¹ Lat mən Agripa laa Bulus yen, "Gə ɓoot npe kaar kəsak" Mən Bulus ep sar muup mən ɓəm kaar kəshik yen, ² "Long Agripa, an gə tookpya nsa a ntagam gə chinyi npe kaar kǝsan yi nfu pampe wu Yahudawa mə jya gənyi hǝ; ³ nsa gə a wumankang was Yahudawa muop gə ɓǝlǝp amuop. Waa nsa kam hə, a ɗang gə ɗyin gə mogor gə kələng an yi. ⁴ Yahudawa dip mə man pəyagal gənə gəyil gənǝ gə Urishalima, ɗagat wa an nlaa wuchom. ⁵ Mə man an ɗagat shideel, mən ɗong ɗyin mə lap nɗem nkwət an a gurum Farisiyawa wudung a chung gurum wu warwap gǝmuop laafu badən hə. ⁶ Gəɗes hə a ɗarɗok npe mə sheep an yi nsa a ɗen en nə kaa byilaaɗen wudok Naan chin gə mǝ-ndaamu hə. ⁷ A byilaaɗen wudok seenmu wu sarkaavəl mə ləng en du nkwət gə du lap shi wu mə wap Naan nfuus gə ləpar hə. Long Agripa, a waa nsa ɗen en nanyi Yahudawa muop fu pam an yi. ⁸ A waa nme məgwuo gǝ ɗye nkwət Naan gə ap mədiɗəm mou eh? ⁹ An dok a ɗye nkwət gə a chan jepe gwet a dam səm Yesu wu a gurum Nazaret yi. ¹⁰ A chan kam nUrishalima. A ɗək məpən naduk gwet nləɓal shi wu ndaawang wunan muop mə pǝnfu n-an hə, mən ɗə mə ntuo muop ɓə a lap gədər. ¹¹ A nogol muop kaa nɓəl nləwap dip mən a yak gǝkagam ɗewar mə laa wubis yi kaa Naan. Dəfil dok mang an badǝn gə muop mən a twang muop ba mwaan a rə gəyil gəɓang. ¹² Dok an fu chan kam mən a mwaan nDamaskus, ndaawang wunan mǝ pǝnfu n-an; ¹³ an gəwar dat, nfuus gənaar, mən namələp wusaan maa fuus hə tong gəbətəng mǝn mələp kaanə gə mǝshaar mwaan anǝ. ¹⁴ Mən dip mǝ pələp n-yil mən a kələng ɗəgəl wu laa ləfu gə an nliis Yahudawa muop yen, 'Shawulu, Shawulu, a waa nme gə fu twang an yi? Ya gə laafu ngə gə tat ras goon byikang yi gə baa gənyi.' ¹⁵ Mən a yen, 'Gə a wuɗa yi, Miskagam?' Mən Miskagam lap yen, 'An a Yesu wudung gə fu twang hə. ¹⁶ Gəɗes hə, yagal gətəng gə shii gə, nsa a nyin kaasan ngə a npe a ɗen gə yi a frang gə wutwamshik kə bii wu gə man kaanə, gə jepe wu she a nyin ngə hə; ¹⁷ an zak yong a shang gə nfu gurum gə Məjong wu a lep gə dər muop hə, ¹⁸ ɗewar gə ap yit muop yi, ɗə gə bat muop yi gəpe kwoo gə waa gə ji gə muop gəpe wusaan, ɗə gə tagat muop yi nsar Shetan gə waa gə ji gə muop dər Naan, ɗewar Naan kon wubyas gəmuop yi, mən mə nkat byiteerkop wu bii a pən muop wu mə saar muop shi pən-naduk n-an hə.' ¹⁹ A waa nnyi, Long Agripa, a ɓak ɗəgəl Naan mou; ²⁰ mǝn a laa gǝ muop nDamaskus ɗǝng pel, she muop wu nUrishalima nau gǝ gəyil Yahudiya, gǝ Məjong muop nkwǝt nua bat wakjya dǝr Naan, mǝn nua chan jepe wu nyin bat nanyi. ²¹ A nsa nyi Yahudawa mə yaa an yi nləwap wuyoon, mən muop dǝr tə an. ²² Naan jet nyi fu tǝpɓǝt nǝ waaji wul gǝɗes hǝ, waa nsa kam hə, a twamshik yi ntagam gurum wuchee gǝ mənan nkaa məbi maa wudok mǝlaa-ɓǝlǝpnaan gǝ Musa mə yen yong gə taa hə mou. ²³ Dok mə yen Kristi yong sua tǝgǝrchiin, mǝn a nyi gǝ kwǝt a wupel wu gǝ yagal ntugun gǝnaar mǝdiɗǝm mǝn nshakɓəlep peewusaan dər Yahudawa gǝ Məjong." ²⁴ Bulus kaar kəshik lat, mən Festus ep ɗəgəl bəɓal yen, "Bulus, kaa gə bat. Byiman gǝgə wu swet bat kaa gə." ²⁵ Mən Bulus yen, "A kaanǝ bat mou, Festus wukǝkǝgǝt, an fu laa a ɓələp naduk gə enɗye wukər. ²⁶ Nsa long man jepe muop nhə; a waa nnyi a laa lǝfu yi gə tugurduan dər muup, nsa a man nkwǝt məbi wu a laa hə lan nyi mou; nsa mə chin me ngulung mou. ²⁷ "Long Agripa, gə pən naduk nmǝlaa-ɓǝlǝpnaan a? A man gə pən naduk." ²⁸ Agripa laa gǝ Bulus yen, "Gǝɗes hǝ dat mən gə npe gwaan an a waa Krista yi a?" ²⁹ Bulus yen, "A ɗang Naan nkwət, ɗyin zaa njong oh, kot njong mou oh, ɓǝ gǝ, nau gǝ muop wu mə keləng an chinyi hə, mə wak kabi an hǝ, ɗe a kwanyok lǝɓal nhə dat gǝ won." ³⁰ Mən long yagal ɗar gətəng, nau gǝ gwopna, gǝ Banis gǝ muop wu mə tugatɗok gǝpe gəme hə. ³¹ Mǝ fat nyit ləsheep nanyi dat mən mə laa ɓələp dər shak mə yen, "Dagwuo nhə chin məbi mak muut ko ɓugat mou." ³² Agripa laa dər Festus yen, "Ɗyin dagwuo nhǝ lang sheep ntagam Kaisar duk mou ɓǝ ɗyin mǝ tak nyi."