggǝɓit oh, mǝn nkat muop mmeen, ɓǝ frang muop nanyi a wu kumsal. ³⁹ Gu man nkwǝt ɗǝ wupinlǝ mman shii wu wat gǝ wul ɓǝ nyit nyi rǝ nlǝ gǝfe mou. ⁴⁰ Gu tugat gǝ engu nsa gu man shii wu Laa Gurum gǝ wul mou." ⁴¹ Bitrus yen, "Miskagam, gǝ fu laa ɓǝlǝpkwoom nhǝ a gǝ mǝn dat a, a gǝ gurum dip yi?" ⁴² Yesu laa yen, "A wuɗa a wuɗaan ndung ɗarɓal mǝn nyi a wusǝsson wu ɗǝ wupinlǝ afe nkaa gogot frang muop ɗewar pǝn sǝ yi mmuop gǝshii wu gǝ tangkop yi? ⁴³ Wuret lang-nkaa frang nanyi kan wupinlǝ gǝfe waaji kat nyi fu cin kam. ⁴⁴ A laa naduk gǝgun, gǝ ɗen nyi nkaa byilong gǝfe dip. ⁴⁵ Ɗǝ frang nanyi nlaa gǝshik n-yen, 'Wupinlǝ anǝ nhǝ nungdǝm dogol,' mǝn taa fu nas mǝnye muup daas gǝ surǝp, mǝn sǝ mǝn sua ba gǝl, ⁴⁶ ɓǝ wupinlǝ afe gǝ waa nwul par ɓit wu nyi ɗen en gǝkaa mou, gǝ shii wu nyi man mou, ɓǝ waaji tǝɗǝgǝn muup, man ɓǝ tak nyi shiɓǝt gurum wu mǝ ɗyamɓal mou hǝ. ⁴⁷ Frang wu man bii wu wupinlǝ gǝfe gǝ tangkop mǝn nyang cin ɓǝ gǝ lap nas gwet. ⁴⁸ Wudung man bii wu wupinlǝ gǝfe gǝ tangkop mou mǝn cin wubis ɓǝ gǝ lap nas lee. Mǝgwo wu lap mǝbi gwet ɓǝ gǝ mǝ tangkop bii gwet fumuup, mǝgwo wu mǝ nyit bii gwet nsarmuup ɓǝ gǝ mǝ nang bii zak gwet fumuup. ⁴⁹ A wul a mpe ɗǝk wus gǝyil, a caa mang ɗyin nkwǝt fu lap gwe. ⁵⁰ An gǝ kǝnpe wu gu mǝ kǝn an ashik, mǝn took nǝ dam badǝn ɗe a nyi par gǝ waa nrǝ! ⁵¹ Gu ɗye nkwǝt a wul a gǝ tugatcagap gǝyil a? Hayǝu, a laa gǝgun, a wul a gǝ kwapshak. ⁵² Nsa nlat ɓǝ gurum paat nlǝ ɓǝ mǝ kwapɗǝgǝnshak—gurum kun gǝ mǝ nyangyit gurum vǝl, muop wu vǝl hǝ gǝ mǝ nyangyit muop wu kun. ⁵³ Ndaa gǝ nyangyit laamuup, laa gǝ nyangyit ndaamuup; nǝgǝn gǝ nyangyit reepdǝ, reep gǝ nyangyit nǝgǝndǝ; nǝgǝnmat gǝ nyangyit mat laadǝ, matlaa gǝ nyangyit nǝgǝnmisdǝ." ⁵⁴ Yesu dok fu gǝ gurum wukǝrgǝi zak yen, "Bii gu naa ligin fu yagal nggan-fuusrǝ ɓǝ gu yong, 'fan ya gǝ lai', mǝn bii waa naduk. ⁵⁵ Bii gu naa kogom ntong gan-wang nkaa yi ɓǝ bii gu yong, 'fuus ya gǝ ɓaan', mǝn bii waa naduk. ⁵⁶ Gun a mweng, gu man kaggǝyit jepe gǝyil gǝ gǝbǝtǝng, mǝn a me dǝn man kaggǝyit jepe wu gǝɗes hǝ shi gu yi? ⁵⁷ A na gu mangǝyit bii wukǝr mou yi? ⁵⁸ Ɗǝ gun gǝwar mwaan ntagam wusheep gǝ wunyangyitgu ɓǝ gu gapdǝr gu laa ɗagat yong ba ndǝl gǝ mmwaan ntagam wusheep, mǝn wusheep mpǝn gǝ nsar dogari mǝn dogari nɗen gǝ nlǝɓal. ⁵⁹ A laa gǝgun ɗagat nǝ gu kwat shagal nanyi dau mou ɓǝ gu fwat mou."