¹ Dok fu mang nkwǝt gǝ mə yigil nchii am mə mwaan nItaliya mən mə ɗen Bulus gǝ gogot muop wu nlǝɓal hǝ gǝsar me wuntagam məlekɗyel wu sǝm muup a Juliyas nung gəwur mǝlekɗyel lǝ long. ² Mə mang chii am nAdaramitiya wudok gəwar mwaan gəyit chip Asiya hə. Mən mə mwaan nchip. Aristarkus, məgwo Tasalonika wu gəyil Makidoniya, mwaan gədǝr mu. ³ Ɗaar mə fat mən mə ruo gǝfǝr Sidon, npee wu Juliyos nyin chinɗong nBulus hə, mən nyit nyi mwaan dər məshaar muup ɗewar mə naa kaa muup yi. ⁴ Mə yigil nnəgən mə mwaan nchip mən mə yigil mə bat nSiprus dukduk gə gǝchungpe n-am, nsa kogom dok weel mən dogol. ⁵ Mə ɗək mǝkaa nchip mən mə kat mǝn a dukduk dat gǝ fukong Kilikiya gə Pamfiliya, mə ruo nMira wu a gǝfǝr Lisiya hǝ. ⁶ Nnəgən mǝn wuntagam mǝlekɗyel nanyi kat me chii wu tong gǝyil nAlekzandiriya npe mwaan nItaliya. Mən ɗǝk mən nnəgən. ⁷ Mə mwaan a gaam dər bit nɓəl mən mə wak mə ruo bərət dukduk gǝ Kinidas, mən kogom dən bat war nanyi shi mu, mən mǝ bat shi pəkyep Karita wu gap Salmon del taa hǝ. ⁸ Mə tugun chii am fu kong nanyi wagap a nɓǝlang, mǝn mwaan mə ruo nme məpe wu gə mǝ yong shi Penyak Wuret wu nyi dukduk gə Lasiya hǝ. ⁹ Mə mang zaape wagap, shii sənfu Yahudawa dok ɗel gwe, mǝn pee zak bis dər mwaan n-am. Bulus dəl kom muop, ¹⁰ mən yen "Mələmu, a naa mwaan wu mən npe lǝng akaa nhə yong gǝ kwǝt gǝ weel nsa yong gǝ mǝ kyen mou: gǝ chii am, gǝ lee nɗǝgǝn afe gǝ mǝn dip." ¹¹ Wuntagam mǝlekɗyel nanyi takɓak shi ɓələp Bulus ɗe lǝ en a shi nung wu tugun chii gə wupin chii dat. ¹² Pǝsam chii nanyi dok gǝ ɓes tong gǝshii vǝchi mou, mǝn pak mǝ tugun chii am mǝ kar mən nkwǝt, ɗyin mǝ ɓoot npe ruo nFinikiya, ɓǝ mǝ tugat nnǝgǝn gǝshii vǝchi nanyi. Finikiya a pee pǝsam chii am gǝyil Karita, wu bat yit naa gan-gǝpang dukduk ge fuuska, nau gǝ gan-wang dukduk gǝ fuuska. ¹³ Fǝfong ɓǝm ɓwap a gaam mǝn mǝtugun chii mǝ ɗye nkwǝt du kat bii ɗongɓǝt du. Mǝn mǝ shang kǝgǝl mǝn mǝ tugun chii am mwaan ngan Karita, dukduk gə pǝkong. ¹⁴ Lee dat mən me mə kogom gə tugur wu gə mə yong shi Yurokilidon hə yagal lə kaa mu, mǝn tee gǝchungpe n-am nanyi. ¹⁵ Shi wu kogom fan ma gə kagam mu mən mə pən war nnyi bat mən gəpe muup. ¹⁶ Mə met war nriin me gechungpe wu gə mə yong shi Kauda, mən mə kat chii wuchom bərət. ¹⁷ Shi wu mə ep chii wuchom nanyi tigit, mən mə ɓugat nyi shi teng afe. Mə yigil lugut yong ba du ɗyam gə ees Sirtis, mən mə dəl chii nanyi ruo nchip gǝnyi. ¹⁸ Ɗaar mə fat mən mə ɓəm tugun pak lee muop kuləp n-am nsa kogom viling muop dogol. ¹⁹ Par ɓit wukún mən wutugun chii mə kuləp lee gəsar du. ²⁰ Ɓit ɗyiləng nɓəl ndung mə naa fuus gə ɗagar shi yit mu mou, ɗe a kogom dat weel mən badǝn mən mǝ ɗye nkwǝt yong gǝ mǝ fat zak mou. ²¹ Ndangkong mə mwaan-mwaan