¹ Ndagkong wu Festus rə ngan Kaisariya, chin ɓit kún mən ɗəl kaa yaa nUrishalima. ² Ndaawang wunan muop gə mənan Yahudawa mə mə pam Bulus ³ mən mə ɗang Festus ɗə nyong Bulus nUrishalima zok ɗyin mə ntǝ nyi yi gǝwar. ⁴ Festus lap yen Bulus a gurum lǝɓal Kaisariya, mǝn yong jin gǝkaa shik nyi, nung gǝ dǝm mou, ɓǝ ji mwaan nnəgən. ⁵ Mən laa yen, "A waa nnyi, gurum wu ɓoot ɓə mwaan gədərmu. Ɗyin gun gə bələp kaa dagwuo nanyi, ɓə gu pam nyi." ⁶ Festus chin gǝbi ɓit pogokún gə ɓit sar mən sam yaa nKaisariya, ɗaar mə fat mən tong kə pətong-sheep, mən pǝnfu mǝ fat gǝ Bulus. ⁷ Ji rə mən Yahudawa wu mǝ tugat nUrishalima hǝ jya mǝ ɗyam dukduk, mǝn mǝ pam nyi gǝ jepe nɓǝl wu mǝ ɓoot npe nyin məbi gǝkaa mou. ⁸ Bulus laa yənyen, "A ruang məbi kǝ byitǝt Yahudawa, gə ləwap wuyoon gə Kaisar mou." ⁹ Festus zak tangkop pya took Yahudawa mən lap fu Bulus yen, "Gə ɗem ɗyin gə mwaan nUrishalima mwaan a sheep gǝ nnǝgǝn a?" ¹⁰ Bulus lap yen, "A ɗarɗok a ntagam pǝtong-sheep Kaisar, gǝ mǝ sheep an a nnǝgən. Kabi wu gǝ man hǝ, a chin wubis dǝr Yahudawa muop mou. ¹¹ Ɗyin a chin bii wubis, wu ɗong ɗyin a muut, ɓə a nyang muut mou. Bazak kan pampe amuop kaanə nkwət a baan, ɓə məgwuo gə pən an nmuop mou. A lang ɓəlǝp a ntagam Kaisar." ¹² Ndangkong Festus mə kang kəshik gə məwur daskagam, mən lap yen, "Gə lang bələp ntagam Kaisar. Yong gə mwaan ntagam Kaisar!" ¹³ Ndangkong ɓit mak vəl mən long Agripa muop gǝ Banis mə jya dər tal Festus. ¹⁴ Ndangkong ɓit nɓəl nnǝgǝn mən Festus laa bələp Bulus gə nlong nanyi yen, "Felis dok nyit me məgwuo npeem nləɓal. ¹⁵ Gəshi wu an nUrishalima mən ndaawang wunan gə daskagam Yahudawa mə lang ɓələp dǝrnǝ kaa muup, mən mə tangkop a gapshik muut kaa muup. ¹⁶ A lap fu muop a yen səm was gurum Rom bii gǝ mǝ gapshik kə mǝgwuo ɗagt nǝ nɗar ntagam mǝpam nyi mǝn nkat war lap kəshik kaa bii wu mǝ pam nyi mou. ¹⁷ A waa nsa kam, shi wu mə jya gəpe gəme npeeen mən a ɗar wa ɗar mou, ɗaar a pǝy mǝn a tong kə pǝtong-sheep mən a shak muop mə jya dagwuo nanyi. ¹⁸ Shi wu mǝpam nyi mǝ yigil laa ɓǝlǝp mǝn a ɗye a kat a mǝbi wusaan mou. ¹⁹ A kat la ɗǝgǝl nyangshak taa gǝkaa warwap amuop, gə me Yesu wudok muut mǝn Bulus yen nyi nkagahm hə. ²⁰ Dok a man npe ber gəkang ɓələp nanyi mou, mən a nang fu muup kə wu gwar gǝ ɗem mwaan nUrishalima dər sheep nanyi. ²¹ Mən shi wu Bulus ɗang dər mə nyit nyi nləɓal ɗepin long wuyoon, gapshik nanyi yi, mən a shak muop mǝ yaa nyi nnəgən gǝ a kang ɓit wu gə a lep gə nyi dər Kaisar yi." ²² Agripa laa dər Festus yen, "A tangkop an zak a kələng dagwuo nanyi." Festus yen "Ɗaar gǝ kǝlǝng nyi." ²³ Ɗaar mə fat mən Agripa muop gə Banis mə jya gə gya gədər gəshik muop; mə jya gəpe gəme gə mənan mǝlekɗyel muop gə jepyil wu ɓwagar-ɓwagar. Festus pənfu, mən mə jya gə Bulus ntagam muop. ²⁴ Festus yen, "Long Agripa, gə mənan muop wu gǝpe gəme gə mən, gu naa dagwuo nhə, Yahudawa muop nɓəl mə laa ɓələp gǝ an nUrishalima nau gə pee nhə, mən mə aar ɗəgəl du mə yen ɗong ɗyin nkwǝt nkagam zak mou. ²⁵ A lap gəkang mən a kat chin məbi wu mak muut mou, ɗe a nsa dok lang sheep ntagam long wuyoon, mǝn a lep gənyi. ²⁶ An gə mə məbi wagap wu gə a ran gəkaa ɓǝlǝp nanyi a pən long wuyoon mou. A waa nsa kam a ji gə nyi ngun yi, kabi gə Long Agripa npe ɗə a kat bii wu gə a yil kaa ɓələp nanyi yi. ²⁷ Nsa a kat ɗong ɗyin a lep gǝ gurum wu nləɓal nə a yil bii wu mǝ pam nyi gǝkaa hǝ mou."