¹ Mən yong muop wu sarkaavəl hə mən pən kamgǝɓǝlǝp gǝ kamshik mmuop gǝkaa damwam dip mpe ɗak byiyaa muop. ² Mǝn lep muop ɗepin mwaan mə shakɓǝlǝp yil-long Naan mǝn mǝ ɗak wugok muop. ³ Laa gə muop yen "Gu kok jepe mpe mwaan nanyi mou—ras, gǝ bang shagal, gə nawe, gə shagal, gu kok byaat ɓyang vəl mou. ⁴ Lə wu gu ruo, ɓǝ gu tugat a nnəgən dat par gu wak yi. ⁵ Pee wu mə lap gun mou, mǝn gu vak dər nyit gǝfər nanyi, ɓə gu ɓwap orong shi kwakgu ɗewar nyi waa bii twamshik yi kaa muop." ⁶ Lat mən mə yigil mwaan shi wang-shi wang, muop fu shakɓəlǝp langship mən muop fu ɗak gurum ko ane. ⁷ Miskagam Hiridus kələng bii wu fu chan hǝ mən weel nyi, nsa pak gurum mə yong mǝ ep a Yahaya Wukǝnpe gǝnaar mǝdiɗǝm, ⁸ pak mə yong a Iliya bən wawul, pak mə yong kwət a me wukasfung wudok mmok chin yagal. ⁹ Mən Hiridus laa yong, "Dok a gap kaa Yahaya gwe, ɗe a wuɗang shi ndung an fu kələng jepe muup nhə eh?" Mən tangkop naa nyi. ¹⁰ Jeplep nanyi mə wakwul mən mǝ yakdang bii wu mǝ chan hǝ dər muup. Lat mǝn mwaan gə muop klok mme gǝfǝr wu gǝ mǝ yong shi Betsaida. ¹¹ Gurum wukǝrgǝi mə kǝlǝng kam mən mǝ lǝnggǝdǝr muup. Yesu lap muop mən laa ɓəlǝp kǝ yil-long Naan gǝ muop, mǝn ɗak wugok muop. ¹² Fuus em ntaa mən muop wu sarkaavəl mə jya dər muup mə yen, "Laa gə gurum mǝ wak ɗewar mwaan mǝ tang pee turap gǝ sǝ yi shi fungwang nsa peen a gǝgǝr." ¹³ Mən laa yen, "Gun gu pǝn mǝbi mmuop sə." Mən mə yen, "Mən gə ɓiling nawe maa paat gǝ cherep vǝl mou—ɓagal ɓǝ mwaan mə sǝseet mpe gurum muop dip." ¹⁴ (Dok daas muop kabi kam paat hə.) Mǝn laa gə jepgǝdǝr muup yen, "Gu laa dər muop mə tugat shi gǝwur: gǝwur gǝme ɓǝ daas yagurumvǝl gǝfu sar." ¹⁵ Lat mǝn mǝ laa gǝ gurum tugat kam hǝ. ¹⁶ Kok nawe wu paat gə cherep vəl nanyi mən ep kaa muup gətəng, mən lang wuret gəkaa mən tarap ɗəgən mǝn pən jepgǝdǝr muup mə shap ngurum. ¹⁷ Gurum muop dau mǝ sə mən mǝ agal, mən mǝ ɗyigin chigit wu ɗe mǝn garang tugushi sarkaavəl. ¹⁸ Par ṁə ɓit mən Yesu fu ɗangnaan mmeshik, jeplep muop dər muup. Mən nang fu muop yen, "Gurum bii mə yong an a shi wuɗang eh?" ¹⁹ Mə lap yen, "Bii mə yong gə a Yahaya Wukənpe. Ɗe pak gurum mə yen gə a Iliya, pak mə yen a me wukaafung wudok mmok chin yagal." ²⁰ Lat mǝn laa gə muop yen, "Ɗe gun bii gu yong an a