¹ Ndangkong jepe muop nhǝ mǝn Miskagam tagat nde gurum yagurumkun gəfu sar mən lep muop vəl-vəl mə yaawar mwaan mpee wudok nyi dər mwaan hə. ² Laa gə muop yen, "Ɓǝlang ɗyip nyi gwet, ɗe a mə chin ɓəlang mə kat. A waa nnyi, gu ɗang Miskagam wupin ɓǝlang ɗyip lep gə mə ɓəlang mpe ɗyippe afe. ³ Gu mwaan. A lep gun a kabi jep təm gənaar aslaar muop. ⁴ Gu kok bangshagal gǝ lau mwaan, gǝ kogop mou, mǝn gu tal məgwuo gǝwar mou. ⁵ Lə wu gu ruo ɓə gu laa pel gu yen, 'Mang lǝ nhǝ kat tugatchagap!' ⁶ Ɗǝ mǝgwuo wu tang tugatchagap nkwǝt nnəgən, ɓə tugatchagap agu sam kaa muop, a kam mou ɓə bən waaji dər gu. ⁷ Gu tugat nlə nanyi, gu sə mǝn gu sua bii wu mǝ tang pǝn gun hə, nsa ɗong ɗyin wuɓəlang nkat kopgəshii muup. Naa yong gu ɗak gu mwaan shilə-shilə. ⁸ Me gǝfǝr wu gu ruo mǝn mə nlap gun ɓə gu sə bii mə pən gun hə, ⁹ mǝn gu ɗak wugok muop wu nnəgən. Gu laa gə muop gu yen, 'Yil-long Naan wulduk gəgun.' ¹⁰ Ɗyin gu ruo mme gəfǝr mən mə nlap gun mou ɓə gu mwaan shik gəwar-gǝwar mǝn gu yen, ¹¹ 'Wa orong gǝfǝr gǝgu wu ɓam kwak mu, mə ɓwap mə lə kaa gu! Gu man wagap yil-long Naan wulduk.' ¹² A laa gǝ gun, par ɓit sheep ɓǝ gǝ mǝ ɓes nnaachigir kaa Saduma ɗekaa gǝfǝr nanyi. ¹³ Lat nka yi, Korozin! Lat nkaa yi Betsaida! Ɗyeer wu mǝ chan nɗǝgǝn gu hǝ, ɗyin dok mǝ chan a kam nɗǝgǝn Taya muop gə Sidon, ɓə ɗyin sǝmbǝdok mə mbat nyit wubis gwe mən mǝ mɓyang gokbyaat mǝn mǝ ntugat nfat. ¹⁴ Par gə mə ɓes nnaachigir kaa Taya muop gə Sidon shi sheep ɗekaa gu. ¹⁵ Ɗe yi, Kafarnawum, yi ɗye yi kat gǝ mə mang yi ntigit gəbətəng a? Hayeu, yong gə mǝ yi tak yi nHades. ¹⁶ Mǝgwuo wu kǝlǝng gun ɓə kǝlǝng a an, mǝgwuo wu nyang gun ɓə nyang a an, mən mǝgwuo wu nyang an ɓǝ nyang a gwuo wu lep an." ¹⁷ Muop wu yagurumkun gəfu sar hə mə wakwul gǝ tookpya, mən mə yen, "Miskagam, damwam muop mə kǝlǝng ɗǝgǝl mu nɗǝgǝn sǝm gə." ¹⁸ Yesu lap fu muop yen, "A naa Shetan pal gə yee a namələp wutong gəbətəng hə. ¹⁹ Gu naa, a pən kamshik ngun ɗepin gu walkaa wuo, gǝ ɗagar dau gə kamgǝɓǝlǝp nung wukas, məbi gə pǝngok ngun mou. ²⁰ Nau gǝ kam, naa yong gu chin tookpya nsa mərip mǝ kǝlǝng ɗǝgǝl gu; gu chin tookpya waa nsa mə ran sǝm gu gǝbǝtǝng." ²¹ A gəshii nanyi, mǝn Yesu chin tookpya badən nɗəgən Mərip Wuret, mǝn yen, "A pyap gə, Ndaa Miskagam gəbətəng gə gǝyil, nsa gə sok jepe muop nhə fu məsǝsoon gǝ mǝmankang, mən gǝ nyin ngurum wukaa-nkwoo muop kabi jep wuɗyen hǝ. A kam hə Ndaa, nsa a nyi dok ɗongɓǝt