¹ Dok shiwu Yesu nyi fu ɗangnaan mme mǝpe mǝn me lagǝdǝr muup laa gǝnyi yen, "Miskagam, shee men ge ɗangnaan kabi wu Yahaya shee jepgǝdǝr muup hǝ." ² Yesu laa gǝ muop yen, "Ɗǝ gu yigil dǝr ɗangnaan ɓǝ gu yen, "Ndaa, mang sǝm gǝ waa wusǝsaar. Mang yil-long gǝgǝ wul. ³ Pǝn sǝ gǝmu nung shiɓit mmǝn. ⁴ Kon wubias amu kabi wu mǝn mǝ kon wubias wu gurum mǝ chan mmǝn he. Gǝ nyit mǝn mǝ ruo nɗǝgǝn katshii mou.'" ⁵ Yesu laa gǝ muop yen, "A wuɗang nɗǝgǝn gu nkwǝt gǝ wushaar mǝn nwul dǝr muup mpechagat mǝn n-yen shaarnǝ pǝn ɗang ɓigil nawe kun n-an ⁶ nsa me wushaarnǝ lemwar gǝɗes hǝ mǝn an gǝ mǝbi dǝr pǝn nyi mou.' ⁷ Lat ɓǝ nyi wu nɗǝgǝn lǝ lap yen, 'Gǝ weel an mou. A ogot fulǝ gwe, mǝn gǝ jepnǝ mǝ yak pǝturǝp gwe. A ɓoot mpe yagal pǝn nawe nggǝ mou.' ⁸ A laa gǝgun, ɗagat nǝ n-yagal mpǝn nawe nggǝ nsa gǝ a wushaarmuup mou mǝn gǝ nyit kaawaat mǝn gǝ weel nyi veet ɓǝ gǝ yagal mpǝn ɓiling nawe gwet wu gǝ ɗemkop hǝ. ⁹ An zak fu laa gǝgun, gu nang ɓǝ mǝ pǝn gun; gu tang ɓǝ gu kat, gu kwak fulǝ ɓǝ mǝ ep nggun. ¹⁰ Nsa gurum wu nang ɓǝ mǝ pǝn nyi; gurum wu tang ɓǝ gǝ kat; gurum wu kwak fulǝ ɓǝ mǝ ep nnyi. ¹¹ A ndaa me wuɗa nɗǝgǝn gu, laa muup nnang cherep fumuup ɓǝ pǝn wuo nnyi yi? ¹² Ɗagat ɓǝ nnang aas koo ɓǝ pǝn ɗagar nnyi yi? ¹³ Ɗǝ gun gurum wu chan wubias gu man mpe pǝn bii wuret njep gu ɓǝ ɗe Ndaagu wu fugǝtǝng gǝ pǝn Mǝrip Wuret mmuop wu mǝ nang fumuup mou a?" ¹⁴ A nnǝgǝn mǝn Yesu fu chen me damwam fuɓǝm. Damwam nanyi pǝt dat mǝn dagwo wudok fu muup ɓǝm hǝ epfu laa lǝfu mǝn rǝng gurum wukǝrgǝi. ¹⁵ Mǝn pak gurum mǝ yen, "Nyi fu chen damwam a shi Belzubul, long damwam muop." ¹⁶ Pak mǝ katshii muup, mǝ tang me byinyin gǝbǝtǝng dǝr muup. ¹⁷ Yesu man enɗye gǝmuop mǝn laa gǝ muop yen, "Yil-long wu gapɗǝgǝn shik nsa jagar ɓǝ gǝ lat baan, gǝlǝ wu gapɗǝgǝn shik gǝ kwal ɓǝ gǝ pǝtkaa mou. ¹⁸ Ɗə Shetan nggapɗəgən shik ɓǝ chin a shi me yil-long gəfe nrəgət yi? Gu yong an fu chen damwam a shi Belzebul. ¹⁹ Kan an fu chen damwam a shi Belzebul, ɗe gurum gǝdǝrgu mə