wuɗang eh?" Bitrus lap yen, "A Kristo laa Naan." ²¹ Mən dǝlkom muop yong nua gə laa gə məgwuo nau, ²² yen, "Laa Gurum yong gə sua təgərchiin a lengwaar, daskagam gǝ ndaawang wunan gə məbyiyil gə mə nyang nyi, gə mə tə nyi, nlat ɓǝ mə ep nyi par ɓit wukun." ²³ Lat mən laa dər muop dau yen, "Mǝgwuo wu tangkop langgǝdǝr nǝ ɓə gə nyang kaashik a lengwaar mǝn mmang shepɓeel afe mǝn nlanggədər nə. ²⁴ Mǝgwuo wu gǝ ɗemkop chinkəgən tenglang gǝfe ɓə gə kyem, ɗe a mǝgwuo wu nyit tenglang gǝfe kyem nsa an ɓǝ chinkǝgǝn ²⁵ Ɗə mǝgwuo nkat jepe gəyil dip mən nyi gǝ kaashik nkyem ɓǝ a me a kyen gǝfe yi? ²⁶ Mǝgwuo wu kaa muup waat kaa nə gǝ ɓəlǝp anə, ɓə kaa Laa Gurum zak par gə waat gənyi shiwu wul nɗǝgǝn yoon afe, gǝ yoon Ndaa gə nung məwong muop wusǝsaar. ²⁷ A laa naduk gəgun, pak gurum ɗyamɗok mpeen wu gə mə cham ɗəm she yil-long Naan wul mou." ²⁸ Ɓit pogokun ndangkong Yesu laa ɓǝlǝp nhǝ mən mang Bitrus, gǝ Yahaya gə Yakubu mən kaa yaa gǝpang gǝ muop ɗewar ɗangnaan yi. ²⁹ Nyi fu ɗangnaan dat mən shik fanyit muup bat, byaat gǝfe mǝ wak pya ba məlǝp. ³⁰ Mən gurum vəl fu ɓəlǝp gənyi, a Musa muop gǝ Iliya ³¹ wu mǝ nyin kaashak nɗəgən yoon. Mǝ laa lǝfu gǝkaa muut afe wu gǝ kǝgǝtfu nUrishalima hə. ³² Bitrus gǝ muop wu shiɓət muup hǝ mǝ ɗak nsaam, mə yigil mǝn mǝ naa yoon Yesu gə daas wu vəl gǝpe gǝme gǝnyi hə. ³³ Musa muop gə Iliya mǝ yigil dǝr yok mən Bitrus laa yen, "Miskagam, ɗong wu mən mpeen. Ɗagat an a ɗyak kyangkyang yi kun, gǝme a nəmak, gǝme a nung Musa, nde a nung Iliya." (Dok man bii wu nyi fu laa hə mou.) ³⁴ Laa fu dat kam mən ligin waaji ribin muop mən mǝ yigil lugat. ³⁵ Me mə ɗəgəl tongpət gənaar ligin nanyi mən yen, "Wudung a Laa nə ndung a mang hə; gu kələng ɗəgəl muup." ³⁶ Shiwu ɗəgəl nanyi laa ɓǝlǝp dat mən mǝ kat a Yesu dat mmeshik. Mǝ ɗok klok. Mə laa dǝr mǝgwuo shide gəkaa bii wu mə naa hǝ mou. ³⁷ Ɗaar mə fat, mǝ sam gǝpang nanyi mən gurum wukǝrgǝi mə kat nyi. ³⁸ Me dagwuo ep ɗəgəl yen "Wusheepee, a ɗang gə naachigir laa nə, nsa a nyi wutəs laa nə. ³⁹ Gə naa, bii damwam nkaa shimuup ɓə taa fu wuwagar; bii saa nyi zwan mǝn dǝfil pang shi gǝfu. Bii nyit nyi bǝr mou, mǝn mlak shishik muup. ⁴⁰ A ɗuak jepgədər gə ɗepin mə chen damwam nanyi yi mən mə ɓoot mou." ⁴¹ Yesu lap yen, "Gun seen