gǝ." ²² "Ndaanǝ pǝn jepe dip n-an, mǝgwuo man Llaa mou, a Ndaa dat man; məgwuo man Ndaa mou, ɗe a Laa dat man gǝ muop wu Laa nanyi kat ɗong ɗyin ji nyin Ndaa mmuop hǝ." ²³ Lat mən bat naa jepgədər muup mən laa laa gə gǝsok yen, "Wuret lang-nkaa muop wu mǝ naa bii wu gu naa hə. ²⁴ A laa gəgu, məkaafung gə long muop mɓəl dok mǝ tangkop naa bii wu gun fu naa, mən mə naa mou, mə tangkop kələng bii wu gun fu kələng, mən mə kat kələng mou." ²⁵ Me wusheepee gǝ byitǝt Yahudawa yagal dǝr katshii muup mən yen, "Wusheepee, yong a chin a me a kat tenglang gəgwoo yi?" ²⁶ Yesu lap fumuup yen, "Mə yil a me nɗǝgǝn byitət eh? Bii gə bil a nang a shik eh?" ²⁷ Mən lap yen, "Ɗem Miskagam agǝ Naan gə bəzung gə dip, gə chelem gə dip, gə kagam agə dip, gə enɗye agə dip, mən gə ɗem tǝlənglǝ agə kabi kaasak hə." ²⁸ Yesu lap fu muup yen, "Gə lap n-yit. Gə chin kam ɓə gə lang nkagam." ²⁹ Mən wusheepee nanyi tangkop pət gə kaashik mən nang fu Yesu yen, "A wuɗa a təlǝnglǝ gǝnə yi?" ³⁰ Yesu lap fu muup yen, "Me dagwuo dok tong nUrishalima gə sam yaa gǝyil Yariko mǝ taa nsar kulǝp muop, mən mǝ ɗuan lee gǝfe dip mən mə nas nyi ba ɓagal gə muut mǝn mǝ nyit nyi. ³¹ Me ndaawang nyi nɗel sam gəwar nanyi, naa dagwuo nanyi mən bat war nde ɗyik. ³² A kam shi me məgwuo Lawi ji wul mpe nanyi mən naa dagwuo nanyi mən bat war nde ɗyik. ³³ Ɗe a me məgwuo Samariya dok nyi mmwaan, mən ji gəpe dagwuo, naa nyi mən naachigir afe. ³⁴ Mwaan gə mang nyi mən vang shel afe mən bam, mǝn ɗək muər gə am-laatəng. Mǝn mang nyi gəkaa gui afe mwaan gənyi mme lǝ mǝn ɗaan naakaa muup nnǝgǝn. ³⁵ Ɗaar mǝ fwat mǝn ǝkshagal vəl pən wupinlǝ nanyi mǝn yen, 'Naakaa muup, ɗǝ gǝ tǝ shagal wu maa ndung ɓǝ a waa a wul, ɓə a kwat gə.' ³⁶ Gǝnaar muop wu kun nhǝ, gǝ naa gə kat a wuɗa a tǝlǝnglǝ dagwuo wu taa nsar kuləp muop yi?" ³⁷ Mən wusheepee nanyi yen, "A gwuo wu naachigir nkaa muop hə." Yesu laa gənyi yen, "Waa gǝ chan kam hə." ³⁸ Muop mmwaan dat mǝn Yesu rə mme mǝpe, mǝn me namat wu sǝm muup a Marta lap nyi ɗen lə dǝ. ³⁹ Sǝm emnəgən muup Mariya, mwaan gǝ tong ntagam Miskagam gə kələng ɓǝlǝp gǝfe yi. ⁴⁰ Marta mwaanɗok gə lekshik yi fu ɓǝlang sǝ. Mǝn mwaan gə Yesu yen, "Miskagam, emnǝgǝn nǝ nyit a an dat fu ɓəlang mǝn weel gǝ mou a? Laa dər muup tǝpɓǝt yi." ⁴¹ Mǝn Miskagam la fu muup yen, "Marta, Marta, yi fu weel gǝ jepe mɓǝl, ⁴² bii a gəme dat a lengwaar. Mariya mang bii wu ɗong dip maa gogot, mǝn gǝ mǝ ɗuan fu muup mou."