chen muop a shi me? A muop par gə kwət a mǝsheep gun. ²⁰ Ɗǝ an fu chen damwam a shi laasar Naan, ɓǝ yil-long Naan waa kat gun. ²¹ Ɗǝ megwo wuɓal gǝ lee lek nkang kaa lǝ gǝnyi ɓǝ mǝbi gǝ ɓǝm lee gǝfe mou, ²² ɗǝ mǝgwo wuɓal maa nyi nrǝ kaamuup ɓǝ ɗuan lee lek mǝn kok byilong gǝfe. ²³ Məgwo wu gə lapgədər nə mou ɓə nyi a wu nyang an; məgwo wu təpɓǝt nǝ tǝllə gǝshak mou ɓə nyi a fu ber. ²⁴ Ɗǝ damwam mpǝt nɗǝgǝn mǝgwo, ɓǝ mwaan gǝ tang pee wufii ɗǝ nyak yi. Ɗǝ nkat mou ɓǝ yen, 'A waa a yaa lǝnǝ wudok a tong a pǝt nnǝgǝn hǝ.' ²⁵ Waaji kat mǝ kum pee nanyi mǝn mǝ myap nyi kweet. ²⁶ Lat mǝn mwaan gǝ kok nde damwam pogovǝl wubis ma nyi, wakjya mǝ tugat muop nau nnǝgǝn. Ɓǝ dagwo nanyi gǝ yer mma wudok pel hǝ." ²⁷ Nyi fu laa dat kam mǝn me namat ep ɗǝgǝldǝ gǝnaar gurum wukǝrgǝi yen, "Wuret lang-nkaa ɓǝt namat wu laa gǝ gǝ yugur muup wu gǝ sua hǝ." ²⁸ Mǝn Yesu lap yen, "A nung nyi ɓǝ wuret lang-nkaa gurum wu mǝ kǝlǝng ɓǝlǝp Naan mǝn mǝ chinkǝn hǝ." ²⁹ Shiwu gurum wukǝrgǝi mǝ taa fu kaam mǝn Yesu laa yen, "Seen gurum muop nhǝ a seen wubis. Nyi fu tang byinyin, gǝ mǝ pǝn byinyin wu ma nung Yunana mou. ³⁰ Kabi wudok Yunana waa byinyin dǝr gurum Nineva hǝ, a kam zak Laa Gurum gǝ waa byinyin dǝr seen nhǝ. ³¹ Matlong gǝsar gan-wang par gǝ yagal par ɓit sheep gǝpe gǝpe gǝ gurum gǝ seen nhǝ mǝn nwatyit muop, nsa dok tong gǝpe wusǝng ji kǝlǝng soon Sulemanu yi, mǝgwo wu ma Sulemanu nyi mpeen. ³² Gurum Nineva par gǝ mǝ yigil par ɓit sheep gǝe gǝme gǝ gurum seen nhǝ mǝn mǝ nwatyit muop, nsa dok mǝ bat nyit wubias amuop shi wu Yunana shakɓǝlǝp Naan mmuop hǝ, mǝgwo wu ma Yunana nyi npeen. ³³ Mǝgwo gǝ ɓil til-ngong mǝn nsok, ɗagat ɓǝ ɗen ntugushi mou, bii ɗen a gǝtal ɗewar saan pee yi. ³⁴ Yitgǝ a wus wusaan shishik. Ɗyin yitgǝ a wuret ɓǝ shishik gǝ saan. Ɗǝ yitgǝ nkot a wuret mou ɓǝ shishik gǝ nyi nkwoo. ³⁵ A waa nnyi, gǝ kang yi ba peewusaan gǝgǝ nwaa kwoo. ³⁶ Ɗǝ a kam, ɓǝ shishik gǝ dau a wusǝsaan, gan mǝpe nyi nkwoo mou, ɓǝ shishik gǝ nau gǝ saan kabi til-nggong