pogot nǝ nsǝ, mǝn Bulus yagal ɗar gǝnaar mətugun chii am mən yen, "Muop nmaan, ɗyin gu kǝlǝng ɓǝlǝp gənǝ, ɓə ɗyin gu dǝgǝn yigil wa nKarita ɗe ntaa weel gǝ pal nhə mou. ²² Gǝɗet nhǝ a kwaskwak gu yi, gu mang tugurduan yi, nsa mǝgwuo gǝ muut gǝnaar gu mou, a chii am nhə dat gǝ mə kyen mou. ²³ Nsa dən nləpar mən me məwong Naan gǝnǝ ndung gǝ a wap a nyi hǝ ji ɗar shiɓǝtnə, ²⁴ mən yen, 'Bulus, gə yagal lugut mou. Yong gə ɗar ntagam Kaisar a lengwaar. Gə naa, Naan nɗəgən chinɗong afe pən gurum muop wu gun gǝpe gəme hə ngə.' ²⁵ Waa nsa nyi, gu tugat gǝ tookpya. Nsa a pǝn naduk nkwǝt Naan gǝ chin kabi wu laa gǝ an hǝ. ²⁶ Ɗe tong a lengwaar mə lǝng yi gǝchungpe n-am." ²⁷ Ɓit sarkaafeer kogom fu viling mən dat meet nlǝpar nɗǝgǝn chip Adriyatik, npechagat mən mǝtugun chii mə ɗye kat em du ɗǝk du kaa gǝtǝng. ²⁸ Mə kam mən mə kat shii yagurum, lee mən mə bǝn kam, mən mə kat shii sarkaapaat. ²⁹ Mə yigil lugut mǝ kat yong gǝ mə kaa gəpang mən mə sam gə teng feer nung pəɗar chii mən mə mang ɗangnaan ɗyin ɓit ɓang yi bər. ³⁰ Mətugun chii am nanyi dok muop a npe nyit chii nanyi mən mə sam gǝ chii wuchom ɗen n-am mə chin tongku du zwam a teng ɗyan chii nanyi. ³¹ Mən Bulus laa dər wuntagam mǝlekɗyel gǝ mǝlekǝɗyel nanyi yen, "Zeet daas muop nhə mǝ ntugat nchii nanyi mou ɓə guu fat mou." ³² Mən mǝlekɗyel nanyi mə kwap teng ɗyan chii nanyi vak gənyi mən mǝ nyit nyi lang gəɓǝt am. ³³ Nkang gǝɓit, mən Bulus ɗuak muop mə səsə yi. Laa yen, "Chinyi a ɓit wu sarkaafeer jet gu sə məbi mou. ³⁴ A ɗang gun gu shap pak sə, nsa a nyi gǝ pǝn kagam ngun. Nsa ɗyip kaa me gu gə kyem mou." ³⁵ Laa kam lat mən mang nawe, mǝn ɗǝkyil nNaan gǝyit gurum muop dip. Mǝn tarap nawe nanyi mǝn taa fu sǝ. ³⁶ Lat mǝn kwak muop kwas mǝn mǝ sǝsǝ nde dat. ³⁷ Mən dok a 276 nɗǝgǝn chii nanyi. ³⁸ Mə səsə agal mən mǝ zwam pak alkama nanyi nchip ɗewar chii fyel yi. ³⁹ Ɓit ɓang mən mə naa yil nanyi man mou, ɗe mǝ naa a ees dat, mən mə tankaa dǝrshak nkwət gǝ du tugun chii nmwaan nnǝgǝn gǝnyi o. ⁴⁰ Mən mə kwap teng- ɗyan chii nanyi mən mə kon nɗǝgǝn chip. Mǝn mǝ chin wat teng shep ɗyan chii mǝn mǝ ep dang tak npeep; mǝn mǝ yigir dedat mwaan gə ees nanyi. ⁴¹ Mǝ ruo gǝpe wu liis am vǝl kang shak mǝn chii nanyi ɓyang kaa nɗǝgǝn ɓing ees. Mən fugong chii wu rǝ hǝ ɗe nnǝgǝn nsa nyang pǝt, mǝn gǝnook ɓǝm tarap nsa liis am nanyi ɓyaal dogol. ⁴² Mǝlekɗyel nanyi dok mə tangkop tuo jep lǝɓal nanyi dip nsa me muop ya n-yak nlan. ⁴³ Mən wuntagam mǝlekɗyel nanyi dok tangkop pət gə Bulus, mən laa dər muop wu mə ɓoot ləng am hə mə yaa war paar mǝn ɗək kaa gǝtǝng. ⁴⁴ Nlat ɓə gogot gurum mə ləng gədər, pak kaa klapshep, pak kaa jepe wu mə kat nchii nanyi. A kam nanyi mən mə ɗək mə kaa dip chagap.