wudǝdam wu nyang pən naduk, gǝ a tong nlat gəgun mpena gǝ a mogor yi? Waa gə ji gǝ laa gə mpeen." ⁴² Lalaa nanyi nwaaji dat mən damwam nanyi mang nyi tak n-yil mǝ taa fu zwan. Mən Yesu ɓyaal damwam nanyi mǝn ɗak lalaa nanyi, mən mang pən ndaa muup. ⁴³ Lat mǝn ɓǝlǝp rəng muop dip nsa mə naa kamgǝɓǝlǝp nung Naan. Shiwu ɓǝlǝp kutnyi a wu rəng muop kaa bii wu chin hǝ, mən laa dər jepgədər muup yen, ⁴⁴ "Ɗagat mɓəlǝp nhǝ rǝ nkom gu yi gǝret: gǝ mǝ seet gə Laa Gurum fu gurum muop." ⁴⁵ Mən mə mankang ɓǝləp nanyi mou. Mə sok fu muop yong mə mman chiin afe, nau kam mən mǝ yigil lugat nang. ⁴⁶ Lat mǝn ɓagalshik taa gǝnaar muop gǝtap kwət a wuɗa a wuyoon dip nɗəgən muop oh. ⁴⁷ Mǝn Yesu man enɗye amuop mǝn mang laa wuchom ɗen n-eskogop muup ⁴⁸ mən laa gə muop yen, "Mǝgwuo wu lap lalaa nhǝ nɗəgən səm nə ɓə lap a an; mǝgwuo wu lap an, ɓǝ lap a gwuo wu lep an. Nsa gwuo wukǝkat dau gǝnaar gu a nyi a wuyoon." ⁴⁹ Yahaya lap yen, "Miskagam, mə naa məgwuo fu chen damwam muop nɗəgən səmgə mən mǝ dən shimuup nsa langɗok gədər mu mou." ⁵⁰ Yesu laa yen "Gu dən shimuup mou, nsa mǝgwuo nkwǝt a wunyang gun mou ɓǝ a nǝmuk." ⁵¹ Shiwu ɓit wulduk ɗepin waa yaa gəbətəng yi, mən en muup waalap gǝ mwaan nUrishalima. ⁵² Mən lep jeplep mǝ yatagam, mwaan mə ruo nɗǝgən me gǝyil Samariya ɗewar mə myap jepe yi dip nnyi. ⁵³ Mən gurum wu nnǝgǝn mǝ lap muop mou nsa gə mwaan a nUrishalima. ⁵⁴ Jeplep afe, Yakubu muop gə John mǝ naa kam mən mə yen, "Miskagam, gǝ tangkop mǝ yong wus gǝbǝtǝng sam chaan muop a?" ⁵⁵ Mən Yesu bat mǝn ɓyaal muop, ⁵⁶ mən mə yigil mwaan nde məpe. ⁵⁷ Muop mmwaan dat gəwar mən mə məgwuo laa gənyi yen, "A langgǝdǝr gǝ nau pee wu gǝ mwaan hə." ⁵⁸ Yesu laa gǝnyi yong, "Aslaar muop gə fung gǝmuop, yer gətəng muop gə lə, ɗe Laa Gurum nyi gə pee wu gǝ ɗenkaa muup mou." ⁵⁹ Lat mǝn laa gǝ nde dagwuo yen, "Langgǝdǝr nǝ." Mən dagwuo nanyi lap yen, "Miskagam, ɗagat waa a wum ndaanə nɗang." ⁶⁰ Yesu laa gə nyi yen, "Nyit mǝdiɗəm mə wam mǝnye muop mǝdiɗǝm. Ɗe gə, mwaan gə shakɓəlǝp njong kaa yil-long Naan." ⁶¹ Lat mǝn nde mǝgwuo zak laa yen, "A langgədər, Miskagam, ɗagat waa a satwaa yi gə gurum lənǝ ɗǝng." ⁶² Yesu lap fu muup yen, "Mǝgwuo wu lang sar gǝkaa chaan mar mən naa dangkong, ɓə ɗong gə yil-long Naan mou."