wu bii saan pee nggǝ hǝ." ³⁷ Laa ɓǝlǝp lat mǝn me mǝgwo Farisiyawa duam nyi mpe sǝ lǝmuup, mǝn Yesu mwaan gǝ tong. ³⁸ Ɓǝlǝp rǝng dagwo Farisiyawa nanyi nsa kat Yesu vang sar mou mǝn taa a fu sǝ dat. ³⁹ Mǝn Yesu laa gǝnyi yen, "Gun Farisiyawa bii gu vang dangkong foon gǝ dangkong ɗaa sǝ mǝn gu nyit ɗak, gǝ jepe wubis nɗǝgǝn. ⁴⁰ Soon won nggun. Dagwo wu chin dangkong hǝ a nyi chin ɗǝgǝn mou a? ⁴¹ Gu pǝn bii wu nɗǝgǝn hǝ nggurum wupya muop, ɓǝ gogot jepe dip wubǝɓang dat dǝr gu. ⁴² Lat nkaa gu Farisiyawa, nsa bii gu lap kaasǝ nung kompe gǝ nung kombii wu pǝtung dip, ɗe gu takɓak shi shik gǝ ɗempe Naan. A tiit gu chan shik yi mǝn gu ɗem Naan, mǝn gu chan gogot jepe zak. ⁴³ Lat nkaa gu Farisiyawa, nsa gu ɗemkop tugat ntagam nɗǝgǝn lǝwap mǝn gu ɗemkop gurum mǝ nang gun gǝlǝtuk. ⁴⁴ Lat nkaa gu, nsa gun a kabi gǝcher wu gurum mǝ naa mou mǝn mǝ mwaan-mwaan gǝkaa nsa nǝ mǝ mman hǝ." ⁴⁵ Me wusheepee nung byitǝt nang fumuup yen, "Wusheepe, gǝ laa kam ɓǝ gǝ agas mǝn zak." ⁴⁶ Yesu laa yen, "Lat nkaa gu, mǝsheepee gǝ byitǝt! Nsa bii gu pǝn lee wutegen nggurum ɗe gun bii gu ɓǝm wa shi raapsargu mou. ⁴⁷ Lat nkaa gu nsa gu ɗyak gǝcher mpe mǝkaafung wudok mǝndaagu mǝ tuo hǝ. ⁴⁸ Wawu gu ɗem mǝn gu lapgǝdǝr ɓǝlang mǝndaagu, nsa muop mǝ tuo mǝn gun gu ɗyak gǝcher gǝmuop. ⁴⁹ A waa nnyi soon Naan laa yen, 'Gǝ a lep gǝ mǝkaafung gǝ jeplep; gǝ mǝ tuang mǝn mǝ ntuo pak muop.' ⁵⁰ Naan par gǝ mǝ nang kop tǝgǝm mǝkaafung a fu seen nhǝ; mǝkaafung wudok mǝ tuo muop ɗagat shiwu mǝ she gǝyil hǝ, ⁵¹ she shi nung Habila mwaan gǝ rǝ shi nung Zakariya wudok mǝ tǝ gǝkang rǝktok gǝ peewuwaar hǝ. A laa gǝgun, par gǝ mǝ nang kop muop fu seen nhǝ. ⁵² Lat nkaa gu mǝsheepee gǝ byitǝt Yahudawa nsa gu sok pas ep fulǝ byiman; gun gu ruo mou mǝn gu dǝn ruo shi gurum wu mǝ tangkop hǝ." ⁵³ Ndangkong nanyi mǝn Yesu yagal nyit pee nanyi mǝn mǝbyiran muop gǝ Farisiyawa mǝ nyangɓǝlǝp afe mǝn mǝ chin ɓagalshik gǝnyi gǝkaa jepe gwet, ⁵⁴ muop fu lǝng gwak dǝr mǝ yaa nyi yi nɗǝgǝn ɓǝlǝp afe.